"ލޯތަކުގެ ފިނިކަން" ނަމުގައި ނަމާދު ވޯކްޝޮޕެއް ރ.މީދޫގައި ބޭއްވުމަށް އަލް އަސްރުން ނިންމައިފިއެވެ.

އަލް އަސްރުން މިކަމާއި ގުޅިގެން ކުރި ޕޯސްޓެއްގައި ބުނީ މި ވޯކްޝޮޕް ބޭއްވުމަށް ހަމަޖެހިފައި ވަނީ 18 އަހަރުން މަތީގެ ފަރާތްތަކަށް ކަމަށެވެ.

ދެދުވަހުގެ މުއްދަތަކަށް ކުރިއަށްގެންދާ މި ވޯކްޝޮޕް ކުރިއަށް ދާނީ މިމަހުގެ 25 އިން 27 އަށް ރ.މީދޫގައި ކަމަށް ވެސް އަލް އަސްރުން މައުލޫމާތުދެއެވެ. 

މިއީ ރ.މީދޫ ކައުންސިލާއި އެރަށުގެ ޖަމިއްޔާއެއް ކަމަށްވާ ޔުނައިޓެޑް ފޯ މައި މީދޫ ޔޫތު ޑިވެލޮޕްމެންޓާއި ގުޅިގެން ކުރިއަށްގެންދާ ވޯކްޝޮޕެކެވެ.

ނަމާދާއި ބެހޭގޮތުން ކުރިއަށް ދާ މި ވޯކްޝޮޕްގައި ކިޔަވައިދޭނީ ފުންނާބު އުސް ދީނީ ޢިލްމުވެރިޔާ ޑރ.އާދަމް ޝަމީމެވެ.

މިއަހަރުގެ ޖެނުއަރީ މަހުވެސް އަލް އަސްރުން އިސްލާމިކް މިނިސްޓްރީއާއި ގުޅިގެން މި ވޯކްޝޮޕް މާލޭގައި ބާއްވާފައިވާއިރު، އެ ވޯކްޝޮޕްގައި ނަމާދުގެ މަޤާމް، ޠަހާރަތާއި، ވުޟޫ އަދި ނަމާދު ތަކްބީރުން ފެށިގެން ސަލާމް ދިނުމާ ދެމެދުގައިވާ ޛިކުރުތަކާއި ހަރަކާތްތައް ވެސް ވަނީ ކިޔަވައިދީފައެވެ.

މިއީ އަހަރަކު އެއްފަހަރު އަލް އަސްރުން ބާއްވާ ވޯކްޝޮޕެއް ނަމަވެސް އެ ޖަމިއްޔާއަށް ރިކުއެސްޓް ކުރުމުން ރަށްރަށުގައި އާއި އޮފީސްތަކުގެ ގައި ވެސް މި ވޯކްޝޮޕް ބާއްވައިދޭ ކަމަށް އެ ޖަމިއްޔާ އިން މައުލޫމާތު ދެއެވެ.