އިނގިރޭސިވިލާތުގެ ހުޅަނގުއުތުރު ހާޓްލީޕޫލްގެ ރަށެއް ކަމުގައިވާ ސައުތުޕޯޓްގައި ދިން ވަޅީގެ ހަމަލާތަކެއްގައި ތިން ކުޑަކުދިން މަރުވުމުން ފެށި މުޒާހަރާތައް ހޫނުވެ، އެގައުމަށް ހިޖުރަކޮށްފައިވާ މީހުން ތިބޭ ތަންތަނަށް ގެއްލުންދޭން ފަށައިފިއެވެ.

މިއީ ފާއިތުވި 13 އަހަރުގެ ތެރޭގައިވެސް އެގައުމުގައި ހިނގަމުންދާ އެންމެ ބޮޑު ހަމަނުޖެހުމަށްވާއިރު، މުޒާހަރާގެ ބައިވެރިން ވަނީ އެގައުމަށް ހިޖުރަކޮށްފައިވާ މީހުން ބޯހިޔާވަހިކަން ހޯދަމުން އަންނަ މީހުން ތިބޭ ހޮޓެލް ތަކުގެ ބޭރުގައި އަލިފާން ރޯކޮށް، ހޮޓެލްތަކުގެ އެތެރެއަށް ވެސް ވަދެފައެވެ.

އެގޮތުން އިނގިރޭސިވިލާތުގެ ޓެމްވޯތުގައި ކުރި މުޒާހަރާގެ ތެރެއިން، މުޒާހަރާގެ ބައިވެރިން އެތަނުގައި ހުންނަ ހިޖުރަކޮށްފައިވާ މީހުން ދިރިއުޅޭ ހޮޓަލެއްގެ ކުޑަދޮރު ތަޅާލައި، އަލިފާން ރޯކޮށްލާފައިވާއިރު، އެތަނުގައި ހަރަކާތްތެރިވި ފުލުހަކު ވަނީ ޒަހަމްވެފައެވެ. އަދި އެގައުމުގެ ރޮތަހަމްގައި ހުންނަ ހިޖުރަވެރިނގެ ހޮޓެލަކާއި ހަމާޒުކޮށް ލަކުޑި ބުރި އާއި އަލިފާން ނިއްވާ ފުޅި ފަދަ ތަކެތި އުކާފައިވާއިރު ހޮޓެލްގެ ބޭރުގައި ވަނީ އަލިފާން ރޯކޮށްފައެވެ.

Advertisement

އިނގިރޭސިވިލާތުގައި ދިރިއުޅޭ މުސްލިމުންނާއި ހިޖުރަކޮށްފައިވާ ފަރާތްތަކަށް މި މުޒާހަރާގެ ތެރެއިން އަމާޒުކޮށްފައިވާއިރު، ހަމަލާ ދީފައިވަނީ އެގައުމަށް ހިޖުރަކުރި މުސްލިމެއްކަމަށް ބުނެ ވަނީ ދޮގު ހަބަރުތަކެއް ވެސް ފަތުރާފައެވެ. އެއާއިއެކު، މި މުޒާހަރާގެ ފުރަތަމަކޮޅު މުޒާހަރާގެ ބައިވެރިން ވަނީ މިސްކިތްތަކަށް އަމާޒުކޮށް ހަމަލާ ދީފައެވެ.

މި މުޒާހަރާގެ ތެރެއިން މިހާތަނަށް 147 މީހަކު ހައްޔަރުކޮށްފައިވާއިރު، އެގައުމުގެ ބޮޑު ވަޒީރު ކީރ ސްޓާމަރ ވަނީ މިކަން ހަރުކަށި އިބާރާތުން ކުށްވެރިކުރައްވައި، މިކަމުގައި ބައިވެރިވި މީހުންނަށް ގާނޫނީ ގޮތުން ދޭން ޖެހޭ އަދަބުތައް ދެއްވާނެކަމަށް ވިދާޅުވެފައެވެ.