މާލޭގައި، ގެއަކަށް މީހަކު ވައްދައި، އެމީހާ ބަރަހަނާކޮށް ބިރުދެއްކުމަށްފަހު އެކައުންޓުގައި ހުރި ފައިސާ ފޭރުނު މައްސަލާގައި އަންހެނަކު ހައްޔަރުކޮށްފި އެވެ.

ފުލުހުން އިއްޔެ ބުނެފައިވާ ގޮތުގައި، މީހަކަށް ބިރުދައްކައިގެން ކޭޝް ކާޑުގެ ޕިން ހޯދުމަށްފަހު، އެކައުންޓުގައިވާ ފައިސާ ފޭރުނު މައްސަލަ ފުލުހުންނަށް ހުށަހެޅީ މި ޖުލައި މަހުގެ 24 ވަނަ ދުވަހުއެވެ. 

އަދި އެ މައްސަލައާ ގުޅިގެން ކޯޓު އަމުރެއްގެ ދަށުން، މީގެ ކުރިން ފުލުހުން ހައްޔަރުކޮށްފައިވަނީ އުމުރުން 26 އަހަރުގެ މީހަކާއި 35 އަހަރުގެ މީހެކެވެ. ހައްޔަރު ކުރެވުނު ދެމީހުންނަކީ ވެސް ދިވެހި ފިރިހެނުން ކަމަށް ބުނެފައިވެއެވެ. 

Advertisement

އެމީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން އޭގެ ތެރެއިން އެކަކު 30 ދުވަހުގެ މުއްދަތަކަށް، އަދި އަނެކަކު 60 ދުވަހުގެ މުއްދަތަކަށް ބަންދުކުރަން ކޯޓުން ވަނީ އަމުރު ކޮށްފައެވެ.

އެ މައްސަލައާއި ގުޅިގެން އިތުރަށް މައުލޫމާތު ދެމުން ފުލުހުން މިއަދު ބުނީ، މައްސަލައާއި ގުޅިގެން ހޯދަމުންދިޔަ 43 އަހަރުގެ ދިވެހި އަންހެނަކު މިހާރު ހައްޔަރު ކުރެވިފައިވާ ކަމަށާ، އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން ތަހުގީގު ނިމެންދެން ބަންދު ކުރުމަށް ހުކުމް ކޮށްފައިވާ ކަމަށެވެ.

ފުލުހުން ދަނީ މި މައްސަލަ އިތުރަށް ތަހުގީގުކުރަމުންނެވެ.