ރ. މީދޫގެ ކުލަބު ޖަމުއިއްޔާއެއް ކަމަށްވާ އެކުވެރި ކްލަބުން އިންތިޒާމުކޮށްގެން، އެ އަތޮޅުގައި ހިމެނޭ ރިސޯޓްތަކަށް ހުޅުވާލައިގެން ބާއްވާ "އިތާ، އިންޓަ ރިސޯޓް ވޮލީބޯޅަ މުބާރާތް 2024" ގެ ގުރުއަތުލުން ބޭއްވިއިރު، އެންމެ ފަހުގެ ޗެންޕިއަން ޖޯލި ބީއިންގ އާއި ރަނަރަޕް ކުޑަފުށި އެއް ގުރޫޕެއްގައި ވާދަކުރަން ޖެހިއްޖެއެވެ.
މީދޫ އެކުވެރި ކުލަބުގެ އޮފިޝަލަކު ވޮއިސް ސްޕޯޓްސްއަށް މައުލޫމާތު ދިންގޮތުގައި، މި މުބާރާތަކީ ރ. އަތޮޅު ސަރަހައްދުގެ ރިސޯޓްތަކުގެ މެދުގައި ވޮލީބޯޅައިގެ ފޯރި އިތުރުކޮށް ގުޅުން ބަދަހިކުރުމުގެ މަގުސަދުގައި 2023 ވަނަ އަހަރުން ފެށިގެން އެކުލަބުން ބާއްވަމުން އަންނަ މުބާރާތެއް ކަމަށެވެ. މީގެ އިތުރުން މިފަދަ މުބާރާތެއް މީދުގައި ބޭއްވުމުގެ އެންމެ ބޮޑު ބޭނުމަކީ މުބާރާތުގެ ސަބަބުން ރަށަށް ވެސް ގިނަ ފައިދާތަކެއް ލިބިގެންދިއުމެވެ.
އޮގަސްޓް އެއްވަނަ ދުވަހު ފެށުމަށް ހަމަޖެހިފައިވާ، މިއަހަރުގެ މުބާރާތުގައި ޖުމްލަ އަށް ޓީމަކުން ބައިވެރިވެފައިވާއިރު، މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި އަށް ޓީމު ދެ ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު ސެމީ ފައިނަލަށް ހޮވޭ ގޮތަށެވެ.
އެގޮތުން ގުރޫޕް އޭގައި އެންމެފަހުގެ ޗެންޕިއަން ޖޯލި ބީއިންގ އާއި ރަނަރަޕް ކުޑަފުށީގެ އިތުރުން ދެން ހިމެނެނީ މީދުއްޕަރު އަދި މާމުނަގައު އެވެ. އަދި ގުރޫޕް ބީގައި ހިމެނެނީ ރީތިފަރު، ފާރުފުށި، ޖޯލި މޯލްޑިވްސް އަދި ހެރިޓެންސް އާރަށެވެ.
Advertisement
This content is created and paid for by advertisers and does not involve Voice Journalists
