20 ޕްރެޒިޑެންޓްސް ކަޕްގެ ފައިނަލުގައި ވާދަވެރި ކުޅުމަކަށްފަހު އެއް ލަނޑުގެ ތަފާތަކުން އެންމެ ފަހުގެ ޗެންޕިއަން މިލާން ކްރިކެޓް އެކެޑަމީ ބަލިކޮށް މުބާރާތުގެ ޗެންޕިއަންކަން ސީބީއެލް އިން ދެވަނަ ފަހަރަށް ކާމިޔާބުކޮށްފިއެވެ.

ޓީ20 ޕްރިމިއާ ލީގުގެ ގަދަ ހަތަރު ޓީމުގެ މެދުގައި 2022 ވަނަ އަހަރު ބާއްވަން ފެށި މިމުބާރާތް 2022 ވަނަ އަހަރު ސީބީއެލް އިން ކާމިޔާބުކުރީ ފައިނަލުގައި މާލޭ ސްޕޯޓްސް ކްލަބް ބަލިކުރުމަށްފަހު އެވެ. އަދި މީގެ އިތުރުން މިދިޔަ އަހަރު މުބާރާތުގެ ޗެމްޕިއަންކަން، މިލާން ކްރިކެޓް އެެކެޑަމީން ހޯދީ ފައިނަލުގައި މާލޭ ވެޓަރަންސް ބަލިކުރުމަށްފަހުއެވެ.

ކުޅިވަރު އެކުވެނި ކްރިކެޓް ދަނޑުގައި ހޮނިހިރު ދުވަހު މެންދުރު ފަހު ކުޅުނު ފޯރިގަދަ ފައިނަލް މެޗުގެ، ޓޮސް ދިމާވުމުން ސީބީއެލް އިން ނިންމީ ކުޅެން އަރާށެވެ. އެ ގޮތުން، ކުޅެންއަރައި އެޓީމުން 20 އޯވަރުގެ ތެރޭގައި އަށް ކުޅުންތެރިން ނުބައިވެގެން، 167 ލަނޑު ހެދިއިރު، އެ ޓީމުން އެންމެ ރަނގަޅު ކުޅުމެއް ދެއްކީ، 33 ބޯޅައިން 56 ލަނޑު ހެދި ކައުޝަލް ރޮޑްރީގޯ އަދި 35 ބޯޅައިން 36 ލަނޑު ހެދި ސަމިތާ ފެނާންޑޯއެވެ. މީގެ އިތުރުން މި އިނިންގްސްގައި، މިލާން ކްރިކެޓް އެކެޑަމީގެ އިސްމާއިލް ނަޒްވާން ވަނީ ތިން ވިކެޓް ނަގައިފަ އެވެ.

Advertisement

ޖަވާބުގައި ކުޅެން ނުކުމެ، މިލާނަށް 20 އޯވަރު ހަމަވިއިރު، ނުވަ ކުޅުންތެރިން ނުބައިވެގެން ހެދުނީ، 166 ލަނޑެވެ. އަދި އެޓީމުން އެންމެ ރަނގަޅަށް ކުޅުނީ، މުބާރާތުގައި އެންމެ ގިނަ ލަނޑު ހެދި، ޔޫސުފް އަޒްޔާން އެވެ.

އަޒްޔާން މިމެޗުގައި، 38 ބޯޅައިން 63 ލަނޑު ހެދިއިރު، އެޓީމުގެ އަހުމަދު ހަސަން ވަނީ 41 ބޯޅައިން 41 ލަނޑު ހަދާފައެވެ. އަދި މިމެޗުގައި އަޒްޔާން ވަނީ އަށް ފަހަރު ހަތަރަކަށް ޖެހުމުގެ އިތުރުން ދެ ފަހަރު ހަޔަކަށް ޖަހާފައެވެ. މީގެ އިތުރުން މިއިނިންސްގައި ސީބީއެލް މަލިތު ޑި ސިލްވާ ހަތަރު އޯވަރަށް ހަތަރު ވިކެޓް ނެގިއިރު، މެޗުގެ މޮޅު ކުޅުންތެރިއަކަށް ހޮވުނު އެޓީމުގެ ހަރްޝާ އަމަރްސިންހޭ ވަނީ ތިން ވިކެޓް ނަގާފައެވެ.