ކުރީގެ ރައީސް އިބްރާހީމް މުޙައްމަދު ޞާލިޙުގެ ބޭރު ދަތުރުފުޅަކާ ގުޅޭގޮތުން ކުރީ ސަރުކާރުން ސިއްރު ކުރި މައުލޫމާތުތަކެއް މި ސަރުކާރުން ހާމަކޮށްފިއެވެ.

އޭރުގެ ސަރުކާރުން މި މައުލޫމާތުތައް ހިއްސާކުރުމަށް ދެކޮޅު ހަދައި 20 މާރިޗު 2022 ގައި ހައިކޯޓަށް ވަނީ މިމައްސަލަ ހުށަހަޅާފައެވެ. އެހެންނަމަވެސް، މި މައުލޫމާތުތައް ހިއްސާ ކުރަން ޖެހޭކަމަށް އިންފޮމޭޝަން ކޮމިޝަނަރު ނިންމެވި ނިންމެވުން ބަދަލުކުރަން ނުޖެހޭ ކަމަށް ހައި ކޯޓުން ކަނޑައެޅުމާއި ގުޅިގެން ރައީސް ޞާލިހުގެ ސަރުކާރުން ވަނީ 7 ޖުލައި 2023 ގައި މި މައްސަލަ ސުޕްރީމް ކޯޓުގައި އިސްތިއުނާފުކޮށްފައެވެ.

އެހެންނަމަވެސް، މިސަރުކާރުން ވަނީ އެ މައްސަލަ އަނބުރާ ގެނެސް މައުލޫމާތުތައް ހިއްސާކުރުމަށް ނިންމާފައެވެ.

Advertisement

އެގޮތުން، މި މައުލޫމާތުތައް ހޯދުމަށް އެދުނުފަރާތާއި ހިއްސާ ކުރުމަށް ނިންމާފައިވާކަން ހާމަކޮށް، ބަންޑާރަނައިބުގެ އޮފީހުން މިމަހުގެ 23 ވަނަ ދުވަހު ނެރުނު ނޫސް ބަޔާނެއްގައި ބުނީ، ރައީސް ޞާލިހުގެ ދަތުރުފުޅާއި ގުޅިގެން އެ މަޢުލޫމާތުތައް، މަޢުލޫމާތަށް އެދުނު ފަރާތަށް ޙިއްޞާ ކުރެއްވުމަށް ރައީސުލްޖުމްހޫރިއްޔާގެ އޮފީހަށް ލަފާއަރުވާފައިވާނެ ކަމަށެވެ.

މިއީ 2021 ވަނަ އަހަރު، މިހާރުގެ ރައްޔިތުންގެ މަޖިލީހުގެ ހިތަދޫ މެދު ދާއިރާގެ މެމްބަރު އަހްމަދު އަޒާން މަރުޒޫޤް ހޯދަން އެދިލައްވާފައިވާ މައުލޫމާތެކެވެ. އަޒާން ވަނީ މި ދަތުރުފުޅުތަކުގެ ރަސީދުތައް އެކްސްގައި ކުރެއްވި ޕޯސްޓެއްގައި ހިއްސާކުރައްވާފައެވެ.

މި ސަރުކާރުން ވަނީ ރައީސް ޞާލިހުގެ ދެ ކަނބަލުން 2021 ވަނަ އަހަރުގެ ސެޕްޓެމްބަރު މަހުގެ 18 އިން 28 އަށް އެމެރިކާ ކުރެއްވި ދަތުރުފުޅުގައި، އެމަނިކުފާނުގެ ދަތުރުފަތުރަށް ދިޔަ ޚަަރަދާއި، ހުންނެވުމުގެ ޚަރަދާއި، ދަތުރުފުޅުގެ ޓިކެޓްގެ ޚަރަދު ވެސް ހާމަކުރައްވާފައެވެ.

މިގޮތުން ރައީސް ޞާލިހުގެ ދެކަނބަލުން ގެ ޓިކެޓްގެ ޚަރަދަށް މިދިޔަ ސަރުކާރުން ޖުމްލަ 350،404.08 ރުފިޔާ ޚަރަދުކޮށްފައިވާއިރު، އެ ދެކަނބަލުންގެ ހުންނެވުމަށް 36,747 ޑޮލަރު (566,638.74 ރުފިޔާ) ވަނީ ޚަރަދުކޮށްފައެވެ.

ހަމައެއާއިއެކު، ރައީސް ޞާލިހުގެ ދެކަނބަލުންނާއި އަރިހުގައި ވަޑައިގެންނެވި ސަރުކާރުގެ ވަފުދުގެ ބޭފުޅުން ހިމެނޭހެން އެމެރިކާގައި ކުރެއްވި ދަތުރުފުޅުތަކަށް ޖުމްލަ 20،370 ޑޮލަރު (314،105 ރުފިޔާ) ވަނީ ކުރީ ސަރުކާރުން ހަރަދުކޮށްފައެވެ.

އެއާއިއެކު ރައީސް ޞާލިހު އެމެރިކާއަށް ކުރެއްވި ދަތުރުފުޅަށް ހިނގި ޚަރަދުތަކަށް ކެއުން ބުޔުމާއި ނުލައި ގާތްގަނޑަކަށް 1,231,147 ރުފިޔާ އަރައެވެ.