އދ އަތޮޅު ޒުވާނުންގެ 13 ވަނަ ފުޓްބޯޅަ މުބާރާތުގެ ޗެމްޕިއަންކަން، މިފަހަރުވެސް މަހިބަދޫއިން ހޯދައި ތަށި ދިފާއުކޮށްފި އެވެ.

ދިވެހިރާއްޖޭގެ މިނިވަންދުވަސް އަތޮޅު ފެންވަރުގައި އދ. މާމިގިލީގައި ފާހަގަކުރުމުގެ ގޮތުން ބޭއްވުނު ކުޅިވަރުތަކުގެ ތެރެއިން، ޒުވާނުންގެ ފުޓްބޯޅަ މުބާރާތުގެ ޗެމްޕިއަންކަން މަހިބަދޫ ޓީމުން ހޯދާފައި ވަނީ ފައިނަލް މެޗުގައި މާމިގިލި ޓީމާއި ވާދަކޮށް 4-2 ގެ ނަތީޖާއަކުންނެވެ. 

މިއަދު ހަވީރު މާމިގީލީ ފުޓްބޯޅަ ދަނޑުގައި ކުރިއަށްދިޔަ ފައިނަލް މެޗުގައި ވާދަވެރި ކުޅުމެއް ފެނިގެން ގޮސްފައިވާއިރު، މެޗުގައި ފުރަތަމަ ލަނޑުޖަހައި ލީޑު ނެގީވެސް މަހިބަދޫ ޓީމުންނެވެ. އެ ލަނޑު މަހިބަދޫއަށް ކާމިޔާބު ކޮށްދިނީ ޓީމްގެ ކެޕްޓަން ސަމޫހު (ސަމުއްޓޭ) އެވެ. ނަމަވެސް ލިބުނު ޕެނަލްޓީއެއްގައި ފުރަތަމަ ހާފު ނިމުމުގެ ކުރިން މާމިގިލީ ޓީމުގެ ޖާޒީ ނަންބަރު 12 ޔަސްފާދު ހަބީބު، (މުލަކޭ) ވަނީ ލަނޑެއް ޖަހައި ނަތީޖާ ހަމަހަމަ ކޮށްފައެވެ. 

Advertisement

އޭގެ ފަހުން ދެވަނަ ހާފުގައި މަހިބަދޫއިން ތިން ލަނޑު ޖަހައި 4-1 ނަތީޖާއަކަށް ފަރަގު ބޮޑުކޮށްފައިވާއިރު މާމިގިލީ ޓީމުންވެސް ވަނީ މެޗު ނިމެން ކައިވެފައި ވަނިކޮށް ދެވަނަ ލަނޑު ޖަހައި ފަރަގު ކުޑަކޮށްފައެވެ. 

އަތޮޅު ޒުވާނުންގެ ފުޓްބޯޅަ މުބާރާތުގެ ޗެމްޕިއަންކަން ފާއިތުވި އަހަރުވެސް ހޯދާފައިވަނީ މަހިބަދޫއިން ނެވެ. މިފަހަރު ހޯދި ތައްޓާއި އެކު، އަތޮޅު ޒުވާނުންގެ 13 މުބާރާތުގެ ތެރެއިން 9 މުބާރާތުގެ ޗެމްޕިއަންކަން މަހިބަދޫ ޓީމުން މިވަނީ ހޯދައި, އަތޮޅުގެ ފުޓްބޯޅައިގެ ޗެމްޕިއަނުންގެ ގޮތުގައި އަނެއްކާވެސް ވިދާލާފައެވެ.