ޗައިނާއާ އެކު ރާއްޖެއިން އެއްބަސްވެފައިވާ ފްރީ ޓްރޭޑް އެގްރީމެންޓަށް އަމަލުކުރަން ފެށުމާއި އެކު ރާއްޖެއަށް ބޭރު ފައިސާ ލިބޭ މިންވަރު އިތުރުވާނެ ކަމަށް އިމާރާތް ކުރުމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވެއްޖެއެވެ.
ވީޓީވީގެ "ފަސް މަންޒަރު" ޕްރޮގްރާމުގައި، މިނިވަން ދުވަހުގެ ރަސްމީ ޖަލްސާގައި ރައީސް ޑރ. މުހައްމަދު މުއިއްޒު ދެއްކެވި ވާހަކަފުޅުތަކަށް އަލިއަޅުއްވާލައްވައި ވާހަކަފުޅު ދައްކަވަމުން ވަޒީރު މުއްޠަލިބް ވަނީ ރާއްޖެއަށް މިހާރު ކުރިމަތިވެފައި އޮތް އެންމެ ބޮޑު މައްސަލައަކީ، ލިބޭ މިންވަރަށް ވުރެ އިތުރަށް ބޭރު ފައިސާ ހޭދަކުރަން ޖެހުން ކަމަށާއި، ބޭރު ފައިސާ ލިބުން މަދުވުމުގެ ސަބަބުން ގިނަ ދަތިތަކާ ކުރިމަތިލާން ޖެހޭކަމަށް ވިދާޅުވެފައެވެ.
އެހެންނަމަވެސް، ، ޗައިނާއާ އެކު ވެފައިވާ ފްރީ ޓްރޭޑް އެއްބަސްވުމަށް ސެޕްޓެމްބަރު މަހު އަމަލުކުރަން ފެށުމުން، ބޭރު ފައިސާގެ މައްސަލައަށް އެކަށީގެންވާ ހައްލެއް ލިބިގެންދާނެ ކަމަށް ވަޒީރު މުއްޠަލިބް ވިދާޅުވިއެވެ. އަދި އެ އެއްބަސްވުމުގެ ދަށުން މަސްވެރިކަމާއި މަސްވެރިކަމާ ގުޅުން ހުރި އެހެން ސިނާއަތްތައް ތަރައްގީވެ، ރާއްޖެއިން ޗައިނާއަށް ޒީރޯ ޓެރިފްގައި އެއްޗެހި އެކްސްޕޯޓް ކުރެވޭނެ ކަމަށެވެ.
"ފްރީ ޓްރޭޑް އެގްރީމެންޓާ އެއްކޮށް ރާއްޖޭގެ އިތުރު ސިނާއަތްތައް، މަސްވެރިކަމާއި މަސްވެރިކަމާ ގުޅުން ހުރި އެހެން ސިނާއަތްތައް ތަރައްގީވެގެން ގޮސްފައި، ރާއްޖެއިން އެއްޗެހި ޗައިނާއަށް ޒީރޯ ޓެރިފްގައި ބޭރު ކުރެވި، ބޭރު ފައިސާ އިތުރަށް ލިބުމަށް މަގުފަހިވާނެ. އެއީ އޭގައިން ލިބޭނެ އެންމެ ބޮޑު އެއް މަންފާ."
ވަޒީރު މުއްޠަލިބް ވިދާޅުވިއެވެ.
ވަޒީރު މުއްޠަލިބް ވިދާޅުވީ، ޗައިނާގެ އިތުރުން އިންޑިއާ އާއިއެކުވެސް ފްރީ ޓްރޭޑް އެއްބަސްވުން ގާއިމް ކުރުމުގެ މަސައްކަތް ކުރިއަށް ދާކަމަށެވެ.
Advertisement
This content is created and paid for by advertisers and does not involve Voice Journalists
