ކުރީގެ ރައީސް ޔާމީން އަބްދުލްޤައްޔޫމް އަދުގެ ސަރުކާރާ ދުރަށްޖެހިވަޑައިގެންނެވީ ވެރިކަމުގެ ޢިއްޒަތާ ލައްޒަތަށް، އޮތް ދަހިވެތިކަމަކުން ކަމަށް ވިދާޅުވެ، މަޖިލީހުގެ ރައީސް އަދި ޕީއެންސީގެ ޗެއާޕާސަން އަބްދުއްރަޙީމް އަބްދުالله ޔާމީނަށް ބަހުގެ ހޫނު ހަމަލާތަކެއް އަމާޒުކުރައްވައިފިއެވެ.
ބުރާސްފަތި ދުވަހުގެރޭ އޮތް ޕީއެންއެފްގެ ފްރޮންޓް އޮފީސް ޖަލްސާގައި ވާހަކަ ދައްކަވަމުން ޔާމީން ވަނީ، އެމަނިކުފާނު މި ސަރުކާރާ ދުރަށްޖެހިވަޑައިގެންނެވީ ސަރުކާރުން ހަދާ ގޯސްތައް ހަޖަމުނުވެގެން ކަމަަށް ވިދާޅުވެފައެވެ.
އެކަމަށް ރައްދުދެއްވައި އިއްޔެ އެކްސްގައި ކުރެއްވި ޕޯސްޓެއްގައި އަބްދުއްރަޙީމް ވަނީ، ޔާމީނގެ ބަސްފުޅަށް ރައްޔިތުން ހެއްލިދާނެކަމަށް ހީކުރައްވައި މާމޮޅު ވާހަކަ ދައްކަވަން ނޫޅުއްވުމަށް ދަންނަވާފައެވެ.
ސަރުކާރާ ދުރަށްޖެހުނީ ތިމާގެ ހުރި ބޮޑާކަމާ ކިބުރުވެރިކަމެއްގެ ބޮޑުކަމުންތިމާނޫން އެހެން ބޭފުޅަކު ވެރިކަން ކުރައްވާ މަންޒަރު ބަލަން ލަގޮނޑިއަށް ކެތްނުވެގެން. ވެރިކަމުގެ ޢިއްޒަތާ ލައްޒަތަށް އޮތް ދަހިވެތިކަމަކުން. މިކަން ވަކީންބޮޑަށް މިއަދު ރައްޔިތުނަށް ޔަގީންވަނީ ސިޔާސީގޮތުން ފެއިލްވެފައި ތިބި ދެތިން މީހުން ގޮވައިގެން ތިޔަޖަހާ ހަޑިހުތުރު މުޑުދާރު ސަކަރާތުން.
ވެރިކަން ކުރާ ޕީއެންސީގެ ލީޑާޝިޕާ ދުރަށް ޖެހިވަޑައިގެން އުފެއްދެވި އަމިއްލަ ޕާޓީ، ޕީއެންއެފްގެ ޖަލްސާއެއްގައި ވާހަކަ ދައްކަވަމުން ޔާމީން ވިދާޅުވި ގޮތުގައި ރައީސް މުހައްމަދު މުއިއްޒުގެ ސަރުކާރާ ދުރުވެގެން އުޅުއްވަނީ ކޮންމެހެން އިދިކޮޅު ޕާޓީއަކަށް ވެގެންނެއް ނޫނެވެ. އެކަމަކު ބޮޑެތި ގޯސްތަކެއް ހަދަމުންދާތީ، އެކަން ހަޖަމްކުރައްވަން އުނދަގޫވެވަޑައިގެން އަދި އެކަންކަން ދިފާއު ކުރައްވަން ބޭނުންވެ ވަޑައިނުގަންނަވާތީ ކަމަށް އެ މަނިކުފާނު ވިދާޅުވި އެވެ.
"އެ ކުރާ ކަންކަން ދިފާއު ކުރުމަށް، ސަރުކާރުގެ ބައިވެރިންގެ ގޮތުގައި އަޅުގަނޑުމެން ތިބޭކަށް ބޭނުމެއް ނޫން. ހަމަ އެހެންވެ އަޅުގަނޑުމެން [ސަރުކާރާ] ދުރުވީ،" ޔާމީން ވިދާޅުވި އެވެ.
Advertisement
This content is created and paid for by advertisers and does not involve Voice Journalists
