މީސްމީޑިއާގެ މަންސައެއް ކަމަށްވާ ޓިކްޓޮކާއި އެނޫންވެސް އެފަދަ އެހެން މަންސަތަކުން ފައިސާ ލިބޭނެ ގޮތް ހެދުމަށް ގިނަ މަސައްކަތްތަކެއް ކުރައްވަމުން ގެންދަވާކަމަށް އިގްތިޞާދާ ބެހޭ ވަޒީރު މުހައްމަދު ސައީދު ވިދާޅުވެއްޖެއެވެ.
ރޭ "ޕީއެސްއެމް ނިއުސް"ގެ ރާއްޖެ މިއަދު ޕްރޮގްރާމްގައި ވާހަކަ ދައްކަވަމުން ސަޢީދު ވިދާޅުވީ، މީސްމީޑިއާގެ އެކި މަންސަތަކަކީ ބޭރުގެ ގައުމުތަކުގެ އުފެއްދުންތެރިން ރަނގަޅު އާމްދަނީއެއް ހޯދަމުން އަންނަ މަންސަތަކެއް ކަމަށެވެ. އެހެން ނަމަވެސް ދިވެހިރާއްޖޭގައި، ދިވެހި އުފެއްދުންތެރިންނަށް އެފަދައިން ފައިސާ ނުހޯދެނީ، ރާއްޖޭގެ މިހާރު އޮތް ނިޒާމުގެ ތެރޭގައި ފައިސާ ބަލައިގަންނާނެ ފަސޭހަ ގޮތްތަކެއް ނެތުމުން ކަން އޭނާ ފާހަގަކުރެއްވިއެވެ.
"ގިނަ އަދަދެއްގެ އުފެއްދުންތެރިން އެބަ ތިބި، އާޓިސްޓުން، މިއުޒިޝަނުން އެކި ކަހަލަ ކްރިއޭޓިވް ކަންކަން ކުރާ، މިސާލަކަށް ޔޫޓިބަކީވެސް މިއަދު ވިޔަފާރި ކުރެވޭ އެއް ސޯޝަލް ޕްލެޓްފޯމް، އިސްނސްޓަގްރާމަކީވެސް ވިޔަފާރި ކުރެވޭ ޕްލެޓްފޯމެއް، ފޭސްބުކް ޓިކްޓޮކް ކަހަލަ އެއްޗެއްސަކީވެސް ހަގީގަތުގައި ގައުމުތަކުން ވިޔަފާރީގެ ތެރެއަށް ވަދެގެން ވަރަށް ބޮޑަށް ހަރަކާތްތެރިވާ އޭރިއާސްތަކެއް، ރާއްޖޭގައި މިކަން ނުކުރެވޭ، ސަބަބަކީ ރާއްޖެއަށް މިހާރު އޮތް ނިޒާމުގެ ތެރޭގައި ނެތް ޕޭމަންޓް ރިސީވް ކުރެވޭނެ ފަސޭހަ ގޮތްތަކެއް"
އިގްތިޞާދާ ބެހޭ ވަޒީރު މުހައްމަދު ސައީދު
އެހެން ކަމުން، އެކަން ހައްލުކުރުމަށް ވަރަށް ގިނަ މަސައްކަތްތައް އަދުގެ ސަރުކާރުން ކުރަމުންދާކަން އޭނާ ފާހަގަކުރެއްވިއެވެ.
އެއާއެކު، ސައީދު ވިދާޅުވީ ޓިކްޓޮކުން ރާއްޖެ އަށް އެންމެ ފައިދާ ހުރި ގޮތް ހޯދުމަށް ޓިކްޓޮކްގެ ރީޖަނަލް އޮފީސްތަކާއި ވާހަކަދައްކަން ފަށާފައިވާ ކަމަށާއި އެއަށް ކުރިއެރުންތައް ލިބެމުންދާ ކަމަށެވެ.
."އެކަން (ޓިކްޓޮކުން ފައިސާ ލިބޭތޯ ކުރާ މަސައްކަތް) ކުރާއިރު ޗައިނާގެ ސަރުކާރުގެ އެހީތެރިކަމަށް އެދިގެން މި މަސައްކަތް ކުރަނީ… ކުރިއެރުންތަކެއް ލިބެމުންދަނީ. ޖުމްލަ ގޮތެއްގައި ކޮންޓެންޓް ކްރިއޭޓަރުންނަށް ދިމާވެފައި މިހުރި ގޮންޖެހުންތަކެއްގައި އަދި ހާއްސަކޮށް އީ ކޮމާސްގެ ތެރޭގައި މިހުރި ބޮޑެތި ގޮންޖެހުންތަކުގެ ތެރޭގައި ރައީސްގެ މެނިފެސްޓޯ ވައުދެއްގެ ގޮތުން އަޅުގަނޑުމެން އަށް މަސް ދުވަސްތެރޭގައި އާދެވިފައި ތިބި ހިސާބު މި ދެންނެވީ،"
އިގްތިޞާދާ ބެހޭ ވަޒީރު މުހައްމަދު ސައީދު
މީގެ އިތުރުން އަންނަ މަސް ނިމުމުގެ ކުރިން ރާއްޖޭގައި އިންޑިއާގެ ރުޕޭ ކާޑް ބޭނުން ކުރަން ފެށޭނެކަމަށާ އަދި ގޫގުލް ޕޭ އާއި އެޕަލް ޕޭ ރާއްޖޭގައި ބޭނުންކުރެވޭނެ ގޮތް ހެދުމަށްވެސް މަސައްކަތް ކުރަމުންދާކަމަށް ސައީދު ވިދާޅުވިއެވެ.
"އެކަން ކުރާއިރު ޗައިނާގެ ސަރުކާރުގެ އެހީތެރިކަމަށް އެދިގެން މި މަސައްކަތް ކުރަނީ ކުރިއެރުންތަކެއް ލިބެމުންދަނީ" މިނިސްޓަރު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
