މެދުއިރުމަތީގެ މަސްރަހާއި ގުޅޭ ގޮތުން އޮގަނައިޒޭޝަން ފޯ އިސްލާމިކް ކޯޕަރޭޝަން (އޯއައިސީ) އިން ބާއްވާ ހާއްސަ ބައްދަލުވުމުގައި ބައިވެރިވެވަޑައިގަތުމަށް ޚާރިޖީ ވަޒީރު މޫސާ ޒަމީރު ސައުދީ އަރަބިޔާއަށް މިރޭ ފުރާވަޑައިގަތުމަށް ހަމަޖެހިއްޖެ އެވެ.
މިކަމާއި ގުޅޭގޮތުން ޚާރިޖީ ވުޒާރާއިން ބުނީ، ސައުދީ އަރަބިޔާގެ ޖިއްދާގައި ބާއްވާ އެ ބައްދަލުވުމަކީ ފަލަސްތީނުގެ ބިންތައް އިޒްރޭލުން ހިފުމާއި ހަމާސް ޖަމާއަތުގެ ސިޔާސީ ގޮފީގެ ވެރިޔާ އިސްމާއިލް ހަނިއްޔާ އަވަހާރަކޮށްލުމާ ގުޅޭ ގޮތުން ފަލަސްތީނާއި އިރާނުގެ ދައުވަތަކަށް އޯއައިސީގެ އެގްޒެކްޓިވް ކޮމިޓީން ޚާރިޖީ ވަޒީރުންގެ ފެންވަރުގައި ބާއްވަން ނިންމި ބައްދަލުވުމެއް ކަމަށެވެ.
އޯއައިސީގެ މިބައްދަލުވުމުގެ އެޖެންޑާގައި ހިމެނޭ މައިގަނޑު މައްސަލަތަކުގެ ތެރޭގައި އިޒުރޭލުން ފަލަސްތީންގެ ޣައްޒާގައި ދެމުންދާ ލާއިންސާނީ ހަމަލާތަކާއި، އިރާނާއި އިޒުރޭލާ ދެމެދު ހަނގުރާމައެއް ފެށިއްޖެނަމަ އޯއައިސީގެ ގައުމުތަކުން ކަންކަން ކުރާނެ ގޮތަކާ މެދު މަޝްވަރާކުރުން ހިމެނޭއިރު، މި މައްސަލަތަކާ ގުޅޭގޮތުން ދިވެހި ސަރުކާރުން ދެކޭ ގޮތްތައް މިނިސްޓަރު ޒަމީރު ދެއްވާ ތަގުރީރުގައި ހާމާކުރެއްވުމަށް ވަނީ ހަމަޖެހިފައެވެ.
އީރާނުގެ ރައީސް، މަސްއޫދު ޕެޒެޝްކިއާން ގެ ހުވާކުރެއްވުމަށް އީރާނަށް ވަޑައިގެން ހުންނަވަނިކޮށް ހަމާސް ޖަމާއަތުގެ ސިޔާސީ ގޮފީގެ ލީޑަރު އިސްމާއީލް ހަނިއްޔާ އަވަހާރަކޮށްލުމާއި ގުޅިގެނ މެދު އިރުމަތީގެ ހާލަތު ގޯސްވެފައިވާއިރު، އެ ސަރަހައްދުގައި ހަނގުރާމައެއް ފެށިދާނެކަމުގެ ބިރު ވަނީ ބޮޑުވެފައެވެ.
Advertisement
This content is created and paid for by advertisers and does not involve Voice Journalists
