ފުރާންސްގެ ވެރިރަށް ޕެރިހުގައި މިހާރު ކުރިއަށްދާ އޮލިމްޕިކްސް ކުޅިވަރު މުބާރާތުގެ ބެޑްމިންޓަން އަންހެނުންގެ ސިންގަލްސް އިވެންޓުގައި ރާއްޖޭގެ ފާތުމަތު ނަބާހާ އަބްދުލް ރައްޒާގު ކުޅުނު ފުރަތަމަ މެޗުގައި އިންޑިޔާގެ ޕުސާލާ ވެންކަޓާ ސިންދޫ އަތުން ސީދާ ދެ ސެޓުން ނަބާހާ ބަލިވެއްޖެއެވެ.

ދުނިޔޭގެ އަންހެނުންގެ ރޭންކިންގގެ 13 ވަނައިގައި މިވަގުތު އޮތް އިންޑިއާގެ ޕުސާލާ ވެންކަޓާ ސިންދޫ އަކީ ދެފަހަރެއްގެ މަތިން އޮލިމްޕިކްސްގައި މެޑަލް ހޯދާފައިވާ ފެންވަރުގެ ގޮތުންނާއި ތަޖުރިބާގެ ގޮތުންވެސް ވަރަށް ތަފާތު މޮޅު ކުޅުންތެރިއެކެވެ.

މީގެ އިތުރުން 2019 ވަނަ އަހަރުގެ ވޯލްޑް ޗެމްޕިއަންޝިޕްގެ ރަން މެޑަލް ހޯދާފައިވާ ސިންދޫ އާއި ދެކޮޅަށް ނަބާހާ ކުޅުނު މެޗުގެ ފުރަތަމަ ސެޓު ނަބާހާ ފެށީ ވަރަށް ވަރުގަދަކޮށެވެ. އަދި މިސެޓުގެ ކުރީކޮޅު 4-4 ގެ ނަތީޖާއަކުން ދެކުޅުންތެރިން އެއްވަރުވި ނަމަވެސް ސިންދޫ ވަނީ އޭނާގެ ތަޖުރިބާ ބޭނުންކޮށް ނަތީޖާގެ ފަރަގުބޮޑުކޮށްފައެވެ. އަދި މިސެޓް ސިންދޫ ކާމިޔާބުކުރީ 11 ޕޮއިންޓްގެ ލީޑަކާއެކު 9-21ގެ ނަތީޖާއަކުންނެވެ.

މެޗުގެ ދެވަނަ ސެޓުގައި ސިންދޫ ފެނިގެންދިޔައީ މާބޮޑަށްވެސް ވަރުގަދަކޮށެވެ. އަދި މިސެޓް ފަސޭހަކަމާއެކު ސިންދޫ ކާމިޔާބުކޮށްފައިވަނީ 14 ޕޮއިންޓްގެ ފަރަގަޖާއެކު 6-21ގެ ނަތީޖާ އަކުންނެވެ. ނަމަވެސް މުޅި މެޗުގެ ކުޅުމަށް ބަލައިރު މެޗުން ބަލިވިނަމަވެސް ދުނިޔޭގެ އެންމެ މޮޅު ކުޅުންތެރިންގެ ތެރޭގައި ހިމެނޭ ސިންދޫ އާއި ދެކޮޅަށް ނަބާހާގެ ފަރާތުން ފެނިގެންދިޔައީ ވަރަށް ހިތްވަރުގަދަ އުންމީދީ ކުޅުމެކެވެ.

ޕެރިސް އޮލިމްޕިކްސްގެ ބެޑްމިންޓަން އަންހެން ޑިވިޝަންގެ ސިންގަލްސް އިވެންޓުގައި ނަބާހާ ދެން ވާދަ ކުރަން ޖެހޭނީ އެސްޓޯނިއާގެ ކްރިސްޓިން ކޫބާއާއި ދެކޮޅަށެވެ.