ވެރިކަމާއި ހަވާލުވެވަޑައިގެންނެވިއިރު 2 މިލިޔަން ޑޮލަރުގައި ހުރި ސޮވްރިން ޑިވެލޮޕްމަންޓް ފަންޑަށް މިއަދާއި ހަމައަށް މި ސަރުކާރުން 65 މިލިޔަން ޑޮލަރު ޖަމާކޮށްފައިވާ ކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.
ރައީސް ޑރ.މުޢިއްޒު މިފަދައިން ހާމަކުރައްވާފައިވަނީ ރޭ ކުރިއަށްދިޔަ މިނިވަންދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުންނެވެ.
މިގޮތުން ރައީސް ޑރ.މުޢިއްޒު ވިދާޅުވީ، ފައިސާ ޗާޕު ނުކޮށް ތަންފީޒުކުރަމުންދާ އިގްޞާދީ އެޖެންޑާގެ ތެރެއިން 26 ޖުލައި އާއި ހަމައަށް ސޮވްރިން ޑިވެލޮޕްމަންޓް ފަންޑަށް 65 މިލިއަން ޑޮލަރު ޖަމާކޮށްފައިވާ ކަމަށެވެ.
"ސޮވެރިން ޑިވެލޮޕްމެންޓް ފަންޑްގައި ހުރީ އެންމެ 2 މިލިއަން ޑޮލަރު. ވަރަށް ގިނައިން އެވާހަކަ ވާނީ ދެކެވިފައި. އަޅުގަނޑުމެން އިގްތިޞާދީ އެޖެންޑާ ތަންފީޒު ކުރަން ފަށައި، ފައިސާ ޗާޕު ނުކޮށް ކުރަމުންމިދާ ތަންފީޒުކުރުމުގެ ތެރެއިން މިއަދުގެ ހާލަތު، މިއަދު 26 ޖުލައި، މި ދެންނެވި 2 މިލިޔަން ޑޮލަރު ހުރި ސޮވްރިން ޑިވެލޮޕްމަންޓް ފަންޑަށް އަޅުގަނޑުމެން ޖަމާކޮށްފިން 65 މިލިއަން ޑޮލަރު."
ރައީސް ޑރ.މުޢިއްޒު ވިދާޅުވިއެވެ.
ރައީސް ޑރ.މުޢިއްޒު ވިދާޅުވީ، މިއީ ބޭރުގެ ދަރަނިތައް ދެއްކުމަށްޓަކައި ސަލާމަތްކުރާ ފައިސާ ކަމަށާއި، އިގްތިޞާދީ އެޖެންޑާއެއް ސަރުކާރުން ރާވާފައިވަނީ އިގްތިޞާދީ ސިޔާދަތު ޔަގީން ކުރުމަށްކަމަށެވެ.
މިދިޔަ ސަރުކާރު 2018 ވަނަ އަހަރު ވެރިކަމާއި ހަވާލުވިއިރު ސޮވްރިން ފަންޑުގައި 500 މިލިއަން އެމެރިކާ ޑޮލަރަށްވުރެ ގިނަ އަދަދަކަށް ފައިސާ ހުރިކަމަށްމީގެ ކުރިން ސަރުކާރުން ވަނީ ހާމަކޮށްފައެވެ. އަދި މިދިޔަ ވެރިކަން ނިމުއިރު، އެ ފަންޑުގައި ހުރި ހުރިހާ ޑޮލަރެއްހެން މާރުކޮށްފައިވާއިރު، އަމާޒަކީ މިއަހަރު ނިމޭއިރު ސޮވްރިން ފަންޑަށް 100 މިލިއަން ޑޮލަރު ޖަމާކުރުންކަމަށް މި ސަރުކާރުން ބުނެއެވެ.
Advertisement
This content is created and paid for by advertisers and does not involve Voice Journalists
