ރާއްޖޭގެ ހުރިހާ ސަރަހެއްދެއްގައި ފަތުރުވެރިކަން ކުރިއެރުވުމަށް ކޮންމެ އަތޮޅަކަށް މާސްޓަރ ޕްލޭނެއް އެކުލަވާލުމުގެ މަސައްކަތް ފަށާފައިވާ ކަމަށް ފަތުރުވެރިކަމާ ބެހޭ ވުޒާރާގެ ވަޒީރު އިބްރާޙީމް ފައިސަލް ވިދާޅުވެއްޖެއެވެ.
އެމްއެމްޕީއާރްސީއާއި ފަތުރުވެރިކަމާ ބެހޭ ވުޒާރާ ގުޅިގެން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ވަޒީރު ފައިޞަލް ވިދާޅުވީ، ރާއްޖޭގައި މިވަގުތު ހިންގާމުންދާ ގެސްޓް ހައުސް ތަކުގައި އެކަނިވެސް ގާތް ގަނޑަކަށް 16،000 އެނދުގެ ކެޕޭސިޓީއެއް ހުރި ކަމަށެވެ.
ރާއްޖޭގެ ޓޫރިޒަމް ނެތް ތަންތަނަށް ޓޫރިޒަމް ޑިވެލޮޕް ކުރުމަށް ކޮންމެ އަތޮޅަކަށް މާސްޓާރ ޕްލޭނެއް އަޅުގަނޑުމެން ހަދަމުން މިދަނީ. އެގޮތުން އެ މާސްޓާ ޕްލޭން ނިމޭ އިރު އަޅުގަނޑުމެންނަށް އެނގިގެންދާނެ، އެ އަތޮޅެއްގައި ވަން އައިލެންޑް ކޮންސެޕްޓްގެ ކިތައް ރިސޯޓްކަން އަޅުގަނޑުމެން ތަރައްގީ ކުރާނީ. އެއީ ކޮން ރަށް ތަކެއްތޯ. އެތަންތަނަށް އިންވެސްޓަރުން ހޯދުމަށް މަސައްކަތް ކުރަމުން އަޅުގަނޑުމެން ދާނީ
ފަތުރުވެރިކަމާ ބެހޭ ވުޒާރާގެ ވަޒީރު އިބްރާޙީމް ފައިސަލް
ަމީގެ އިތުރުން ރަށް ރަށުގައިވެސް ގެސްޓް ހައުސް ތަކުގެ އެނދުގެ އަދަދު އިތުރު ކުރާނެ މިންވަރާއި، ލިމިޓް ކުރާނެ މިންވަރުވެސް އެ މާސްޓަރ ޕްލޭންގެ ދަށުން ކަނޑައެޅިގެންދާނެ ކަމަށް ވަޒީރު ވިދާޅުވިއެވެ.
އަދި ރާއްޖޭގެ ކޮންމެ އަތޮޅެއްގައުވެސް އެ އަތޮޅެއްގައި ހިމެނޭ ގެސްޓް ހައުސްތައް ޕްރޮމޯޓް ކުރުމަށް، އެމްއެމްޕީއާރްސީގެ ބަޖެޓްގެ ތެރެއިން ގެސްޓް ކަންކަން ހަމަޖެހިގެންދާނެ ކަމަށް ވަޒީރު ވިދާޅުވިއެވެ.
އެއީ އެތަނެއްގައި ހުންނަ ސަގާފަތް ދައްކައި ދިނުން ކަމަށް ވިޔަސް، އަދި ޔުނިކް ސެލިންގ ޕޮއިންޓް ތައް އައިޑެންޓިފައި ކުރެވި އެކަންކަން ދުނިޔޭގައި ޕްރޮމޯޓް ކުރުމުގެ މަސައްކަތް އެމްއެމްޕީއާރސީން ވަރަށް ބޮޑަށް ކުރިއަށް ގެންދާނެ
ފަތުރުވެރިކަމާ ބެހޭ ވުޒާރާގެ ވަޒީރު އިބްރާޙީމް ފައިސަލް
މީގެ އިތުރުން، މިއަދުގެ ނޫސްވެރިންގެ ބައްދަކުވުމުގައި ވަޒީރު ފައިސަލް ވަނީ އައު ގެސްޓް ހައުސްތައް އަޅަން ބޭނުންވާ ފަރާތްތަކަށް އެކަމުގެ މަގު ފަހި ކޮށްދިނުމަށް، ލޯން ލިބޭނެ އިންތިޒާމް ހަމަޖެއްސުމަށް ބީއެމްއެލްއާއއި ގުޅިގެން މަޝްވަރާ ކުރައްވަމުންދާކަންވެސް ފާހަގަކުރައްވާފައެވެ.
Advertisement
This content is created and paid for by advertisers and does not involve Voice Journalists
