ބޮލުން އިސްތަށި ފޭބުމަކީ ގިނަ ބައެއްގެ އޮންނަ ވަރަށް ބޮޑު ކަންބޮޑުވުމެކެވެ. އެ މައްސަލަ ހައްލުކޮށް، އިސްތަށިގަނޑު ވަރުގަދަކޮށްދީ، ދިގު ކޮށްދިނުމަށް އެހީތެރިވެދޭ ތަފާތު ގުދުރަތީ ފަރުވާތައް ވެސް އެބަހުއްޓެވެ. މިއީ ޒަމާނުއްސުރެ މީހުން ބޭނުންކުރަމުން އަންނަ އަދި ބައެއް ޢިލްމީ ހެކިތަކުންވެސް ކަށަވަރުވެފައިވާ އިސްތަށިގަނޑަށް ދެވިދާނެ ގުދުރަތީ ފަރުވާތަކެވެ.

އެލޯވެރާ އަކީ އިސްތަށި ފޭބުން  ފަދަ ހަމުގެ ތަފާތު ބަލިތަކަށް ފަރުވާ ދިނުމަށް ގަރުނުތަކެއް ވަންދެން ބޭނުން ކުރަމުން އަންނަ އެއްޗެކެވެ. އެއީ ބޮލުގެ އިސްތަށިގަނޑު ފިނިކޮށްދީ، އިސްތަށިގަނޑު ކޮންޑިޝަން ކޮށްދީ، ބޮލުގެ އިސްތަށިގަނޑު ބޯ ކޮށްދޭ އެއްޗެކެވެ. 

ހަފްތާއަކު ދެތިން ފަހަރު، އެލޯވެރާ ސީދާ ބޮލުގެ އިސްތަށި ތަކުގެ ބުޑާއި އިސްތަށިގަނޑުގައި އުނގުޅާލެވިދާނެ އެވެ.

ކާށިތެލުގައި ގިނަ އަދަދަކަށް ފެޓީ އެސިޑް ހުންނައިރު އެއީ އިސްތަށިގަނޑަށް މުހިންމު އެއްޗެކެވެ. 

އިސްތަށިގަނޑު ދޮވުމުގެ ކުރިން ނުވަތަ ދޮވުމަށްފަހު ކާށިތެޔޮ ބޭނުން ކުރެވިދާނެއެވެ. ކާށިތެލުން އިސްތަށިގަނޑުގެ ބުޑު މަސާޖު ކުރުމަކީ ވެސް ލޭގެ ދައުރުވުން ރަނގަޅުކޮށްދީ އިސްތަށިގަނޑު ބޯވެ ދިގުވުމަށް މަގުފަހިކޮށްދޭ ކަމެކެވެ.

ފިޔާ ޖޫހުގައި ގިނަ އަދަދަކަށް ސަލްފަރު ހިމެނޭއިރު، މިއީ ކޮލަޖަން އުފެއްދުން އިތުރުކޮށްދީ އިސްތަށިގަނޑުގެ ހެދި ބޮޑުވުމަށް އެހީތެރިވެދޭ އެއްޗެކެވެ. 

ފިޔާ ޖޫސް ބޮލުގެ އިސްތަށިގަނޑުގައި އުނގުޅައިގެން 15-30 މިނެޓް ވަންދެން ބެހެއްޓުމަށްފަހު ދޮވެލުމަކީ ފައިދާހުރި ކަމެކެވެ.

ރޮޒެމަރީ އޮއިލް އަކީ ސެލިޔުލަރ ޖެނެރޭޝަން ރަނގަޅުކޮށްދޭ އެއްޗެކެވެ. ކާށި ނުވަތަ ޒައިތޫނި ތެޔޮ ފަދަ ކެރިއަރ އޮއިލް އާއި ރޮޒްމެރީ ތެލުގެ ދެތިން ތިކި އެއްކޮށްލުމަށްފަހު ބޮލުގައި އުނގުޅުމަކީ އިސްތަށިގަނޑު ހެދި ބޮޑުވުމަށް އެހީތެރިވެދޭނެ ކަމެކެވެ.

ގްރީން ޓީގައި އެންޓިއޮކްސިޑެންޓްސް އެކުލެވިގެންވާއިރު، އެއީ އިސްތަށިގަނޑު ބޯ ކޮށްދީ، އިސްތަށި ފޭބުން މަދުކުރުމަށް އެހީތެރިވެދޭ މާއްދާތަކެކެވެ. 

ބޯ ދޮވުމުގެ ކުރިމް، ގަޑިއެއްހާއިރު، ބޮލުގައި ގްރީން ޓީ (ފިނިކޮށްފައި) އުނގުޅާފައި ބެހެއްޓުމަކީ ފައިދާހުރި ކަމެކެވެ.

ހީނާފަތަކީ ގުދުރަތީ ކޮންޑިޝަނަރެއް ކަމުން އިސްތަށިގަނޑު ވަރުގަދަ ކުރުމަށް އެއިން އެހީތެރިވެދެއެވެ. އެއީ ޔޯގަޓް ނުވަތަ ބިސް ފަދަ އެހެން ބާވަތްތަކާ އެއްކޮށްގެން އިސްތަށިގަނޑުގެ މާސްކެއް ހަދާލެވޭނެ އެއްޗެކެވެ. މިފަދަ މާސް ހަފްތާއަކު ދެފަހަރު، ގާތް ގަނޑަކަށް ގަޑިއިރެއް ހާއިރު ވަންދެން އިސްތަށިގަނޑުގައި (ޚާއްސަކޮށް އިސްތަށި ތަކުގެ ބުޑުގައި) އުނގުޅާފައި ބެހެއްޓުމަށްފަހު ދޮވެލާށެވެ. ތަފާތު ފެންނާނެއެވެ. 

ފެނުގްރީކް އޮށުގައި ޕްރޮޓީން އާއި ނިކޮޓިނިކް އެސިޑް ގިނައިން ހުންނައިރު، މިއީ އިސްތަށި ފޭބުން މަދުކުރުމަށް ފައިދާހުރި އެއްޗެކެވެ. 

އެއްރޭ ވަންދެން ފެނުގްރީކް އޮށް ފެނުގައި ބެހެއްޓުމަށްފަހު، އެއިން ޕޭސްޓެއް ތައްޔާރު ކޮށްލާށެވެ. ދެން ބޮލުގެ އިސްތަށިގަނޑާއި، އިސްތަށި ތަކުގެ ބުޑުގައި އރ އުނގުޅާށެވެ.

އަމްލާއަކީ ވިޓަމިން ސީ އާއި އެންޓިއޮކްސިޑެންޓްސް ގިނައިން ހިމެނޭ މާއްދާއެއް ކަމުން އިސްތަށިގަނޑުގެ ފޮލިކަލްތައް ވަރުގަދަކޮށް، އިސްތަށިގަނޑު ފޭބުން ހުއްޓުވުމަށް އެހީތެރިވެދެއެވެ. 

އަމްލާ ތެޔޮ ނުވަތަ އަމްލާ ޕައުޑަރ ފެނާއި އެއްކޮށްގެން ބޮލުގެ އިސްތަށިގަނޑުގައި ކޮންމެ ދުވަހަކުވެސް އުނގުޅާލެވިދާނެއެވެ.

ބިހަކީ ޕްރޮޓީން ގިނަ އެއްޗެކެވެ. އެހެންކަމުން އެއީ އިސްތަށިގަނޑު ވަރުގަދަ ކުރުމަށް އެހީތެރިވެދޭ އެއްޗެކެވެ. 

ބިސް މާސްކެއް ހެދުމަށއ ޒައިތޫނި ތެލާއި، ހީނާފަތާ ބިސް އެއްކުރާށެވެ. ދެން ގަޑިއިރެއްހާއިރު ވަންދެން އިސްތަށިގަނޑުގައި އުނގުޅައިގެން ހުރުމަށްފަހު ދޮވެލާށެވެ.

ވިޓަމިންސް އާއި މިނަރަލްސް އާއި ޚާއްސަކޮށް ދަގަނޑު، ޒިންކް، އަދި ވިޓަމިން އޭ، ސީ، އަދި އީ އިން މުއްސަނދި ކާނާ ކެއުމަކީ ދުޅަހެޔޮ އިސްތަށިގަނޑަކަށް މަގުފަހިކޮށްދޭ ކަމެކެވެ. މަސް، ނާޓްސް، އޮށް، އަދި ފަތް ހުންނަ ފެހި ބާވަތްތައް ފަދަ ކާނާތަކަކީ ފައިދާހުރި ކާނާތަކެކެވެ.

ސްޓްރެސް އަކީ އިސްތަށިގަނޑު ފޭބުމުގެ މުހިންމު ސަބަބެކެވެ.  ގަވާއިދުން ކަސްރަތު ކުރުމަކީ ސްޓްރެސް ލެވެލް ދަށްކުރުމަށް އެހީތެރިވެދޭ ކަމެކެވެ.

މި ގުދުރަތީ ފަރުވާތަކަކީ ފައިދާހުރި ފަރުވާތަކަކަށް ވެދާނެ ނަމަވެސް، އެއްބަޔަކު އަނެއް ބަޔަކަށް ނަތީޖާ ތަފާތުވެދާނެކަން ހަނދާން ބެހެއްޓުން މުހިންމެވެ. މިކަން ކުރާނަމަ، ގަވާއިދުން ކުރުމަކީ މުހިންމު ކަމެކެވެ. އަދި، ފާހަގަކޮށްލެވޭ ކުރިއެރުންތަކެއް ފެންނަން އެތައް ހަފްތާއެއް ނުވަތަ މަސްތަކެއް ނަގާފާނެ ކަމަށް ދަންނަންވާނެއެވެ.