ދުނިޔޭގައި ކެއްކުމުގެ އެންމެ ބޮޑު ފްރެންޗައިސް ޝޯ “މާސްޓަރ ޝެފް” ރާއްޖޭގައި ބޭއްވުމުގެ މަސައްކަތް ފައްޓަވާނެ ކަމަށް ފަތުރުވެރިކަމާއި ބެހޭ ވުޒާރާގެ ވަޒީރު އިބްރާޙީމް ފައިސަލް ވިދާޅުވެއްޖެއެވެ. 

ފަތުރުވެރިކަމާއި ބެހޭ ވުޒާރާއާއި އެމްއެމްޕީއާރްސީން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ވަޒީރު ފައިސަލް ވިދާޅުވީ، ފަތުރުވެރިކަމުގެ ދާއިރާގައި މަސައްކަތް ކުރާ ޝެފުންގެ ތެރޭގައި ބޭރު ގައުމުތަކުގެ ގިނަ ޝެފުން ތިބި ކަމަށެވެ. އަދި އެ ދާއިރާގެ ޝެފުންނަށް ބައެއް ލަގްޒަރީ ރިސޯޓް ތަކުން 35،000 އެއްހާ ޑޮލަރު މުސާރައިގެ ގޮތުގައި ދެމުންދާކަންވެސް ފާހަގަކުރެއްވިއެވެ.

ފައިސަލް ވިދާޅުވީ، ދިވެހިންގެ ތެރޭގައިވެސް އެ ދާއިރާއިން ހުނަރު ހުރި ގިނަ ޒުވާނުންތަކެއް ތިބި ކަމަށާ، އެ ވަޒީފާތަކަށް ދިވެހިން އިސްކޮށް، ދިވެހިންގެ ޝައުގުވެރިކަންވެސް އެކަމަށް އުފެއްދުމަށް ސަރުކާރުން މަސައްކަތް ކުރަމުންދާ ކަމަށެވެ.

Advertisement

މިއާއެކު، ފައިސަލް ވިދާޅުވީ، އައު ޝެފުން އުފައްދައި، ޝެފުންގެ ހުނަރު ދައްކާލުމަށް، މާސްޓަރ ޝެފް ޝޯވ ރާއްޖޭގައި ބާއްވަން ފެށުމަށް ޕީއެސްއެމާއިއެކު މަޝްވަރާ ކުރައްވާނެ ކަމަށެވެ.

މިއަދުގެ ނޫސްވެރިންގެ ބައްދަލުވުމުގެ ތެރެއިން: ފޮޓޯ/ ވޮއިސް

އެ ޝޯ އާއެކު، ޝެފުންގެ ވަޒީފާއަށް ދިވެހިންގެ ޝައުގުވެރިކަން ވަރަށް ބޮޑަށް އުފެއްދިގެންދާނެ ކަމަށް ފައިސަލް ވިދާޅުވިއެވެ. 

މީގެ ކުރިންވެސް 2020 ވަނަ އަހަރުގައި ރާއްޖޭގައި މާސްޓަރޝެފް ބޭއްވުމަށް  އެއްބަސްވުމުގައި ސޮއިވެސް ކުރެވުނެވެ. ނަމަވެސް އެކަން ކުރިއަށް ގެނެދެވިފައެއް ނުވެއެވެ.