މޯލްޑިވްސް ކޮލިފިކޭޝަންސް އޮތޯރިޓީ (އެމްކިއުއޭ) އިން ކްލިކް ކޮލެޖް އަދި އެވިޑް ކޮލެޖާ މެދު ގަވާއިދާ ހިލާފަށް ކޯސްތައް ހިންގުމުގެ ސަބަބުން ފިޔަވަޅު އަޅައިފިއެވެ.

އެމްކިއުއޭއިން ބުނީ އެވިޑް ކޮލެޖާ ގުޅޭ ގޮތުން ލިބުނު ޝަކުވާތަކުގެ ތެރޭގައި މުސާރަ ނުދޭ ލެކްޗަރަރުން އިމްތިހާނު ކަރުދާސްތައް މާކު ނުކުރާކަމަށް ބުނެ ހުށަހެޅުނު މައްސަލަތައް ހިމެނޭ ކަމަށާއި، މީގެ އިތުރުން ކޮލެޖުން ހިންގާ 7 ޕްރޮގްރާމެއްގައި ޕްރޮގްރާމް އެކްރެޑިޓޭޝަން ގަވާއިދާ ހިލާފު ކަންތައްތަކެއް ހުރިކަން ފާހަގަކުރެވިފައިވެއެވެ. މިގޮތުން ކޮންޓެކްޓް އަވަރސް ހަމަނުކުރުމާއި، ޕްރޮގްރާމްގެ އޮނިގަނޑަށް ބަދަލު ގެނައުމާއި، އެކަށީގެންވާ ގޮތެއްގައި ހާޒިރީ ބެލެހެއްޓިފައި ނުވުން ފަދަ މައްސަލަތައް ހުރިކަން ފާހަގަކުރެވުނު ކަމަށެވެ.

މި ސަބަބުތަކާ ހުރެ، އެވިޑް ކޮލެޖުގެ މި ޕްރޮގްރާމްތަކުގެ ސްޓޭޓަސް 6 މަސް ދުވަހުގެ މުއްދަތަށް "ކޮންޑިޝަނަލީ އެކްރެޑިޓެޑް" އަށް ބަދަލުކޮށްފައިވާ ކަމަށް އެމްކިއުއޭ އިން ބުނެފައިވެއެވެ. އަދި އައު ޕްރޮގްރާމްތަކަށް އެކްރެޑިޓޭޝަން ދޫނުކުރުމަށްވެސް ނިންމާފައިވެއެވެ.

ކްލިކް ކޮލެޖާ ގުޅޭ ގޮތުން އެމްކިއުއޭ އިން ބުނެފައިވަނީ، ކޮވިޑް-19 އާ ގުޅިގެން ދެވުނު ޚާއްޞަ ހުއްދަ ބާޠިލުކުރުމަށްފަހު ހުއްދަ ނެތި އޮންލައިން ކޯސްތައް ހިންގާފައިވާ ކަމަށެވެ. އަދި ހުއްދަ ނެތް އިތުރު އޮންލައިން ޕްރޮގްރާމްތަކެއް އިޝްތިހާރުކޮށްފައިވާ ކަމަށްވެސް ބުނެފައިވެއެވެ.

މި ސަބަބުތަކާ ހުރެ، އެކްރެޑިޓް ނުކުރެވޭ ޕްރޮގްރާމްތައް ހިންގުމުގެ ސަބަބުން ކްލިކް ކޮލެޖަށް 10،000 ރުފިޔާގެ ޖޫރިމަނާއެއް ކޮށްފައިވެއެވެ. އަދި ހުއްދަ ނެތި ހިންގާ ޕްރޮގްރާމްތައް ހުއްޓާލުމަށާއި ގަވާއިދާ ޚިލާފު ކަންކަން އިޞްލާޙުކުރުމަށް އަންގާފައިވެއެވެ. މީގެ އިތުރުން، ގަވާއިދާ ޚިލާފަށް ހިންގާފައިވާ ޕްރޮގްރާމްތަކަށް ސެޓްފިކެޓް ދޫނުކުރެވޭނެ ކަމަށްވެސް އެމްކިއުއޭ އިން ބުނެފައިވެއެވެ.

އެމްކިއުއޭ އިން މި ދެ ކޮލެޖާ މެދު ފިޔަވަޅު އަޅާފައިވަނީ އެ ދެ ކޮލެޖާ ގުޅޭ ގޮތުން ލިބުނު ޝަކުވާތަކާ ގުޅިގެން ކުރެވުނު ތަޙްޤީޤުތަކަށް ފަހުގައެވެ.

އެވިޑް ކޮލެޖުގައި މިހާރު ކިޔަވަމުންދާ ދަރިވަރުންނަށް މި ފިޔަވަޅުތަކުގެ ސަބަބުން އެއްވެސް އަސަރެއް ނުކުރާނެ ކަމަށް އެމްކިއުއޭ އިން ބުނެފައިވެއެވެ. އެހެންނަމަވެސް ކްލިކް ކޮލެޖުގެ ހުއްދަ ނެތް ޕްރޮގްރާމްތަކުގައި ބައިވެރިވެފައިވާ ދަރިވަރުންނަށް ލިބޭ ގެއްލުމަށް ކޮލެޖުން ޒިންމާ އުފުލަންޖެހޭނެ ކަމަށް ބުނެފައިވެއެވެ.

މި ދެ ކޮލެޖަށްވެސް ދިވެހިރާއްޖޭގެ ޤައުމީ ސަނަދުތަކުގެ އޮނިގަނޑާއި ޕްރޮގްރާމް އެކްރެޑިޓޭޝަން ގަވާއިދާ ޚިލާފުވެފައިވާ ކަންކަން އިޞްލާޙުކުރުމަށް އަންގާފައިވާ ކަމަށް އެމްކިއުއޭ އިން މަޢުލޫމާތު ދީފައިވެއެވެ.