"މޯލްޑިވްސް ސެންޓަރ ފޯ ޕޮލިސީ ސްޓަޑީޒް" ނަމުގައި ދިރާސާކުރާނެ މަރުކަޒެއް ޤާއިމްކުރުމަށް ނިންމެވީ، ވަރަށް މުހިއްމު މަޤްސަދެއްގައި ކަމަށާއި، ޤައުމުގައި ހުރި މައްސަލަތައް ދިރާސާކުރުމަށް މިފަދަ މަރުކަޒެއްގެ މުހިއްމުކަން ވަރަށްބޮޑުކަމަށް، ޕޮލިސީ ސްޓަޑީޒްގެ ކަންކަމުގައި އެންމެ އިސްކޮށް ހަރަކާތްތެރިވެ ވަޑައިގަންނަވާ ކުރީގެ ރައީސް ޑރ.މުހައްމަދު ވަހީދު ހަސަންމަނިކު ވިދާޅުވެއްޖެއެވެ.

ދިވެހި ޤައުމު ހިންގުމުގައި މީގެ ކުރިން ވަރަށް އިސް ދައުރެއް އަދާކުރެއްވި ބޭފުޅުންތަކެއް ހިއްސާވެގެން ވަނީ، "މޯލްޑިވްސް ސެންޓަރ ފޯ ޕޮލިސީ ސްޓަޑީޒް"ނަމުގައި ދިރާސާކުރާ ހާއްސަ މަރުކަޒެއް ޤާއިމްކުރުމަށް ނިންމަވާފައެވެ.

މި މަރުކަޒު އުފެއްދުމުގެ މަޤްސަދަކީ, ދިވެހިރާއްޖޭގެ ޤައުމީ ތަރައްޤީއަށް އަސަރުކުރާނޭ ނުވަތަ އަސަރުކޮށްފާނޭ، ބައިނަލްއަޤްވާމީ އަދި ޤައުމީ ފެންވަރުގެ ސިޔާސަތުތަކާއި މައްސަލަތަކާއި ބެހޭގޮތުން އަމިއްލައަށް އިސްނެގުމުގައި އިލްމީ އަދި ފަންނީ ދިރާސާއާއި، ތަހްލީލްކޮށް އެކަންކަމުގެ ތެރެއިން ދިވެހިރާއްޖޭގެ ޤައުމީ ތަރައްޤީއަށް ބޭނުންވާނޭ ސިޔާސަތުތައް ކަނޑައެޅުމަށް އެހީތެރިވުމެވެ. މީގެ އިތުރުން ތަފާސްހިސާބާއި ހެއްކަށް ބިނާވެ  ސިޔާސަތު ކަނޑައެޅުމަށް އެހީތެރިވެދޭނެ ޕްލެޓްފޯމެއް ޤާއިމްކުރުމެވެ.

މި ދިރާސާ މަރުކަޒުގެ މުހިއްމު ކަމާއި ބެހޭގޮތުން ވާހަކަދައްކަވަމުން މިކަމުގައި އެންމެ އިސްކޮސް ހަރަކާތްތެރިވެ ވަޑައިގަންނަވާ ކުރީގެ ރައީސް، ޑރ.މުހައްމަދު ވަހީދު ހަސަންމަނިކު ވިދާޅުވީ، ކޮންމެ ޤައުމެއްގައިވެސް ކޮންމެ މުޖުތަމައުގައިވެސް ކިޔަވައިގެންތިބި މީހުންގެ ވަރަށްބޮޑު މައްސޫލިއްޔަތެއް އޮންނަކަމަށާއި، މިފަދަ ކަމެއް ކުރުމަށް ނިންމި މައިގަނޑު ސަބަބަކީ އެއީ ކަމަށެވެ.

އެމީހުންނަކީ މުޖުތަމައުގައި ހިނގަމުންދާ ކަންތައްތައް ބަލަހައްޓައިގެން ތިބޭ ބަޔަކަށް ވެގެން ނުވާނެ ކަމަށާއި، މުޖުތަމައު ކުރިއެރުވުމަށްޓަކައި ހާއްސަ ގޮތެއްގައި މުޖުތަމައުގައި އިޖުތިމާއީ އަދާލަތު ކުރިއެރުވުމަށާއި އިންސާނީ ހައްގުތަށް ދެމެހެއްޓުމަށްޓަކައި، އެންމެންގެ މެދުގައި ހަމަހަމަކަން ހިފެހެއްޓުމުގައި ކުރަންޖެހޭ މަސައްކަތްތައް ކުރުމަށް ކިޔަވައިގެންތިބޭ މީހުން އަދާކުރަންޖެހޭ ދައުރާއި އެމީހުންގެ ޒިންމާ ބޮޑުކަމަށެވެ.

މި ދިރާސާ މަރުކަޒުގެ މަސައްކަތްތަކާ ބެހޭގޮތުން ވާހަކަދައްކަވަމުން މިކަމުގައި އެންމެ އިސްކޮށް އުޅުއްވާ އަދި ކުރީގެ ބަންޑާރަ ނައިބު އާއިޝަތު އާޒިމާ ޝަކޫރު ވިދާޅުވީ، ޕޮލިސީ ސްޓަޑީޒް ސެންޓަރު ރަޖިސްޓްރީކުރުމުގެ މަސައްކަތް މިހާރު ނިމިފައިވާކަމަށާއި، މިގޮތުން މިހާރު ދިވެހިރާއްޖޭގެ ދުސްތޫރީ އޮނިގަނޑު މުރާޖައާކުރުމުގެ މަސައްކަތް މިހާރު ފެށިފައިވާކަމަށެވެ. ރާއްޖޭގެ ދުސްތޫރީ ހަޔާތުގައި 2008 ވަނަ އަހަރު އެކުލަވާލި ފެހި ޤާނޫނު އަސާސީއަށް އަމަލުކުރަމުން އަންނަތާ މިހާރު ވަނީ 16 އަހަރު ފުރިފައެވެ.

އާޒިމާ ވިދާޅުވީ މާދަމާ ރޭ އެ މަސައްކަތް ފެށިކަން ރަސްމީކޮށް ލޯންޗް ކުރުމަށް ނިންމާފައިވާކަމަށާއި، އެބޭފުޅުންގެ މުޅި މަސައްކަތް ބިނާވެގެންވަނީ އިލްމީ މަސައްކަތަކަށް ކަމަށެވެ.

މޯލްޑިވްސް ސެންޓަރ ފޯ ޕޮލިސީ ސްޓަޑީޒް (އެމްސީޕީއެސް)ގެ މުއައްސިސުން ވިދާޅުވީ ޤައުމީ މަސްލަހަތު ހިމެނޭ އެކިއެކި ދާއިރާތަކުގެ މައްސަލަތަކަށް ބިނާކޮށް ކުރެވޭ އިލްމީ ދިރާސާތަކާއި ފަންނީ ލަފާ އަދި ބޭނުންތެރި ސައްހަ މައުލޫމާތުތައް ކިޔަވާކުދިންނަށާއި، ނޫސްވެރިންނަށާއި، ދައުލަތުގެ މުއައްސަސާތަކަށާއި، މިފަދަ ކަންކަމަށް ޝައުގުހުންނަ ހުރިހާ ދިވެހިންނަށާއި ބޭރުގެ އެކި މުއައްސަސާތަކަށް ފޯރުކޮށްދިނުމަކީވެސް މި މަސައްކަތްތަކުގެ ވަރަށްމުހިއްމު މަޤްސަދެއް ކަމަށެވެ. އެހެންކަމުން މި މަސައްކަތްތައް ކުރިއަށްގެންދެވޭނީ ކަމާއި ގުޅުންހުރި ފަރާތްތަކުގެ ބައިވެރިވުމާއެކުގައިކަންވެސް އެބޭފުޅުން ވަނީ ފާހަގަކުރައްވާފައެވެ.

ޕަބްލިކް ޕޮލިސީ ދިރާސާ ކުރާ މުއައްސަސާތަކަކީ ދުނިޔޭގެ ހުރިހާ ހިސާބެއްގައިވެސް ޤާއިމްކުރެވިފައިވާ އިލްމީ އަދި ފަންނީ މަސައްކަތްކުރާ މުއައްސަސާތަކެކެވެ. މި  ދިރާސާކުރާ މަރުކަޒުތަކުން ކުރާ ދިރާސާތަކާއި އެއްކުރާ މައުލޫމާތުތަކާއި އާންމުކުރާ ލަފާތަކަކީ، ޤައުމުތަކުގެ ތަރައްޤީގެ ކުރި އަދި ދިގު ރާސްތާގެ ސިޔާސަތުތައް ކަނޑައެޅުމުގައި ބޭނުންކުރާ މައުލޫމާތާއި ފަންނީ ލަފާކަން ފާހަގަކޮށްލެވެއެވެ.