އިނގިރޭސިވިލާތުގައި ކުރިއަށްދާ ހަމަނުޖެހުމުގެ ތެރެއިން، 100 އަށްވުރެ ގިނަ މުޒާހަރާތައް ރޭވިފައިވާކަމުގެ މަޢުލޫމާތު ލިބިފައިވާތީ، އެގައުމުގައި ދިރިއުޅޭ އަދި އެގައުމަށް ދަތުރުކުރާ ދިވެހިން ސަމާލުވުމަށް ޚާރިޖީ ވުޒާރާއިން އެދެފިއެވެ.

އެ ވުޒާރާއިން ނެރުނު ނޫސްބަޔާނެއްގައި ބުނީ، މިދިޔަ ޖުލައި މަހުގެ 29 އިން ފެށިގެން އިނގިރޭސިވިލާތުގައި ހިނގަމުންދާ ހަމަނުޖެހުންތަކާ ގުޅިގެން، އެ ޤައުމުގައި ހުންނަ ދިވެހިރާއްޖޭގެ ހައިކޮމިޝަނުން އެކަން ވަރަށް ގާތުން ބަލަމުންދާކަމަށެވެ.

މިހާލަތާ ގުޅިގެން، 100 އަށްވުރެ ގިނަ މުޒާހަރާތައް ރޭވިފައިވާކަމުގެ މަޢުލޫމާތު ލިބިފައިވާކަން ފާހަގަކޮށް އެ ވުޒާރާއިން ވަނީ މުޒާހަރާތައް ބޭއްވުމަށް ހަމަޖެހިފައިވާ ސަރަޙައްދުތަކުން ދުރުހެލިވުމަށާއި އިނގިރޭސި ސަރުކާރާއި އިނގިރޭސިވިލާތުގައި ހުންނަ ދިވެހިރާއްޖޭގެ ހައިކޮމިޝަނުންދޭ އިރުޝާދުތަކާ އެއްގޮތަށް އަމަލުކުރުމަށް އިލްތިމާސްކޮށްފައެވެ.

އިނގިރޭސިވިލާތުގައި ހިނގަމުންދާ ހަމަނުޖެހުންތަކާ ގުޅިގެން އެއްވެސް އެހީތެރިކަމެއް ބޭނުންފުޅުވާނަމަ އިނގިރޭސިވިލާތުގައި ހުންނަ ދިވެހިރާއްޖޭގެ ހައިކޮމިޝަނާ ގުޅުމަށް އެ ވުޒާރާއިން ވަނީ އެދިފައެވެ. އަދި  އިނގިރޭސިވިލާތުގައި ދިރިއުޅޭ ދިވެހިން [email protected] މެދުވެރިކޮށް ހައި ކޮމިޝަނުގައި ރަޖިސްޓަރީވުމަކީ ނުހަނު ބޭނުންތެރިކަމެއްކަން އެ ވުޒާރާއިން ވަނީ ފާހަގަކޮށްފައެވެ.

އިނގިރޭސިވިލާތުގައި މިހާރު ކުރިއަށްދާ ހަމަނުޖެހުންތަކަކީ އިނގިރޭސިވިލާތުގެ ހުޅަނގުއުތުރު ހާޓްލީޕޫލްގެ ރަށެއް ކަމުގައިވާ ސައުތުޕޯޓްގައި ދިން ވަޅީގެ ހަމަލާތަކެއްގައި ތިން ކުޑަކުދިން މަރުވުމުން ފެށި މުޒާހަރާތަކެކެވެ.

މި މުޒާހަރާތަކާއި ގުޅިގެން އެގައުމުގައި ހުންނަ ދިވެހި ހައި ކޮމިޝަނުން އެގައުމުގައި އުޅޭ ދިވެހީން އެ ކޮމިޝަނުގައި ރަޖިސްޓްރީ ވުމަށް އެދިފައިވާއިރު، މީގެ ކުރިންވެސް ޚާރިޖީ ވުޒާރާއިން ވަނީ އެގައުމަށް ދަތުރުކުރާ އަދި އެގައުމުގައި ދިރިއުޅޭ ދިވެހީން ސަމާލުވުމަށް އެދިފައެވެ.