Reygandu heylai hurefai, fathihu nidhaa meehunnah dhe ghaneemaa eh gelligendhey: Khuthuba

ރޭގަނޑު ހޭލައި ހުރެފައި، ފަތިހު ނިދާ މީހުންނަށް ދެ ޣަނީމާއެއް ގެއްލިގެންދޭ: ޚުތުބާ

26 Jul 2024 | 12:58

ރޭގަނޑު ހޭލައި ހުރެފައި ފަތިހު ނިދާ މީހުންނަށް މުހިންމު ދެ ޣަނީމާއެއް ގެއްލިގެންދާ ކަމަށް މިއަދުގެ ޚުތުބާގައި ބުނެފިއެވެ.

“ރިޒްޤުގެ ބަރަކާތް ހޯދާށެވެ!“ މައުލޫއަށް މިއަދު އިއްވި ހުކުރު ޚުތުބާގައި ބަޔާން ކޮށްފައިވާ ގޮތުން، ރޭގަނޑު ފަސް ވަންދެން ކުޅިވަރާއި މަޖަލުގައި ހޭލާ ހުރުމަށްފަހު، ފަތިސް ވަގުތު ވުމުން ނިދާ މީހާއަށް ގެއްލިގެންދާ ދެ ޣަނީމާ އަކީ ފަތިސް ނަމާދާއި ދުވާލު ފެށޭ ވަގުތުގެ ބަރަކާތެވެ.

އަދި މިކަމުގެ ސަބަބުން އެފަދަ މީހުން އިލާހީ ރިޒްޤުން މަޙްރޫމުވާ ކަމަށް ވެސް ބުނެފައިވެއެވެ.

އެ ކަމުގެ ސަބަބުން އޭނާ އިލާހީ ރިޒްޤުން މަޙްރޫމުވެއެވެ. الله އޭނާގެ މައްޗަށް ވާޖިބުކުރައްވައިފައިވާ ޙައްޤު އަދާނުކުރާ ދުވަހަކީ އަބާއްޖަވެރި ދުވަހެކެވެ. އޮފީހަށް ގަޑި ޖެހިގެންދާ މީހާގެ މުސާރައިން އުނިވާ ގޮތަށް، ސަވާބާއި ދަރުމަ ވެސް އުނިވާނެއެވެ. ފަތިސްނަމާދު ނުކުރުމުން اللهގެ ރުއްސެވުމުން އޭނާ މަޙުރޫމުވާނެއެވެ. މި ވަގުތުގެ ބަރަކާތުން އިންސާނާ މަޙްރޫމު ކުރެވޭތޯ ޝައިޠާނާ މަސައްކަތް ކުރާނެއެވެ. ރޭގަނޑު ކުޅިވަރުގައި ހޭލައި ހުރުން، އޭނާއަށް ރީތިކޮށްދީ، ފަތިހު ތެދުވުން ބުރަކަމަކަށް ހަދާނެއެވެ. މި ފަދަ މީހާގެ ގާތަށް ނިދި އަންނާނީ ފަތިސް ވުމުންނެވެ. އޭނާއަށް ފަތިސް ނަމާދު ވެސް އަދި ދުވާލުގެ ފެށުން ވެސް ގެއްލުނީއެވެ. ހިތާމައިގެ ކޮޅެއް ވެސް ނެތެވެ. ހައްދަވައި ބޮޑުކުރެއްވި ރަސްކަލާކޮ! ފަތިސްނަމާދަށް ރައްކާތެރިވެ، ހެނދުނުގެ ވަގުތުގައި ހީވާގިކަމާއެކު ރިޒްޤުހޯދާން މަސައްކަތްކުރާ މުރާލި ބަޔަކުކަމުގައި އަޅަމެން ލައްވާނދޭވެ!

ހުކުރު ޚުތުބާ

ޚުތުބާގައި އިތުރަށް ފާހަގަކޮށްފައިވާ ގޮތުގައި، މާތް الله ކޮންމެ އެއްޗެއް ވެސް ހައްދަވާއިރު، އެ އެއްޗެއްގެ ރިޒްޤު ކަނޑައަޅުއްވައެވެ. ނަމަވެސް ލިބޭ މިންވަރަށް ބޭނުންތައް ބަހައިލައިގެން ހޭދަކުރުމުގައި އިޤްތިޞާދުކުރުމަކީ އިންސާނާގެ މަސްއޫލިއްޔަތެކެވެ.

އަހުރެމެން މާތް اللهގެ ފޮތަށާއި، ކީރިތި ރަސޫލާ ޞޢވ ސުންނަތަށް ބަލައިފި ނަމަ، ރިޒްޤު ހޯދުމުގައި އޮތް ރަނގަޅު ގޮތް ފެންނާނެއެވެ. އެއީ މާތް الله އަށް ބިރުވެތިވެ تَقْوَىވެރިވުމާއި ވަކީލުކުރުމެވެ. މާތް الله ވަޙީކުރައްވައިފައިވާ ބަސްފުޅެއްގެ މާނައީ: "އަދި اللهއަށް ތަޤްވާވެރިވާ މީހާ (ދަންނާށެވެ!) އެކަލާނގެ އޭނާޔަށް ނުކުންނާނެ މަގެއް ދައްކަވާނެތެވެ. އަދި ހީ ވެސް ނުކުރާފަދަ ގޮތްގޮތުން އެކަލާނގެ އޭނާޔަށް رزق ދެއްވާނެތެވެ. އަދި اللهއަށް ވަކީލު ކުރާމީހާ (ދަންނާށެވެ!) ފަހެ، އޭނާޔަށް އެކަލާނގެ ފުދެއެވެ."

ހުކުރު ޚުތުބާ

މިއާއެކު، ޚުތުބާގައި ބުނީ ރިޒްޤު ތަނަވަސްކޮށްދެއްވައި، ރިޒްޤުގައި ބަރަކާތްލައްވާ ކަންތައްތަކުގެ ތެރޭގައި ރަޙިމުގެ ގުޅުން ދެމެހެއްޓުމާއި ގާތްތިމާގެ މީހުންނަށް ހެޔޮކޮށް ހިތުން ހިމެނޭ ކަމަށެވެ.

އަދި ޞަދަޤާތަކީ މުދަލުގައި ބަރަކާތްލައްވައި، މުދާ ރައްކައުތެރިކޮށްދެއްވާނެ ކަމެއް ކަމަށާއި، ރަސޫލު الله ޞައްލަالله ޢަލައިހި ވަސައްލަމަ ޙަދީޘްކުރައްވާފައިވާ ގޮތުގައި ޞަދަޤާތުގެ ސަބަބުން އަޅާގެ މުދަލަށް އުނިކަމެއް ނާންނާނެ ކަމަށްވެސް ޚުތުބާގައި ފާހަގަކޮށްފައިވެއެވެ.

ޚުތުބާގައި އިތުރަށް ބަޔާންކޮށްފައިވާ ގޮތުގައި، ރިޒްޤު ހޯދާން އެދޭ މީހާ، ހީވާގިކަމާ އެކު މަސައްކަތް ކުރަންޖެހެއެވެ. އަދި ޙައްޤު ގޮތުގައި ރިޒްޤު ހޯދާން މަސައްކަތްކުރާ މީހާއަކީ اللهގެ މަގުގައި ޖިހާދުކުރާ މީހެއް ފަދަ މީހެއް ކަމަށާއި، އޭނާއަށް الله ރިޒުޤު ތަނަވަސްކޮށް ދެއްވާނެއެވެ.

ދީން

ހުކުރު ޚުތުބާ