ރާއްޖޭގެ 23 ސްކޫލަކުން އޯލެވެލް ނިންމާ ހުރިހާ ދަރިވަރުންނަށް އޭލެވެލް އަށްކިޔެވުމުގެ ފުރުސަތު ދިނުމަށް ނިންމާފައިވާކަމަށް ތައުލީމާއި ބެހޭ ވަޒީރު ޑރ. އިސްމާއީލް ޝަފީއު ވިދާޅުވެއްޖެއެވެ.

ސެންޓާ ފޯ ހަޔާ ސެކަންޑަރީ އެޑިޔުކޭޝަން (ސީއެޗްއެސްއީ) ގެ އިނާމު ދިނުމުގެ ޖަލްސާގައި ވާހަކަފުޅު ދައްކަވަމުން ވަޒީރު ޝަފީއު ވިދާޅުވީ، މަތީ ތަޢުލީމުގެ ފުރުސަތު ފަހިކޮށް ދިނުމަށް ކުރިމަތިވާ އެންމެ ބޮޑު މައްސަލައަކީ ސާނަވީ އިމްތިހާނުތަކުން ގިނަ ދަރިވަރުން ފާސްނުވުން ކަމަށެވެ.

ރައީސް ޑރ.މުޙައްމަދު މުޢިއްޒުގެ ގެ ވިސްނުންފުޅަކީ މިކަން ބަދަލުކޮށް ފާސްވާ ނިސްބަތް މަތިކުރުންކަން ފާހަގަކުރައްވާ، ވަޒީރު ވިދާޅުވީ، މި އަހަރު ރާއްޖޭގެ 23 ސްކޫލަކުން  އޯ ލެވެލް ނިންމާ ހުރިހާ ދަރިވަރުންނަށް އޭލެވެލްއަށް ވަދެވޭނެގޮތް ހައްދަވައި ދެއްވާނެ ކަމަށެވެ.

Advertisement

އެގޮތުން، ދެ މާއްދާއިން ފާސްވާ ކުދިންނަށާއި، ސްކޫލުތަކުގައި ޖާގަ އޮތް މިންވަރަކުން އެންމެ މާއްދާއަކުން ފާސްވާ ދަރިވަރުންނަށް ވެސް އޭ ލެވަލްއަށް ކިޔެވުމުގެ ފުރުސަތު ދޭނެކަމަށާއި، މިކަމަކީ ބޭކާރު ހަރަދެއް ކަމަށް ބައެއް މީހުން ގަބޫލުކުރި ނަމަވެސް މިއީ ކުދިންގެ ކިބައިގައި ހުންނަ ހުނަރު ކުރިއެރުވުމަށް ލިބޭ ފުރުސަތެއްކަމަށް ސަރުކާރު ގަބޫލު ކުރާ ކަމަށް ވަޒީރު ވިދާޅުވިއެވެ.