ބަންގަލަދޭޝްގައި ސަރުކާރު ވަޒީފާތަކަށް މީހުން އައްޔަނުކުރުމުގައި އަމަލު ކުރަމުންދާ ކޯޓާ ނިޒާމާއި ދެކޮޅަށް އެގައުމުގެ ދަރިވަރުން އިސްވެ ކުރަމުންދާ މުޒާހަރާތަކުގެ ޒިންމާ ނަގަންޖެހޭނީ ބަންގްލަދޭޝްގެ އިދިކޮޅު ފަރާތްތަކުން ކަމަށް އެގައުމުގެ ބޮޑުވަޒީރު ޝައިޚް ހަސީނާ ވިދާޅުވެއްޖެއެވެ.

ބަންގްލަދޭޝްގެ އުއްތަމަ ފަނޑިޔާރުގެ ކޯޓުން އާދިއްތަ ދުވަހު ނެރުނު ޙުކުމެއްގައި ގިނަ ކޯޓާތައް އުވާލުމަށް ނިންމުމާއި ގުޅިގެން ޝައިޚް ހަސީނާ ވިދާޅުވީ، މި މުޒާހަރާތަކުގައި މިހާތަނަށް 147 މީހަކު މަރުވެފައިވާއިރު، ޝައިޚް ހަސީނާ ވިދާޅުވީ، ކާފިއު އިއުލާނު ކުރަން ޖެހުނީ ރައްޔިތުންގެ ފުރާނައާއި މުދާ ރައްކާތެރި ކުރުމަށްކަމަށާއި، އެގައުމުގައި ހިންގަމުންދާ ހަމަނުޖެހުން ހަމައަކަށް އެޅުމުން ކާފިއު އުވާލާނެ ކަމަށެވެ.

މީގެ އިތުރުންވެސް ހަސީނާ ވަނީ މި ހަމަނުޖެހުންތަކުގެ ޒިންމާ ނަގަން ޖެހޭނީ އެގައުމުގެ މައިގަނޑު އިދިކޮޅު ޕާޓީކަމަށްވާ ބަންގްލަދޭޝް ނެޝަނަލިސްޓް ޕާޓީ (ބީއެންޕީ) އާއި ޖަމާޢަތެ އިސްލާމީ ޕާޓީ އާއި އެ ޕާޓީތަކުގެ ދަރިވަރުންގެ ޖަމިއްޔާއިން ކަމަށް ވިދާޅުވެފައެވެ.

އެ ތުހުމަތުތަކަށް ބީއެންޕީން ރައްދު ދީފައިނުވި ނަމަވެސް، އެ ޕާޓީން ވަނީ މުޒާހަރާގެ ތެރެއިން އިންސާނީ ޙައްޤުތަކަށް އަރައިގަތުމާއި، އަދި ޚިޔާލު ފާޅުކުރުމުގެ މިނިވަންކަމާއި އިދިކޮޅުގެ ޚިޔާލުތައް ހަސީނާގެ ސަރުކާރުން ހުރަސް އަޅާކަމަށް ތުހުމަތުކޮށްފައެވެ.

ބަންގްލަދޭޝްގައި މި މުޒާހަރާތައް ފެށިގެން އައީ، ބަންގްލަދޭޝްގެ މިނިވަން ކަމަށް ކުރި ހަނގުރާމައިގެ ބައިވެރިންގެ ޢާއިލާތަކަށް ސަރުކާރު ވަޒީފާތަކުގެ 30 އިންސައްތަ ޚާއްޞަ ކުރުމަށް އެ ޤައުމުގެ ހައި ކޯޓުން ހުކުމް ކުރުމާ ގުޅިގެންނެވެ.

އެގައުމުގެ ހައި ކޯޓުގެ މި ނިންމުމާއިއެކު، ވަކި ބަޔަކަށް ހާއްސަކޮށްފައިވާ ވަޒީފާތަކުގެ ނިސްބަތް 50 އިންސައްތައަށް ވުރެ އިތުރުވިއިރު، ފަހުން ކޯޓުން ވަނީ ނިންމުން ބާތިލްވެސް ކޮށްފައެވެ. އެހެންނަމަވެސް، އޭގެ ފަހުންވެސް މުޒާހަރާތަކަށް ނިމުމެއް އައިސްފައެއް ނުވެއެވެ.

މުޒާހަރާ ހުއްޓުވުމުގެ ގޮތުން އެގައުމުގެ ސަރުކާރުން ވަނީ މިދިޔަ ހަފްތާގެ ބުރާސްފަތި ދުވަހުން ފެށިގެން މޮބައިލް އިންޓަރނެޓުގެ ޚިދުމަތް ހުއްޓާލައި، އެގައުމުގެ މީޑިއާތަކުގެ ވެބްސައިޓްތަކާއި ސޯޝަލް މީޑިއާވެސް އަޕްޑޭޓް ކުރުން ހުއްޓާލާފައެވެ.

މި މުޒާހަރާތަކުގެ ތެރެއިން އެގައުމުގެ ސަރުކާރުގެ އިމާރާތްތަކާއި ދައުލަތުގެ މީޑިއާތަކާއި ފިހާރަކާއި އެނޫންވެސް ތަންތަނުގައި ހުޅުރޯކުރުމާއު، ގާފަދަ ތަކެތި އުކައި، ބޮޑެތި ގެއްލުންތަކެއް ވަނީ ދީފައެވެ.

އެހެންނަމަވެސް ސަރުކާރުގެ ވަޒީފާތަކުގެ 93 އިންސައްތައަކީ ވަޒީފާއަށް ކުރިމަތިލާ މީހާގެ ގާބިލުކަމުގެ މައްޗަށް ނިސްބަތްކޮށް، ދޭ ވަޒީފާތަކެއް ކަމަށް ސުޕްރީމް ކޯޓުން އަމުރުކުރުމާ ގުޅިގެން، އެގައުމުގެ މަގުތައް ކުރިއަށްވުރެ އަމާންކަމަށް ބޭރުގެ ނޫސްތަކުން ރިޕޯޓްކުރެއެވެ.