ބޮޑީބޯޑިން އައިބީސީ ވޯލްޑް ޓުއާގައި ހިމެނޭ ވިސިޓް މޯލްޑިވްސް ޕްރޯ 2024ގެ އަންހެން ޗެމްޕިއަންކަން ޖަޕާނުގެ ނަމީކާ ޔަމަޝީތާ ހޯދިއިރު، ފިރިހެން ޖޫނިއާ ޗެމްޕިއަންކަން އޮސްޓްރޭލިއާގެ ޖޭ ޓެއިލާ ހޯދައިފިއެވެ.

މާލޭ ސިޓީގައި ހޮނިހިރު ދުވަހު ފެށި ވިސިޓް މޯލްޑިވްސް ޕްރޯގެ ފައިނަލް އިވެންޓްތައް ބުދަ ދުވަހު ކުރިއަށް ގެންގޮސްފައިވާ އިރު، އަންހެން އިވެންޓުން ޔަމަޝީތާ ޗެމްޕިއަންކަން ހޯދީ ފައިނަލުގައި އެގައުމުގެ ލެޖެންޑަރީ ބޮޑީބޯޑަރު، އަދި މިދިޔަ އަހަރުގެ އަންހެން ދުނިޔޭގެ ޗެމްޕިއަން ސާރީ އޮހާރާ ބަލިކޮށްގެންނެވެ. އަދި ފިރިހެން ޖޫނިއާ ޗެންޕިއަންކަން ޓެއިލާ ހޯދީ ފައިނަލުގައި، ވޯލްޑް ޗެމްޕިއަންކަމަށް ވާދަކުރަމުންދާ ރޭންކިން ދެވަނައިގައި އޮތް ޗިލީގެ މިކޭލޭ އަރައިގަދާ ބަލިކުރުމަށްފަހުއެވެ.

ފައިނަލުގައި ޔަމަޝީތާ ޖުމްލަ 12.75 ޕޮއިންޓް ހޯދިއިރު، ސާރީއަށް އަށް ހޯދުނީ 12.00 ޕޮއިންޓެވެ. އެގޮތުން ޔަމަޝީތާ އެންމެ ސްކޯ ރަނގަޅު ދެ ރާޅުގެ ތެރެއިން އެއް ރާޅުގައި 6.50 ޕޮއިންޓް ހޯދިއިރު، އަނެއް ރާޅުގައި އޭނާ ވަނީ 6.25 ޕޮއިންޓް ހޯދާފައެވެ. އަދި ފައިނަލުގެ ފޭވަރޭޓުންގެ ގޮތުގައި ނުކުތް ސާރީއަށް އެންމެ ސްކޯ ރަނގަޅު ދެ ރާޅުގެ ތެރެއިން އެއް ރާޅުގައި 7.00 ޕޮއިންޓް ލިބުނުއިރު، އަނެއް ރާޅުގައި ހޯދުނީ 6.00 ފޮއިންޓެވެ.

Advertisement

ފިރިހެން ޖޫނިއާ ޗެންޕިއަންކަން ޓެއިލާ ހޯދީ ފައިނަލުގައި، ވޯލްޑް ޗެމްޕިއަންކަމަށް ވާދަކުރަމުންދާ ރޭންކިން ދެވަނައިގައި އޮތް ޗިލީގެ މިކޭލޭ އަރައިގަދާ ބަލިކުރުމަށްފަހުއެވެ.

ފައިނަލުގައި ޓެއިލާ ޖުމްލަ 14 ޕޮއިންޓް ހޯދިއިރު، މިކޭލޭ އަރައިގަދާ އަށް ހޯދުނީ 8.89 ފޮއިންޓެވެ. އެގޮތުން ޓެއިލާގެ އެންމެ ސްކޯ ރަނގަޅު ދެ ރާޅުގެ ތެރެއިން އެއް ރާޅުގައި ހަ ޕޮއިންޓް ހޯދިއިރު، އަނެއް ރާޅުގައި އޭނާ ވަނީ އަށް ޕޮއިންޓް ހޯދާފައެވެ. އަދި ފައިނަލުގެ ފޭވަރޭޓުންގެ ގޮތުގައި ނުކުތް މިކޭލޭ އަރައިގަދާގެ އެންމެ ސްކޯ ރަނގަޅު ދެ ރާޅުގެ ތެރެއިން އެއް ރާޅުގައި 3.30 ޕޮއިންޓް ލިބުނުއިރު، އަނެއް ރާޅުގައި ހޯދުނީ 5.56 ޕޮއިންޓެވެ.

03 އޮގަސްޓް 2024 އިން 09 އޮގަސްޓް 2024 އަށް މާލޭ ސިޓީގައި ކުރިއަށްދާ "ވިސިޓް މޯލްޑިވްސް 2024" ގައި މި މުބާރާތުގައި 14 ގައުމަކުން ޖުމްލަ 86 އެޓްލީޓުން ވަނީ ބައިވެރިވެފައެވެ.