ދިރާގު ޓެކާސް ރިސޯޓް ފުޓްސަލް ކަޕު 2024 ގެ ހިމެނޭ ދ. ޒޯނުގެ ކުޅުން އަންނަ ބުރާސްފަތި ދުވަހު ފެށުމަށް ތައްޔާރުވެއްޖެ އެވެ. 

މިއަހަރު މުބަރާތުގެ ދ. ޒޯނުގައި ތިން ރިސޯޓަކުން ބައިވެރި ވެފައިވާއިރު، މިޒޯނުގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި ތިން ޓީމުގެ މެދެގައި، ލީގުޱއުސޫލުން ކޮންމެ ޓީމެއް ކޮންމެ ޓީމަކާއި އެއްމެޗު ކުޅެ އެންމެ ގިނަ ޕޮއިންޓް ހޯދާ ޓީމެއް ފައިނަލަށް ހޮވޭގިތަށެވެ.

ފައިނަލުގެ ދެވަނަ ޖާގަ ލިބިގެންދާނީ ލީގު ބުރުގެ ދެވަނަ ޓީމާއި ތިންވަނަ ޓީމުގެ މެދުގައި ސެމީ ފައިނަލް މެޗެއްކުޅެ އެމެޗުން މޮޅުވާ ޓީމަކަށެވެ. އަދި މިޒޯނުގެ ހުރިހާ މެޗެއްވެސް ކުޅުމަށް ހަމަޖެހިފައި ވަނީ ސަންސިޔާމް އިރުވެލި ރިސޯޓުގައެވެ.

Advertisement

2023 ވަނަ އަހަރު މި ޒޯނުގެ ޗެމްޕިއަންކަން ހޯދި ސެއިންޓް ރެޖިސް ވޮއްމުލި ރިޒޯޓާއި ރަނަރަޕް ކަނޑިންމަ މޯލްޑިވްސް މިއަހަރުގެ މުބާރާތުގައި ބައިވެރިވެފައި ނުވާއިރު، މިއަހަރުގެ މުބާރާތުގައި ބައިވެރިވެފައިވާ ޓީމުތަކަކީ އިރުވެލީގެ އިތުރުން ސަންސިޔާމް ވިލު ރީފް އާއި ބަގްލިއޯނީ މޯލްޑިވެސް އެވެ.

ހަތް ޒޯނަކަށް ބަހާލައިގެން ކުރިއަށް ގެންދާ މި މުބާރާތުގެ ދ. ޒޯނުގެ ޗެމްޕިއަން ޓީމު، މުބާރާޓުގެ ސެމީ ފައިނަލަށް ހޮވޭއިރު، ސެމީގައި އެޓީމު ވާދަކުރަން ޖެހޭނީ ސައުތު ކާފްގެ ޗެމްޕިއަން ހާޑްރޮކް މޯލްޑިވްސްއާ ދެކޮޅަށެވެ.

- 1 އޮގަސްޓް: ސަންސިޔާމް އިރުވެލި / ސަންސިޔާމް ވިލު ރީފް

- 2 އޮގަސްޓް: ބަގްލިއޯނީ މޯލްޑިވްސް / ސަންސިޔާމް އިރުވެލި

- 3 އޮގަސްޓް: ބަގްލިއޯނީ މޯލްޑިވްސް / ސަންސިޔާމް ވިލު ރީފް

- 5 އޮގަސްޓް: ގުރޫޕް 2 ވަނަ / ގުރޫޕް 3 ވަނަ

- 7 އޮގަސްޓް: ފައިނަލް