މާލެ އަތޮޅުގައި ހިމެނޭ ބޮޑު ދެ ތިލަކަމަށްވާ ބޮޑުހިތި ތިލަ އާއި އޮއްކޮބޭ ތިލަ ސަރުކާރުން ހިމާޔަތްކޮށްފި އެވެ.

 ގުދުރަތީ ރީތިކަމާއި މުއްސަނދިކަން ލިބިފައިވާ މި ތިލަ އަކީ ފަތުރުވެރިންގެ މެދުގައިވެސް މަގުބޫލު ތަނަކަށްވާއިރު، މިތަން ހިމާޔަތްކޮށް ތިމާވެއްޓާއި ހަކަތައާއި ބެހޭ ވުޒާރާއިން ގެޒެޓް ކުރި ލިޔުމުގައި ބުނީ، މި ދެ ތިލަ ހިމާޔަތްކުރީ ގުޅިފަޅު ހިއްކުމަށްޓަކައި ހިންގާ ޕްރޮޖެކްޓުގެ ތެރެއިން ކުރިއަށް ގެންދާ ބަޔޯޑައިވާސިޓީ އޮފްސެޓް ޕްލޭން ނުވަތަ އެ ޕްރޮޖެކްޓުގެ ސަބަބުން ތިމާވެއްޓަށް ލިބޭ ގެއްލުމުގެ ބަދަލުގެ ގޮތުގައި ހިންގާ ޕްލޭންގެ ދަށުންކަމަށެވެ.

މާލެ އަތޮޅުގެ ހުޅަނގު ފަރާތުގައި އޮންނަ 127.47 ހެކްޓަރުގެ ސަރަހައްދެއްގައި އޮންނަ ބޮޑިހިތި ތިލައަކީ ކ. ރަސްފަރި އާއި ކ. އުލާނީ ފަޅާއި ދޭތެރޭގައިވާ ކަނޑުއޮޅި މެދުގައިވާ ތިލައެކެވެ.

ގިނަ އަދަދެއްގެ މުރަކައާއި ފަރުމަސް އުޅޭ މި ތިލައިން ގާނޫނީ ގޮތުން ހިމާޔަތްކޮށްފައިވާ އަދި ދުނިޔެއިން ނެތިގެން ދިއުމުގެ ބިރުހީވެފައިވާ މާހުޅުނބުލަނޑާ، އެންމަޑި، ކަހަނބު، ވައްބޯ މިޔަރު، ކައްޓަފުޅި މިޔަރު އަދި ފީ މިޔަރު ވެސް ފެންނަ ކަމަށް ތިމާވެއްޓާއި ބެހޭ ވުޒާރާއިން ވަނީ ހާމަކޮށްފައެވެ.

ބޮޑުހިތި ތިލަ-- ފޮޓޯ: މިނިސްޓްރީ

އެ ވުޒާރާއިން ބުނީ، މި ސަރަހައްދަކީ އިރުވައި މޫސުމުގައި ގިނަ އަދަދެއްގެ އެންމަޑި ސާފުވުމަށް އެއްވެ އުޅޭ ސަރަހައްދެއް ކަމަށް ރެކޯޑް ކުރެވިފައިވާ ސަރަހައްދެއްކަމަށާއި، މި ސަރަހައްދަށް ދިވެހިންނާއި ޓޫރިސްޓުން ވަރަށް ގިނައިން ފީނަންވެސް ދާ ކަމަށެވެ.

 މާލެ އަތޮޅުގެ އިރުމަތީ ފަރާތުގައި އޮންނަ 379.31 ހެކްޓަރުގެ ބޮޑު ސަރަހައްދެއްގައި އޮންނަ،  ފީނާ މީހުންގެ މެދުގައި މަގުބޫލު، މި ތިލައިގައި ގިނަ އަދަދެއްގެ ކުދި ހޮހަޅަ އާއި "އޯވާހޭންގްސް" ހެދިފައިވާ ދިރޭ މުރަކައިގެ ޕަސެންޓު ބޮޑުއިރު، އެކި ބާވަތްތަކުގެ ފަރުމަހާއި މުރަކަ އާއީ ގަލާ އަދި އެކި ކުލަކުލައިގެ "ސޮފްޓް ކޮރަލް" އެ ސަރަހައްދުން ވަނީ ފެނިފައެވެ.

އޮއްކޮބޭ ތިލަ-- ފޮޓޯ: މިނިސްޓްރީ

މި ތިލަ ހިމާޔަތްކޮށް، ތިމާވެއްޓާއި ބެހޭ ވުޒާރާއިން ބުނީ، މި ސަރަހައްދުގައި ކޮށްފައިވާ ދިރާސާތަކުން ދައްކާ ގޮތުގައި އެ ސަރަހައްދުން 73 ބާވަތުގެ މަސް ދިރިއުޅޭ ކަމަށް ދައްކާ ކަމަށާއި، މި ތިލައިން ނެތި ދިއުމުގެ ބިރުހީވެފައިވާ ދިރުންތައް ކަމަށްވާ ވައްބޯ މިޔަރު، އޮޅުފަތި މިޔަރު، މާހުޅުނބު ލަނޑާ އަދި ކަހަނބު ވެސް އެ ސަރަހައްދުން ފެންނަ ކަމަށް ރެކޯޑު ކުރެވިފައިވާ ކަމަށެވެ.

މި ދެ ތިލައިގައި ކުރުން މަނާ ކަންތައްތައް އެ ވުޒާރާއިން ވަނީ ހާމަކޮށްފައެވެ. އެއީ:

1) ތެޔޮ، ގޭސް ނުވަތަ އެއްވެސް ބާވަތެއްގެ މައުދަނެއް ހޯދުމަށް ދިރާސާކުރުމާއި މައިންކުރުން.

2) އެއްވެސް ބާވަތެއްގެ ކުނި އެޅުން.

3) ބިން ހިއްކުމާއި ފަޅު ފުންކުރުން.

4) ގަލާއި ވެއްޔާއި މުރަކަ އަދި އަކިރި ނެގުން.

5) ނަގިލި ލުން.

6) އުމްރާނީ ތަރައްގީގެ މަސައްކަތެއް ނުވަތަ އިންފްރާސްޓްރަކްޗާ ގާއިމްކުރުން.

7) އެއްވެސް "ޕޮލިއުޓެންޓެއް" ދޫކުރުން ނުވަތަ ބޭރުވާ ގޮތަށް އައުޓްފޯލް ބެހެއްޓުން.

8) އެކުއާކަލްޗާ ނުވަތަ މެރިކަލްޗާގެ މަސައްކަތްކުރުން.

9) ދެމެހެއްޓެނިވި ގޮތެއްގައި ކުރާ އެންވެރިކަން ފިޔަވައި އެއްވެސް އެއްޗެއް ނުވަތަ ދިރުމެއް ނެގުމާއި މެރުމާއި ގޯނާކުރުމާއި ހިފުން.

10) އެއްވެސް ދިރުމެއްގެ ބިސް ނެގުން ނުވަތަ ހާއްޔަށް ގެއްލުން ދިނުން.

11) އެއްވެސް ބާވަތެއްގެ ދިރުމެއް ތައާރަފުކުރުން.

12) މަސްމަހާމެއްސާއި ދޫނިސޫފާސޫފި ހިމެނޭ ގޮތަށް އެއްވެސް ދިރޭ އެއްޗަކަށް ކާން ދިނުން ނުވަތަ ކާން އެޅުން.

13) އެ ސަރަހައްދު އަލިވާގޮތަށް ރޭގަނޑު ދިއްލުން.

14) އެތަނުގައިވާ ދިރުންތަކުގެ އާދަކާދައަށް ބުރޫއަރާގޮތަށް އަޑުގަދަކުރުން.

15) ރާއްޖޭގެ އެމުގެ ގޮތުގައި ބޭނުންކުރާ މަސް ފިޔަވައި އެހެން އެއްވެސް ބާވަތެއްގެ ކުދި މަސް ހިފުން. (އޭގެ ތެރޭގައި އެކުއޭރިއަމްތަކާއި ޓޭންކްތަކުގައި ގެންގުޅޭ މަހާއ، ފަރުމަހުގެ ހުރިހާ ބާވަތެއްގެ "ޖުވެނައިލް" މަސް ހިމެނެ އެވެ.)

16) ދިއްލައިގެން ރޭގަނޑު މަސް ތިލަކުރުން. (މީގެތެރޭގައި މަސްވެރިކަމުގެ ގާނޫނުގެ ދަށުން މަސްވެރިކަމާއި އަތުނަނުގެ ބޮޑު ކަންނެލީގެ މަސްވެރިކަމަށް ދޫކޮށްފައިވާ ސައްހަ ލައިސަންސެއް އޮތް އުޅަނދަކުން ދިއްލައިގެން އެންވެރިކަން ކުރުން އިސްތިސްނާ ވާނެ އެވެ.)

އެހެންނަމަވެސް، ކަނޑައެޅިފައިވާ އުސޫލުގެ ދަށުން، މި ސަރަހައްދުތަކަށް ޒިޔާރަތްކުރުމާއި ދިރާސާ ކުރުމާއި ރީސްޓޮރޭޝަން ނުވަތަ ރީހެބިލިޓޭޝަންގެ ބޭނުމަށް މަސައްކަތްކުރުމުގެ ހުއްދަ ދޭނެ ކަމަށް އެ ވުޒާރާއިން ހާމަކުރެއެވެ.