ކުރިއަށް އޮތް ސީޒަނަށް ތައްޔާރުވުމުގެ ގޮތުން ކުޅުނު އެކުވެރިކަމުގެ މެޗެއްގައި ސައުދީ ޕްރޮފެޝަނަލް ލީގުގެ އަލް އިއްތިހާދުން އިޓަލީގެ ޗެންޕިއަން އިންޓަ މިލާން 2-0 ގެ ނަތީޖާއަކުން ބަލިކޮށްފިއެވެ.

އިޓަލީގައި ކުޅުނު މިމެޗުގައި ދެޓީމުން ވެސް ނެރެފައިވަނީ އެންމެ ވަރުގަދަ އެގާރައެވެ. އަދި މެޗުގެ ފުރަތަމަ ހާފުގައި ގިނަވަގުތު ބޯޅަ ހިފަހައްޓައިގެން ކުޅެ އިންޓަ މިލާނުން މެޗު ޑޮމިނެޓް ކުރި ނަމަވެސް އަލް އިއްތިހާދުން ވަނީ ކައުންޓާ އެޓޭކުތަކުގައި އިންޓަ މިލާނުގެ ގޯލަށް ރަނގަޅު ހަމަލާތަކެއް ފޮނުވާލާފައެވެ.

އެގޮތުން މެޗުގެ 25 ވަނަ މިނެޓުގައި އިއްތިހާދުން އުފެއްދި ކައުންޓާ އެޓޭކެއްގައި އެޓީމުގެ ފުރާންސް ފޯވާޑް މޫސާ ޑިއާބީ ވަނީ ލަނޑެއް ކާމިޔާބުކޮށް އެޓީމަށް މެޗުގެ ލީޑު ހޯދައިދީފައެވެ.

Advertisement

މީގެ އިތުރުން ވެސް މިހާފުގައި ދެޓީމުންވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުން ކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-0 ގެ ނަތީޖާއަކުން އަލް އިއްތިހާދު ކުރީގައި އޮވެގެންނެވެ.

މެޗުގެ ދެވަނަ ހާފު ވަރުގަދަކޮށް ފެށީ އަލް އިއްތިހާދުންނެވެ. ނަތީޖައެއްގެ ގޮތުން ދެވަނަ ހާފު ފެށިފެން ދެވަނަ މިނެޓުގައި ޑިއާބީ ވަނީ އިތުރު ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ. އަދި މިއީ މިދިޔަ ސީޒަނުގައި ޕްރެމިއާ ލީގުގެ އެސްޓަން ވިލާގައި މޮޅު ކުޅުމެއް ދެއްކި އުމުރުން 25 އަހަރުގެ ފޯވާޑް އެންމެ ފަހުން ކުޅުނު ދެމެޗުގައި ކާމިޔާބުކުރި ތިންވަނަ ލަނޑެވެ.

މި ލަނޑަށްފަހު އިންޓަ މިލާނުން ވަނީ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަމަވެސް، އެޓީމުގެ އެޓޭކުތައް ހުއްޓުވުމުގައި، އަލް އިއްތިހާދުން ވަނީ ރޭވުންތެރިކަމާއެކު މޮޅު ޑިފެންސިވް ކުޅުމެއް ދައްކައިދީފައެވެ. 

ސައުދީ ޕްރޮފެޝަނަލް ލީގުގެ ކުޅުން މިމަހުގެ 24 ވަނަ ދުވަހު ފަށާއިރު، އިޓާލިއަން ސެރިއޭގެ ކުޅުން ފެށުމަށް ހަމަޖެހިފައިވަނީ މިމަހުގެ 17 ވަނަ ދުވަހު އެވެ. ނަމަވެސް އޭގެ ކުރިން މިމަހުގެ އެގާރަ ވަނަ ދުވަހުގެ ރޭ ޕްރެމިއާ ލީގުގެ ޗެލްސީ އާއެކު އިންޓަ މިލާނުން އިތުރު އެކުވެރިކަމުގެ މެޗެއް ކުޅުމަށް ވަނީ ހަމަޖެހިފައެވެ