އިސްލާމީ ކަންތައްތަކާއި ބެހޭ ވަޒީރު ޑރ.މުޙައްމަދު ޝަހީމް ޢަލީ ސަޢީދުގެ އަބުރު ކަތިލުމަށް ފޭކު ވީޑިޔޯ އުފައްދައި އާއްމު ކުރުމުން ގިނަ ބަޔަކު ވަޒީރުގެ ދިފާޢުގައި ނުކުމެއްޖެއެވެ. 

ކާކުކަން ނޭނގޭގޮތަށް އެކްސްގައި ހިންގާ އެކައުންޓަކުން ވަޒީރު ޝަހީމްގެ އަބުރާއި އިއްޒަތް ގެއްލޭ ގޮތަށް ފުލު ފުލުގައި އަންނަނީ މިފަހުން އެކި ޕޯސްޓްތައް ކުރަމުންނެވެ. އެގޮތުން ވަޒީރު ޝަހީމްގެ ޕީއެޗްޑީގެ ސައްޙަ ކަމާއި މެދު ސުވާލު އުފައްދައި، އަބުރު ކަތިލުމަށް ބަދުއަޚްލާގީ މަންޒަރު ހިމެނޭ، ފޭކު ވީޑިއޯއެއްވެސް ރޭ ވަނީ އާއްމު ކޮށްފައެވެ. 

އެ ވީޑިއޯއާއި ތުހުމަތު ތަކާއި ގުޅިގެން ގިނަބަޔަކު އަންނަނީ ޝަހީމް އަށް ހިތްވަރު ދެއްވައި، ޝަހީމްގެ ދިފާއުގައި ވާހަކަ ދައްކަވަމުންނެވެ. 

އެގޮތުން، މަޖިލީހުގެ ރައީސް އަބްދުއްރަޙީމް އަބްދުالله އެކްސްގައި ކުރެއްވި ޕޯސްޓެއްގައި ވަނީ އިސްލާމީކް މިނިސްޓަރ ޑރ.މުޙައްމަދު ޝަހީމް ޢަލީ ސަޢީދަކީ ފުރައްސާރަކޮށް ހަގީގަތާ ޚިލާފު އިލްޒާމުތައް އަޅުވައިގެން ފަހަތަށް ޖެއްސޭނެ ބޭފުޅެއްނޫންކަމަށް ވިދާޅުވެފައެވެ.

“އެ އަށްވުރެ ޑރ.ޝަހީމުގެ ޢަޒުމު ވަރުގަދަވާނެ. އެއީ މިހާތަނަށް ދިވެހިރާއްޖެ ދުށް އެންމެ ގާބިލް އެންމެ ހިންގުންތެރި އިސްލާމިކް މިނިސްޓަރ” އަބްދުއްރަޙީމް ވިދާޅުވިއެވެ. 

ޝަހީމްގެ ދިފާޢުގައި، ރައީސް އޮފީހުގެ އަންޑަރ ސެކްރެޓެރީ ފޮރ ލީގަލް އެފެއާޒް އަލްއުސްތާޛު މުޙައްމަދު ފިރުޒުލް ޢަބްދުالله ޚަލީލް ފޭސްބުކުގައި ކުރެއްވި ޕޯސްޓެއްގައި ވަނީ، އެއްވެސް އަސްލެއް އަސާސެއް ނެތި މީހެއްގެ ބޮލުގައި ކަނޑައެޅިގެން ހަގީގަތާ ޚިލާފަށް ބޮޑެތި އިލްޒާމު އަޅުވައި އެ ވާހަކަތައް ފަތުރާއިރު އެއްވެސް އެއްޗެއް ހިތަށް ނާރާތޯ އެކަން ކުރާ މީހުންނާ ސުވާލުކުރައްވާފައެވެ.

މީގެ އިތުރުން، އެމްއެންޔޫގެ ލެކްޗަރާ އަލީ ޒައިދު، “ސިޔާސީ ރުޅީގައި، އަނެކާއާ ޒާތީވެ، ހަސަދަވެރިވެ، ނުކުރާ ކަންކަން ބޮލުގައި އަޅުވައި އަބުރު ކަތިލަން ފޭކް ވީޑިއޯ އާއި ފޮޓޯ އުފައްދާނީ ވަރަށް ނުބައި ވީމަ” ކަމަށް ވިދާޅުވެފައި ވާއިރު، ކުރީ ސަރުކާރުގެ ސްޓޭޓް މިނިސްޓަރ އައްޝައިޚް އަނީލްވެސް ވަނީ ފޭކް ވީޑިއޯ ހަދައިގެން ޝަހީމްގެ އަބުރު ކަތިލަން މަސައްކަތް  ކުރުން ހަރުކަށި އިބާރާތުން ކުށްވެރި ކުރައްވާފައެވެ.

ޝަހީމްގެ އަބުރު ކަތިލަން އާއްމު ކުރި ވީޑިއޯއާއި ގުޅިގެން އިދިކޮޅުންވެސް ވަނީ އޭނާގެ ދިފާއުގައި ވާހަކަ ދައްކާފައެވެ. އެގޮތުން، އިދިކޮޅު މައި ޕާޓީ އެމްޑީޕީގެ ރައީސް އަބްދުالله ޝާހިދު އެކްސްގައި ކުރެއްވި ޕޯސްޓެއްގައި ވިދާޅުވީ ޝަހީމްގެ އަބުރު ކަތިލުމަށް އަސްލެއް ނެތް ވީޑިއޯ އުފެއްދުމަކީ ނާތަހުޒީބު އަމަލެއް ކަމަށެވެ. އަދި އެފަދަ ކަންކަން ހަރުކަށި އިބާރާތުން ކުށްވެރި ކުރައްވާ ކަމަށްވެސް ވިދާޅުވިއެވެ. 

ޝަހީމްގެ އަބުރު ކަތިލުމަށް ވީޑިއޯ ލުމާއި ގުޅިގެން އެކި ފަރާތްތަކުން ދިފާއުގައި ނުކުތުމުން، އެ ވީޑިއޯ އާއްމު ކުރި އެކައުންޓުންވެސް ވަނީ ފަހުން އެއީ ފޭކު ވީޑިއޯއެއް ކަމަށް އެއްބަސްވެފައެވެ. އެކަމާއި ގުޅިގެން ގިނަ ބައެއްގެ ނުރުހުމާއި ފާޑުކިޔުން ވަނީ އެ ވީޑިއޯ އާއްމުކުރި އެކައުންޓަށް އަމާޒުވެފައެވެ.