ފުރާންސްގެ ވެރިރަށް ޕެރިހުގައި މިހާރު ކުރިއަށްދާ އޮލިމްޕިކްސްގެ ބެޑްމިންޓަން ސިންގަލްސް އިވެންޓްގެ ގްރޫޕް ސްޓޭޖުގައި ރާއްޖޭގެ ފާތިމަތު ނާބާހާ އަބްދުރައްޒާގް ކުޅުނު ދެވަނަ މެޗުން ވެސް ބަލިވެ މުބާރާތުން ކަޓައިފިއެވެ.

މުބާރާތުގައި ނަބާހާ ކުޅުނު ފުރަތަމަ މެޗުގައި، މިވަގުތު ދުނިޔޭގެ 13 ވަނައިގައި ރޭންކް ކުރެވިފައިވާ އިންޑިޔާގެ ސިންދޫ އަތުން ސީދާ ދެ ސެޓުން ބަލިވެފައިވާއިރު، އެމެޗުގެ ސެޓްތައް ސިންދޫ ކާމިޔާބުކޮށްފައިވަނީ ފަސޭހަކަމާއެކު 21-09، 21-06 ގެ ނަތީޖައަކުންނެވެ.

މިއަދުގެ މެޗުގައި ދުނިޔޭ ރޭންކިންގެ 73 ވަނައިގައި މިވަގުތު އޮތް އެސްޓޯނީއާގެ ކްރިސްޓިން ކޫބާ އަތުން ނަބާހާ ބަލިވީ ވެސް ސީދާ ދެ ސެޓުންނެވެ.

މެޗުގެ ފުރަތަމަ ސެޓްގެ ކޮޅުގައި ނަބާހާގެ ފަރާތުން ވާދަވެރި ކުޅުމެއް ފެނިގެންދިޔައިރު، ދެ ފަހަރެއްގެ މަތިން ވަނީ ލީޑުވެސް ހޮދާފައެވެ. އަދި މެޗު އޮއެވަރު ބަދަލުވީ 5-5 އިން އެއްވަރުވި ފަހުންނެވެ. އެ ހިސާބުން ކޫބާ ވަނީ އޭނަާގެ ތަޖުރިބާ ބޭނުންކޮށް ސެޓުގެ ކޮންޓްރޯލް ހޯދާފައެވެ. އަދި ސެޓުގެ ފަހު ބައިގައި މޮޅަށް ކުޅެ، 21-07 އިން ނަތީޖާއަކުން ފުރަތަމަ ސެޓް ކާމިޔާބުކޮށްފައެވެ.

ދެވަނަ ސެޓުގައި ނަބާހާގެ ފަރާތުން ވާދަވެރި ކުޅުމެއް ފެނިގެދިޔައިރު، ދެ ފަހަރެއްގެ މަތިން ނަބާހާ ވަނީ މެޗުގެ ނަތީޖާ ވެސް އެއްވަރުކޮށްފައެވެ. ނަމަވެސް ކޫބާ ވަނީ ސެޓްގެ ފަހުބައިގައި ކުޅުން ރަނގަޅުކޮށް 21-9 ނަތީޖާއަކުން ސެޓް ކާމިޔާބުކޮށްފައެވެ. އަދި މުޅި މެޗުގައި ވެސް އެންމެ ބޮޑަށް ފާހަނގަވެގެންދިޔައީ ދެ ކުޅުންތެރިންގެ ތަޖުރިބާ ފަރަގެވެ.

މީފެ އިތުރުން މިއީ، ނަބާހާ އޮލިމްޕިކްސްގައި ވާދަކުރާ ދެވަނަ ފަހަރެވެ. އަދި އޭނާއަކީ ދެ އޮލިމްޕިކްސްއެއްގައި ރާއްޖެ ތަމުސީލުކުރި ފުރަތަމަ ބެޑްމިންޓަން ކުޅުންތެރިޔާއެވެ.