މިސްކިތްތަކުގައި ޤާރީ ކްލާސްތައް ހިންގުމުގެ ހުއްދައަށް އެދުމުގެ ފުރުޞަތު އިސްލާމީ ކަންތައްތަކާއި ބެހޭ ވުޒާރާއިން ހުޅުވާލައިފިއެވެ.

އެ ވުޒާރާއިން ބުނީ، މުޅި ރާއްޖެއަށް އަމާޒުކޮށްގެން މިސްކިތްތަކުގައި ހިލޭ ސާބަހަށް ޤުރްއާން ކްލާސް ހިންގައިދޭން ބޭނުންވާ އިމާމުންނާއި ޤުރްއާން މުދައްރިސުންނަށް އެ ފުރުޞަތު ހުޅުވާލާ ގޮތަށް ހަމަޖެހިފައިވާ ކަމަށެވެ.

އެހެންކަމުން އެކަމަށް ޝައުޤުވެރިވާ ފަރާތްތަކުން "މިސްކިތު ޤާރީ ކްލާސް ފޯމް" ލިންކް https://forms.gle/2tXnzJQo1ctrSFp36 މެދުވެރިކޮށް ފުރިހަމަކުރުމަށްފަހު އޮގަސްޓް 15 ވާ ބުރާސްފަތި ދުވަހުގެ 14.00 ގެ ކުރިން ހުށަހެޅުމަށް އެ ވުޒާރާއިން އެދެއެވެ.

މީގެ ކުރިން އިސްލާމީ ކަންތައްތަކާއި ބެހޭ ވަޒީރު ޑރ.ޝަހީމް އަލީ ސައީދު ވަނީ މިސްކިތްތަކުގައި 2 ނަމާދު ދޭތެރޭގައި ޤާރީ ކްލާސް ހިންގުމަށް އަންނަ ހަފްތާގައި ހުއްދަ ދިނުމަށް ހަމަޖެހިފައިވާކަން ހާމަކުރައްވާ، މި ކްލާސްތަކުގައި އިމާމުންނާއި ޤުރުއާން މުދައްރިސުންނަށް ހިލޭ ސާބަހަށް ޤުރުއާން ކިޔަވައިދީ ދަސްކޮށްދެވޭނެ ކަަމަށް ވިދާޅުވެފައެވެ.

ހަމައެއާއިއެކު، ރިތި ގުރުއާން ކިޔެވުމުގެ 36 ވަނަ ގައުމީ މުބާރާތް ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވަނީ ހިލޭ ކީރިތި ޤުރްއާން ކިޔެވޭނެ ކުލާސްތައް އިތުރުކޮށް އެ ޚިދުމަތް މުޅި ރާއްޖެއަށް ފުޅާކުރައްވާނެކަމަށް ވިދާޅުވެފައެވެ.