މި ސަރުކާރުން ނުހައްގުން މީހުން ވަޒީފާއިން ވަކިކުރާ ކަމަށް ބުނެ އެކަން ދިރާސާކޮށް، މަގުމައްޗަށް އިހްތިޖާޖަށް ނުކުންނަން ޖެހިއްޖެނަމަ އެކަން ކުރަން އެމްޑީޕީގެ ގައުމީ މަޖިލީހުން ގަރާރެއް ފާސްކޮށްފި އެވެ.
ރޭ ބޭއްވުނު އެމްޑީޕީގެ ގައުމީ މަޖިލީހުގެ ޖަލްސާއަށް، އެޕާޓީގެ ގައުމީ މަޖިލީހުގެ ތިމަރަފުށި ދާއިރާގެ ރައީސް އަންވަރު އިބްރާހީމް ހުށަހެޅުއްވި މި ގަރާރު ފާސްވީ ޖަލްސާގައި ބައިވެރިވި ހުރިހާ މެންބަރުންގެ އިއްތިފާގުންނެވެ.
ގަރާރު ހުށަހަޅުއްވައި ވާހަކަދައްކަވަމުން އަންވަރު ވިދާޅުވީ، އެމްޑީޕީގެ 51،000 އަށްވުރެ ގިނަ މެމްބަރުން ތިބިއިރު، އެ މެންބަރުންނާއި މެންބަރުންގެ އާއިލާގެ އެކިއެކި ފަރާތްތައް ފެނަކަ އާއި އެނޫންވެސް ސަރުކާރު ހިއްސާވާ ކުންފުނިތަކުގެ ވަޒީފާއިން ކަނޑަމުންދާ ކަމަށެވެ.
އެހެންކަމުން އެ މަންޒަރު ބަލަން ނުތިބެ، ވަޒީފާއިން ވަކިކުރާ މީހުންނަށް އިންސާފު ހޯދައިދިނުމަށާއި ސީދާ ހަރަކާތަކަށް ދާން ޖެހިއްޖެނަމަ އެކަން ކުރަންވެސް އޭނާގެ ގަރާރުގައި ގޮވަލާފައިވެ އެވެ.
އަންވަރުގެ ގަރާރާއި ގުޅިގެން ވާހަކަ ދައްކަވަމުން ފައްޔާޒު ވިދާޅުވީ ދިވެއްސަކަށް ލިބޭ ކޮންމެ ގެއްލުމަކީ އެ ޕާޓީން އެކަމަކާ ހިތާމަކޮށް އަޑު އުފުލާނެ ކަންކަން ކަމަށެވެ.
މީހުން ވަޒީފާއިން ވަކިކުރާ މައްސަލަ ދިރާސާކޮށްދެއްވައި، މަގުމައްޗަށް ނުކުމެ އަޅުގަނޑުމެން އެމީހުންނާއެކު އިހްތިޖާޖު ފެށުމަށް. އަޅުގަނޑުމެން މި ޕާޓީގެ ފަރާތުން އެކަމުގައި ހުރިހާ އެއްބާރުލުމެއް ދޭނަން
ފައްޔާޒު އިސްމާޢީލް
މިކަމާއި ގުޅޭ ގޮތުން މަސައްކަތްތައް ކުރުމަށް މި ގަރާރުގެ ދަށުން ވަނީ ފަސް މެންބަރުންގެ ކޮމިޓީއެއް އެކުލަވާލަން ފާސްކޮށްފަ އެވެ.
ކޮމެޓީގައި ހިމެނިވަޑައިގަންނަވަނީ އެމްޑީޕީގެ ނައިބު ރައީސް ހިސާން ހުސެއިން އާއި ލީގަލް ޑިރެކްޓަރު މަހުފޫޒް ސައީދު އާއި ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރުގެ އިތުރުން އަލިފުށި ދާއިރާގެ ރައީސް މުހައްމަދު ރަޝީދު (ބިގޭ) އަދި ކުޑަހުވަދޫ ދާއިރާގެ ރައީސް ޝާކިރު އަބްދުއްރަހްމާން އެވެ.
Advertisement
This content is created and paid for by advertisers and does not involve Voice Journalists
