މި އަހަރުގެ މިހާތަނަށް ރާއްޖެއަށް 1.1 މިލިއަން ފަތުރުވެރިން ޒިޔާރަތްކޮށްފިއެވެ.

ފަތުރުވެރިކަމާއި ބެހޭ ވުޒާރާއިން އާއްމުކުރާ ފަތުރުވެރިކަމުގެ ޑެއިލީ ރިޕޯޓްސްއިން ދައްކާގޮތުގައި، މި މަހުގެ 20 ވަނަ ދުވަހާއި ހަމައަށް ރާއްޖެއަށް ޖުމްލަ 1,118,878 ފަތުރުވެރިން ވަނީ ޒިޔާރަތްކޮށްފައެވެ. މިދިޔަ އަހަރުގެ މި މުއްދަތުގައި 1,021,117 ފަތުރުވެރިން ޒިޔާރަތްކުރިއިރު، މިއީ 9.6 އިންސައްތައިގެ ކުރިއެރުމެކެވެ.

މިއަހަރުގެ ޖުލައިމަސް ފެށިގެން 17 ވަނަ ދުވަހާއި ހިސާބަށް ރާއްޖެއަށް 103,349 ފަތުރުވެރިން ޒިޔާރަތްކޮށްފައިވާއިރު، މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރަތްކުރީ 91,510 ފަތުރުވެރިންނެވެ. މިއީ 12.9 އިންސައްތައިގެ ކުރިއެރުމެއްކަން ފާހަގަކޮށްލަން ޖެހެއެވެ.

މިހާތަނަށް ރާއްޖެއަށް ޒިޔާރަތްކުރި 1.1 މިލިއަން ފަތުރުވެރިންގެ ތެރެއިން އެންމެ ގިނައީ ޗައިނާއިން ރާއްޖެއަށް ޒިޔާރަތްކުރި ފަތުރުވެރިންނެވެ. ރާއްޖެއަށް 143,036 ޒިޔާރަތްކުރި ޗައިނާ އޮތީ 12.8 އިންސައްތައިގެ މާކެޓް ޝެއާ އާއިއެކު، ފަތުރުވެރިކަމުގެ މާކެޓްގެ އެއްވަނައިގައެވެ.

ޖުމްލަ 118,291 ފަތުރުވެރިންނާއި އެކު ރަޝިއާ ދެވަނައިގައި އޮތް އިރު މާކެޓްގެ ތިން ވަނައިގައި އޮތީ މިދިޔަ އަހަރު 4 ވަނައިގައި އޮތް އިނގިރޭސިވިލާތެވެ. އެގައުމުން މިހާތަނަށް ރާއްޖެއަށް 100,313 ފަތުރުވެރިން ވަނީ ޒިޔާރަތްކޮށްފައެވެ.

ސަރުކާރުގެ އަމާޒަކީ މި އަހަރު ނިމުމުގެ ކުރިން 2 މިލިއަން ފަތުރުވެރިން ރާއްޖެ އަށް ގެނައުމެވެ. މިގޮތުން ރައީސް ޑރ.މުއިއްޒު ވަނީ ރާއްޖެ އަށް މިއަހަރު 2 މިލިއަން ފަތުރުވެރިން ގެނެވޭނެ ކަމަށް އަންދާޒާ ކުރައްވާ ކަމަށާއި އަމާޒަކީ މި އަހަރު ނިމުމުގެ ކުރިން މުޅިން އަލަށް 20 ރިސޯޓު ހުޅުވައި، 2،857 އެނދު އުފެދިގެން ދިއުން ކަމަށް މީގެ ކުރިން ވިދާޅުވެފައެވެ.