މޯލްޑިވް ގޭހުގެ ކުރީގެ މެނޭޖިންގ ޑިރެކްޓަރު ޢަބްދުﷲ މައުމޫނުގެ މައްޗަށް އުފުލާފައިވާ މަނީ ލޯންޑަރކުރުމުގެ މައްސަލަ، އަނެއްކާވެސް ފުލުހުން ބަލަން ފަށައިފިކަމަށް ފުލުހުން ބުނެފިއެވެ.

މާނުގެ މައްޗަށް ކޮށްފައިވާ މަނީ ލޯންޑަރިންގެ މައްސަލަ އަލުން ބަލާކަން ފުލުހުން ވަނީ ޔަގީންކޮށްދީފައެވެ. މާނުގެ މައްސަލަ ބަލަމުން އަންނަކަން ފުލުހުން އަލުން ބުނެފައިމިވަނީ ގިނަ އަހަރުތަކެއްވަންދެން ރާއްޖެއިން ބޭރުގައި ހުންނެވުމަށްފަހު މާނު ރާއްޖެ އައިސްފައިވަނިކޮށެވެ.

މޯލްޑިވް ގޭސްގެ އެމްޑީގެ މަގާމުގައި މާނު ހުރި ދުވަސްވަރު އެކުންފުންޏަށް ބޭނުންވާ ކައްކާ ގޭސް (އެލްޕީޖީ) ބޭރުގެ ކުންފުންޏަކުން ހޯދުމުގެ މުޢާމަލާތުގެ ތެރޭގައި ރިޝްވަތުގެ ގޮތުގައި އެ ކުންފުނިން ޖުމްލަ 3,106,189.38 ނަގާފައިވާ މައްސަލައެއް ފުލުހުން ދަނީ ބަލަމުންނެވެ. މި މައްސަލަ އޭސީސީން ތަހުގީގުކޮށް ނިންމައި އުސޫލުން ބޭރުން ނަގާފައިވާ 3.1 މިލިއަން ރުފިޔާ އަނބުރާ ދެއްކުަމށް އޭސީސީން ވަނީ އޭނާއަށް އަންގާފައެވެ.

މި މައްސަލައާ ގުޅޭގޮތުން އޭސީސީން ބުނެފައިވަނީ ރިޝްވަތުގެ ގޮތުގައި ލިބުނު އެ ފައިސާ މާނުއާ ގުޅުން އޮންނަކަމަށް ތުހުމަތު ކުރެވޭ އަދި އޭނާގެ ޢާއިލީ ބައެއް ފަރާތްތަކާއި ގުޅުން އޮންނަކަމަށް ތުހުމަތުކުރެވޭ ބައެއް ކުންފުނިތަކަށް ޖަމާކޮށްފައިވާކަމަށެވެ.

މި މައްސަލާގައި ވޮއިސް އާ ވާހަކަދައްކަވަމުން މާނު ވިދާޅުވީ، އޭނާގެ މައްޗަށް އުފުލާފައިވާ ދައުވާތަކަށް ފިލައިގެން ނުޅޭކަމަށާއި، އެކަމާއި ގުޅޭ ކަންކަމަށް އެއްބާރުލުންދޭކަމަށެވެ.

މި މައްސަލަ އޭސީސީން ނިންމައި، އެ ނިންމި ނިންމުން މާނުއަށް އަންގާފައިވާއިރު، މި މައްސަލަ އަނެއްކާވެސް ބަލަމުންދާކަމަށް ފުލުހުން ހާމަކުރަންޖެހޭ ސަބަބެއް ނުވިސްނޭކަމަށްވެސް އޭނާ ވަނީ ވިދާޅުވެފައެވެ.