މި އަހަރުގެ މިހާތަނަށް 64 ކިލޯއަށްވުރެ ގިނަ މަސްތުވާތަކެތި އަތުލައިގަނެފައިވާކަމަށް މޯލްޑިވްސް ކަސްޓަމްސް ސާވިސް އިން ހާމަކޮށްފިއެވެ.

ކަސްޓަމްސް އާއި ފުލުހުން ގުޅިގެން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ޗީފް ކަސްޓަމް އޮފިސަރު އަފްޒަލް މުހައްމަދު ވިދާޅުވީ، މިހާތަނަށް އަތުލައިގެންފައިވާ 64.84 ކިލޯ ގްރާމްގެ މަސްތުވާތަކެތީގެ މަގުމަތީ އަގު 106 މިިލިއަން ދިވެހި ރުފިޔާއަށް އަރާކަމަށެވެ.

އަފްޒަލް ވިދާޅުވީ، އޭގެ ތެރެއިން އެންމެ ގިނައިން އަތުލައިގެންފައިވަނީ ވަނީ ކެނަބިސް ކަމަށާއި އޭގެ 17.38 ކިލޯ ގްރާމް ހިމެނޭ ކަމަށެވެ. އޭގެ އިތުރުން ދެން އެންމެ ގިނައިން އަތުލައިގެންފައިވަނީ ހިރޮއިން ކަން ފާހަގަކުރައްވަމުން އަފްޒަލް ވިދާޅުވީ، 5 ކޭހަކުން 11.60 ކިލޯ ގްރާމްގެ އެ ބާވަތުގެ މަސްތުވާތަކެތި އަތުލައިގެންފައިވާކަމަށެވެ. މީގެ އިތުރުންވެސް ކަސްޓަމްސް އިން ކޮކެއިންގެ 15.64 ކިލޯ ގްރާމް ވެސް އަތުލައިގެންފައިވާ ކަމަށް އަފްޒަލް ވިދާޅުވިއެވެ.

މީގެ އިތުރުންވެސް ކަސްޓަމްސް އިން އަތުލައިގެން މަސްތުވާތަކެތި:

1) 20 ކޭހަކުން ޖުމްލަ 14.10 ކިލޯ ގްރާމްގެ ކެތިނޯން

2) 5 ކޭހަކުން ޖުމްލަ 5.64 ކިލޯ ގްރާމްގެ މެތްއެމްފަޓަމިން

3) 1.15 ކިލޯ ގްރާމްގެ އެމްޑީއެމްއޭ

4) 0.35 ކިލޯ ގްރާމްގެ އެމްފެތަމައިން

މަސްތުވާތަކެތީގެ ވިޔަފާރީކުރާ ގްރޫޕްތަކުން ދިވެހިން އާންމުކޮށް ގޮސް އުޅޭ ގައުމުތަށް ކަމުގައިވާ މެލޭޝިއާ އަދި ތައިލޭންޑް ފަދަ ގައުމުތަކުގައި ހަރަކާތްތެރިވަމުންދާކަން ފާހަގަކުރައްވަމުން އަފްޒަލް ވަނީ، މީހުން ދޭ ގޮތް ނޭނގޭ ތަކެއްޗާއި ހަވާލުވުމުގައި ވަރަށް ބޮޑަށް ސަމާލުވާން ޖެހޭ ކަމަށް ވިދާޅުވެފައެވެ.

ކަސްޓަމްސް ގެ އިތުރުން، ފުލުހުންވެސް ވަނީ މިއަހަރުގެ ފުރަތަމަ ހަ މަސް ދުވަހުގެ ތެރޭގައި  143 މިލިއަން ރުފިޔާގެ މަސްތުވާތަކެއްޗާއި ބަނގުރާ އަތުލައިގެންފައިވާ ކަމަށް ބުނެފައެވެ. އޭގެ ތެރޭގައި 130 މިލިއަން ރުފިޔާގެ މަސްތުވާތަކެއްޗާއި، 12.4 މިލިއަނަށް ރުފިޔާގެ ބަނގުރާ ހިމެނެއެވެ.

ފުލުހުން އަތުލައިގެން ތަކެތި:

1) 6،200 ބަނގުރާ ފުޅި/ ދަޅު

2) 95 ވޭޕް އަދި ކާޓްރިޖް

4) އެލްއެސްޑީ އަދި އެހެނިހެން ޕާޓީ ޑުރަގު 

5) 982 މަނާ ބޭސް 

6) 2،572،069 ދިވެހި ފައިސާ

7) 13،909 ޑޮލަރު 

8) 145 ޔޫރޯ  

ފުލުހުންގެ ޑްރަގް އެންފޯސްމެންޓް ޔުނިޓުގައި އިސްކޮށް ހުންނަވާ ސުޕްރިންޓެންޑެންޓް ނާހިދު ހުސައިން ވިދާޅުވީ، މިއަހަރުގެ ފުރަތަމަ ހަ މަސް ތެރޭގައި މަސްތުވާތަކެތީގެ އެކި މައްސަލަތަކުގައި 116 ބިދޭސީން ޑީޕޯޓް ކޮށްފައިވާކަމަށާއި، ހާމަވެގެންދިޔަ އަދަދުތަކަށް ބަލާއިރުވެސް މަސްތުވާތަކެއްޗަކީ އެންމެ ބޮޑަށް ސަމާލުކަންދީގެން މަސައްކަތް ކުރަން ޖެހިފައިވާ މައްސަލަކަން ފާހަގަކުރެވޭކަމަށެވެ.

ވައިގެ މަގުން ރާއްޖެއަށް 15 ކިލޯގެ މަސްތުވާތަކެތި އެތެރެކުރަން އުޅެނިކޮށް އަތުލައިގެންފައިވާ ކަމަށާއި، އެ މައްސަލައިގައި ދެ މީހަކު ހައްޔަރުކޮށްފައިވާކަން ވެސް މިއަދު ނޫސްވެރިންގެ ބައްދަލުވުމުގައި ވަނީ ހާމަކޮށްފައެވެ.