އިނގިރޭސިވިލާތުގައި އުޅޭ ދިވެހިން އެގައުމުގައި ހުންނަ ދިވެހި ހައި ކޮމިޝަނުގައި ރަޖިސްޓްރީވުމަށް އެދެފިއެވެ.

އެ ކޮމިޝަނުން އެކްސްގައި ކުރި ޕޯސްޓެއްގައި ބުނީ، އިނގިރޭސިވިލާތުގައި އުޅޭ ދިވެހިން ([email protected]) މެދުވެރިކޮށް ހައި ކޮމިޝަނުގައި ރަޖިސްޓްރީވުމަށް އެދޭ ކަމަށެވެ.

ހަމައެއާއިއެކު، އިމަޖެންސީ ހާލަތެއް ދިމާވެއްޖެނަމަ ހައި ކޮމިޝަނަށް އެކަން އެންގުމަށްވެސް އެ ކޮމިޝަނުން ވަނީ އެދިފައެވެ.

Advertisement

ހައި ކޮމިޝަނުން މިފަދައިން އެދިފައިމިވަނީ، އިނގިރޭސިވިލާތުގެ ހުޅަނގުއުތުރު ހާޓްލީޕޫލްގެ ރަށެއް ކަމުގައިވާ ސައުތުޕޯޓްގައި ދިން ވަޅީގެ ހަމަލާތަކެއްގައި ތިން ކުޑަކުދިން މަރުވުމާއި ގުޅިގެން ފެށި ހަމަނުޖެހުންތަކާއި ގުޅިގެންނެވެ.

މި ހަމަނުޖެހުންތަކުގައި މުޒާހަރާގެ ބައިވެރިން އެގައުމަށް ހިޖުރަކޮށްފައިވާ މީހުން ތިބޭ ތަންތަނަށް ވެސް ގެއްލުން ދެމުންދާއިރު، ދިވެހި ޚާރިޖީ ވުޒާރާއިން ވެސް ވަނީ ދިވެހިން އިނގިރޭސިވިލާތަށް ދަތުރުކުރުމުގައިއާއި، ސައުތްޕޯޓް އަދި އެތާގެ ވަށައިގެންވާ ސަރަޙައްދުތަކުގައި ދިރިއުޅޭ ފަރާތްތަކުން ސަމާލުވުމަށް އެދިފައެވެ.

މި ހާލަތާއި ގުޅޭ އެންމެފަހުގެ މައުލޫމާތު ހޯދަމުންދިޔުމަށާއި، އަމިއްލަ ރައްކާތެރިކަމަށް އިސްކަންދިނުމުގެ އިތުރުން އަމަންއަމާންކަން ގެއްލިފައިވާ ސަރަހައްދުތަކާ ދުރުހެލިވެ، އެ ސަރަހައްދުގެ ކަމާބެހޭ އިދާރާތަކުން ދޭ އެންމެހައި އިރުޝާދުތަކަށް ފުރިހަމައަށް ތަބާވުމަށާއި، އެއްވެސް އެހީތެރިކަމެއް ބޭނުންވާ ފަރާތަކުން ދިވެހި ހައިކޮމިޝަނާއި ގުޅުއްވުމަށްވެސް އެ ވުޒާރާއިން ވަނީ އެދިފައެވެ.