އެފްއޭއެމް ހިންގުން ނޮމަލައިޒޭޝަން ކޮމިޓީއަކާ ހަވާލުކުރުމަށް ފީފާއިން ނިންމި ނިންމުމަށް ދިވެހި ރާއްޖޭގެ ކޮމިޝަނަރ އޮފް ސްޕޯޓްސް މުހައްމަދު ތޮލާލް މަރުހަބާ ވިދާޅުވެއްޖެ އެވެ.
ފީފާއިން މިއަދު ވަނީ މާލީ އަދި ހިންގުމުގެ ބޮޑެތި މައްސަލަތަކެއް ކުރިމަތިވެފައި އޮތް އެފްއޭއެމް، ނޯމަލައިޒޭޝަން ކޮމިޓީއަކާ ހަވާލުކުރަން އޭޝިއާގެ ފުޓްބޯޅައިގެ މައި އިދާރާ އޭއެފްސީގެ މަޝްވަރާއާއިއެކު ނިންމާފައިވާކަން އެފްއޭމްއަށް ރަސްމީކޮށް އަންގާފައެވެ.
ފީފާގެ މި ނިންމުމާއި އެކު ރާއްޖޭގެ ސްޕޯޓްސް ކޮމިޝަނަރ އަދި ކުޅިވަރު އިދާރާތަކުގެ ކަންކަން ވިލަރަސްކުރުމުގެ އެންމެ އިސް ފަރާތް ކަމަށްވާ ތޮލާލް އެކްސްގައި ކުރެއްވި ޕޯސްޓެއްގައި ވިދާޅުވީ ފީފާގެ ނިންމުމަށް މަރުހަބާ ދަންނަވާ ކަމަށާއި ފީފާއިން އުފައްދާ އެފްއޭމްގެ ނޯމަލައިޒޭޝަން ކޮމެޓީއަށް ފުރިހަމައަށް އެއްބާރުން ދެއްވާނެ ކަމަށެވެ.
ފީފާއިން އައްޔަން ކުރާ ނޯމަލައިޒޭޝަން ކޮމިޓީގެ މުއްދަތުގެ ގޮތުގައި އެ ފެޑެރޭޝަނުން ދީފައި ވަނީ އެއް އަހަރު ދުވަހެވެ. ކޮމިޓީގެ ދައުރު ހަމަވާނީ އަންނަ އަހަރުގެ ޖުލައި 31 ގެ ނިޔަލަށެވެ. ފީފާ އިން ބުނީ އެ ކޮމިޓީއާ ހަވާލުވާ ޒިންމާތައް ނިމޭހާ އަވަހަކަށް ކޮމިޓީގެ ދައުރު ހަމަވާނެ ކަމަށެވެ.
"ރާއްޖެއާ ގުޅޭ ގޮތުން މިގޮތަށް ނިންމީ އޭއެފްސީއާ މަޝްވަރާކުރުމަށްފަހު އަދި އެފްއޭއެމަށް ކުރިމަތިވެފައިވާ ދޯހަޅި ހިންގުމުގެ މައްސަލަތަކުގެ އިތުރުން މާލީ ގޮންޖެހުންތަކަށް ހައްލެއް ހޯދައިދިނުމުގެ ގޮތުންނެވެ.،" ފީފާގެ ބަޔާނުގައި ބުނެފައި ވެއެވެ.
ކޮމިޓީ އަށް އައްޔަން ކުރާނީ ކޮން ބައެއް ކަމެއް އަދި މިހާތަނަށް ފީފާ އިން ނުނިންމަ އެވެ. ނަމަވެސް ކޮމެޓީއަށް އައްޔަނުކުރުމަށް ރާއްޖޭގެ ބައެއް ފުޓްބޯޅަ ތަޖުރިބާކާރުންގެ މައުލޫމާތު މިހާރު ފީފާއިން އެއްކޮށްފައިވާ ކަމަށް މައުލޫމާތު ލިބެއެވެ.
Advertisement
This content is created and paid for by advertisers and does not involve Voice Journalists
