ބަންގްލަދޭޝްގެ ބޮޑުވަޒީރު، ޝައިޚް ހަސީނާގެ އިސްތިއުފާއަށް ގޮވާލައި، އެގައުމުގައި ކުރަމުންދާ މުޒާހަރާތަކާއި ގުޅިގެން މިހާތަނަށް 20 އަށް ވުރެ މީހުން މަރުވެއްޖެއެވެ.

މި މުޒާހަރާގެ ތެރެއިން ބަންގްލަދޭޝްގެ ފުލުހުން ކަރުނަ ގޭހާއި ގްރެނޭޑްސް ފަދަ ބާރުގެ ތަކެތި ބޭނުން ކުރަމުން އަންނައިރު، އެ ގައުމުގެ ސަރުކާރުން ވަނީ ކާފިއު އިއުލާނު ކުރާނެކަން ވެސް ހާމަކޮށްފައެވެ.

މި ސަރުކާރު ވެރިކަމުން ފައިބަންދެން މުޒާހަރާކުރިއަށްދާނެ ކަމަށް މުޒާހަރާގެ ބައިވެރިން ބުނަމުން އަންނައިރު، ސަރުކާރަށް ތާއީދު ކުރާ ފަރާތްތަކާއި މުޒާހަރާ ކުރާ މީހުންނާއި ދެމެދުވެސް ވަނީ ހަމަނުޖެހުންތަކެއް ހިނގާފައެވެ.

ބަންގްލަދޭޝްގެ އެކި ކަންކޮޅުތަކުގައި ކުރަމުން އަންނަ މި މުޒާހަރާތަކުގައި ބައިވެރިން އަންނަނީ ސަރުކާރަށް އެއްބާރުލުން ނުދިނުމަށާއި، ޓެކްސް ނުދެއްކުމަށާއި، އޮފީސްތަކުގެ މުއައްޒަފުން ވަޒީފާއަށް ނުނިކުތުމަށް ވެސް ގޮވާލަމުންނެވެ.

މީގެ އިތުރުންވެސް، މުޒާހަރާގެ ބައިވެރިން އެގައުމުގެ ޝަހުބާގް ސަރަހައްދުގައި ހުންނަ ބޮޑު ޕަބްލިކް ހޮސްޕިޓަލެއް ކަމަށްވާ ބަންގަބަންދޫ ޝެއިޚް މުޖީބް މެޑިކަލް ޔުނިވާސިޓީއަށް ވެސް ހަމަލާދީ އެތައް އުޅަނދެއް އަންދާލާފައިވާއިރު، އެމީހުން ވަނީ ބައެއް ގެތަކަށް އަމާޒުކޮށް ހަމަލާދީފައެވެ.

ބަންގްލަދޭޝްގައި މި މުޒާހަރާތައް ފެށިގެން އައީ، ބަންގްލަދޭޝްގެ މިނިވަން ކަމަށް ކުރި ހަނގުރާމައިގެ ބައިވެރިންގެ ޢާއިލާތަކަށް ސަރުކާރު ވަޒީފާތަކުގެ 30 އިންސައްތަ ޚާއްޞަ ކުރުމަށް އެ ޤައުމުގެ ހައި ކޯޓުން ހުކުމް ކުރުމާ ގުޅިގެންނެވެ.

އެގައުމުގެ ހައި ކޯޓުގެ މި ނިންމުމާއިއެކު، ވަކި ބަޔަކަށް ހާއްސަކޮށްފައިވާ ވަޒީފާތަކުގެ ނިސްބަތް 50 އިންސައްތައަށް ވުރެ އިތުރުވިއިރު، ފަހުން ކޯޓުން ވަނީ ނިންމުން ބާތިލްވެސް ކޮށްފައެވެ. އެހެންނަމަވެސް، އޭގެ ފަހުންވެސް މުޒާހަރާތަކަށް ނިމުމެއް އައިސްފައެއް ނުވެއެވެ.

ބަންގްލަދޭޝްގެ ސަރުކާރާއި ދެކޮޅަށް ކުރާ މުޒާހަރާތައް ފުޅާވެ، މި މުޒާހަރާތަކުގައި މިހާތަނަށް 11,000 މީހުން ވަނީ ހައްޔަރުކޮށްފައެވެ.