މިއަހަރުގެ ދެވަނަ ކުއަރޓާގައި އާސަންދަ ސްކީމުން 823 މިލިޔަން ރުފިޔާ ޚަރަދުކޮށްފައިވާކަން އެ ކުންފުނީގެ ތަފާސްހިސާބުތަކުން ދައްކައިފިއެވެ.

މި އަދަދަކީ މިއަހަރުގެ އޭފްރީލް 1 އިން ޖޫން 30 ނިޔަލަށް ހަރަދުވެފައިވާ މިންވަރު ކަމަށް އާސަންދައިން ހާމަކުރެއެވެ.

އާސަންދައިން އާއްމު ކުރި އެ ކުންފުނީގެ މިއަހަރުގެ ދެވަނަ ކުއާޓަރުގެ ރިޕޯޓްގައިވާގޮތުން، 823 މިލިޔަން ރުފިޔާ ބްލޮކްކުރިއިރު، މިއީ ފާއިތުވެދިޔަ އަހަރާއި އަޅާ ބަލާއިރު 11.5 އިންސައްތައިގެ ކުރިއެރުމެކެވެ. ފާއިތުވެދިޔަ އަހަރު މި އަދަދު ހުރީ 738 މިލިޔަން ރުފިޔާގައެވެ.

މި އަހަރުގެ ދެވަނަ ކުއާޓަރގައި އާސަންދަ ސްކީމުގެ ދަށުން ޚިދުމަތް ހޯދި މީހުންގެ ޢަދަދު ފާއިތުވި އަހަރުގެ މި މުއްދަތާއި އަޅާ ބަލާއިރު އިތުރުވިކަން ފާހަގަކޮށްލަން ޖެހެއެވެ. މިގޮތުން މިއަހަރު ޖުމްލަ 265،059 މީހުން އާސަންދަ މެދުވެރިކޮށް ފަރުވާ ހޯދިއިރު، މިދިޔަ އަހަރުގެ މި މުއްދަތުގައި މި އަދަދު ހުރީ 260،725 ގައެވެ.

އާސަންދައިން ހާމަކުރި ގޮތުގައި، އާސަންދަ ސްކީމްގެ ދަށުން 1،232 ފަހަރަށް ބަލިމީހުން އިމަޖަންސީ ހާލަތުގައި އެއް ރަށުން އަނެއް ރަށަށް ގެންދެވިފައިވެއެވެ. އަދި ޖުމުލަ 2،807 ބަލިމީހުން މި ސްކީމްގެ ދަށުން، ރާއްޖެއިން ބޭރުން ފަރުވާ ހޯދާފައިވެއެވެ.