މިސަރުކާރު ވެރިކަމާއި ހަވާލުވިއިރު، ފެނަކަ އިން 29 ރަށަކަށް ބިލު ނުކޮށް ފެނުގެ ހިދުމަތް ފޯރުކޮށްދީފައިވާކަމަށް އެ ކުންފުނީގެ މެނޭޖިން ޑިރެކްޓަރ މުހައްމަދު މުއާޒް ރަޝީދު ވިދާޅުވެއްޖެއެވެ.
ފެނަކައިން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން މުއާޒް ވިދާޅުވީ، އެބޭފުޅާ ކުންފުނީގެ ހިންގުމާއި ހަވާލުވެވަޑައިގެންއިރު ތަފާތު އެކި ސަބަބުތަކާހުރެ 29 ރަށަކަށް ބިލްނުކޮށް ފެން ފޯރުކޮށްދެމުންދިޔަ ކަމަށެވެ.
"އަޅުގަނޑުމެން އައިސް ބަލާލިއިރުގައި 29 ރަށަށް ފެން ފޯރުކޮށްދެނީ ބިލްނުކޮށް. ތަފާތު ސަބަބުތަކަކާހުރެ،"
މުއާޒް ވިދާޅުވިއެވެ.
މުއާޒް ވިދާޅުވީ، ފެން ފޯރުކޮށްދިނުމަށް ފައިސާ ބޭނުންވާކަމަށާއި، މިފަދައިން ބިލު ނުކޮށް ފެން ފޯރުކޮށްދިނުމުގެ ސަބަބުން ވަރަށް ބޮޑު ގެއްލުމަކާއި ކުރިމަތިލާން ޖެހިފައިވާ ކަމަށެވެ.
ޔުޓިލިޓީ ރެގިއުލޭޝަން އޮތޯރިޓީ (ޔޫއާރްއޭ) އާއެކު ކުރި މަސައްކަތްތަކުން ލައިސަންސް ނުދޭ ރަށްރަށަށް ބިލް ނުކުރެވޭކަން ފާހަގަވެފައިވާ ކަމަށާއި، ލައިސަންސް ނުދެނީ ފުރިހަމަ ކުރަންޖެހޭ ކަންތައްތަކާއި ލިޔުންތައް ފުރިހަމަވެފައި ނެތުމުން ކަމަށް ވެސް މުއާޒް ވިދާޅުވިއެވެ.
އޭގެ ތެރޭގައި އަމިއްލަ ކުންފުނިތައް މެދުވެރިކޮށް އާރްއޯ ޕްލާންޓްގެ މަސައްކަތްކޮށް ކޮންޓްރެކްޓަރުގެ ފަރާތުން ލިބެންޖެހޭ ލިޔުންތައް ނުލިބި ޔޫއާރްއޭ އަށް ހުށަނޭޅޭތީ ބިލް ނުކުރެވޭ ކަމަށާއި، މި ހުރިހާ ހަރަދެއް ފެނަކައިން ބަލާއިރު، އެތަންތަނަށް ބިލް ނުކުރެވުނަސް ފެން ފޯރުކޮށްދޭން ޖެހޭ ކަމަށެވެ.
ބިލް ނުކޮށް ފެނުގެ ހިދުމަތް ދީފައިވާ ރަށްތަކުގައި ހައްދެއް ނެތް މިންވަރަށް ބައެއް ފަރާތްތަކުން ފެނުގެ ހިދުމަތް ބޭނުންކޮށްފައިވާ ކަންވެސް މުއާޒް ވަނީ ފާހަގަކޮށްފައެވެ.
Advertisement
This content is created and paid for by advertisers and does not involve Voice Journalists
