ރ. މީދޫ ފެންފިޔާޒުގޭ މުހައްމަދު އަނަސް މަރާލިތާ 7 އަހަރު ފުރުނު ދުވަހު، އިންސާފު ހޯދުމަށް އެދި މީދޫގެ ރައްޔިތުން އައު ގޮތަކަށް އަޑުއުފުލައިފިއެވެ. މިރޭ އަނަސް މަރާލި ވަގުތާ ދާދި އެއްވަގުތެއްގައި، 15 މިނެޓަށް މުޅި ރަށުގެ މަގުބައްތިތައް ނިއްވާލައި، މުޅި ރަށް އަނދިރިކޮށްލިއެވެ.

މި ޙަރަކާތުގެ ބޭނުމަކީ، އަނަސްގެ މަރުގެ ހިތާމަވެރި ޚަބަރާއެކު މީގެ 7 އަހަރު ކުރިން އެރޭ އެ ރަށަށް ކުރިމަތިވި ބަނަކަމާއި އަނދިރިކަން ފާހަގަކޮށް، މިއަދާ ހަމައަށްވެސް އިންސާފު ނުލިބި ރައްޔިތުން ތިބީ އެ އަނދިރިކަމުގައި ކަން ދައްކުވައިދިނުމެވެ.

މީގެ އިތުރުން، ރައްޔިތުން ވަނީ ސޯޝަލް މީޑިއާގައިވެސް އިންސާފަށް އެދި އަޑުއުފުލާފައެވެ. މި ޙަރަކާތުން ދައްކުވައިދެނީ، 7 އަހަރު ވީއިރުވެސް ރައްޔިތުންގެ ހިތްތަކުން އެ ބިރުވެރި އަދި ހިތާމަވެރި ހިނދުކޮޅު ހަނދާނުން ފިލައިގެން ގޮސްފައި ނުވާކަމެވެ.

އަނަސްގެ މަރުގެ މައްސަލައިގައި އަދިވެސް އެކަށީގެންވާ އިންސާފެއް ލިބިފައި ނުވާތީ، މީދޫގެ ރައްޔިތުން ދަނީ ތަފާތު ގޮތްގޮތުން އަޑުއުފުލަމުންނެވެ. މި ޙަރަކާތަކީ އެފަދަ މަސައްކަތްތަކުގެ ތެރެއިން އެންމެ ފަހުން ކުރެވުނު މަސައްކަތެވެ.

ރ. މީދޫ ފެންފިޔާޒުގޭ މުހައްމަދު އަނަސް މަރާލީ މާލޭ ލިޓަސް ސާވިސް ސެންޓަރު ތެރޭގައި ގުރޫޕަކުން ތޫނު ހަތިޔާރުން ހަމަލާދީ ޖުލައި 31، 2017 ގައެވެ. އަނަސްގެ މަރުގެ މައްސަލައިގައި ދައުވާ އުފުލި އެއްވެސް މީހެއްގެ މައްޗަށް ކުށް ސާބިތު ވެފައެއް ނުވެއެވެ.

ކްރިމިނަލް ކޯޓުގައި މިއަހަރުގެ ފެބުރުއަރީ މަހު 24 ގައި އޮތް އަޑުއެހުމުގައި މި މައްސަލަ ބެއްލެވި ގާޒީ އަލީ ނަދީމް ހުކުމް އިއްވަވަމުން ވިދާޅުވީ، ހެކީގެ ގޮތުގައި ހުށަހެޅި ފޮޓޯތަކާއި ވީޑިއޯ ފުޓޭޖުތަކުން ފެންނަނީ ދައުވާ އުފުލާފައިވާ މީހުން ކަން ކަށަވަރުކޮށްދޭނެ ނޫނީ އެ ކަމަށް ބާރު ދޭނެ އިތުރު ހެކި ނެތް ކަމަށެވެ. އަދި ސިއްރު ހެކިވެރިންގެ ހެކި ބަހުންނާއި، ހަބީރުންގެ ހެކިބަހުން ވެސް އެ ކަން ސާބިތު ނުވާ ކަމަށެވެ. އެހެން ކަމުން އަނަސްގެ މަރުގެ މައްސަލައިގައި ބައިވެރިވިކަމަށް ތުހުމަތުކުރެވުނު 7 މީހުންވެސް ވަނީ ސަލާމަތްވެފައެވެ.  

އެ މައްސަލައިގައި ދައުވާކޮށްފައި ވަނީ ލ. ގަން، ނަންނާރިގެ ޖުނައިހު އަބްދުﷲ އާއި ސ. ފޭދޫ ވެސްޓަންވިލާ ހަސަން މަހްފޫޒާއި ދަފްތަރު ނަމްބަރު 1746 ސިމާހު މޫސާއާއި ޅ. ކުރެންދޫ އަސަރުމާގެ އަހުމަދު ޒަޔާނާއި މ. ދިމިޝްގު އުސްމާން ޝަރީފާއި މ. ލޮނުމިދިލިގެ އަފްރާހު އަބްދުއްރައްޒާގު އަދި ތ. ކިނބިދޫ ގުލްފާމްގެ މުހައްމަދު ސާޒްގެ މައްޗަށެވެ.