އިސްރާއީލުން ޣައްޒާގައި ހިންގަމުންދާ ގަތުލުއާއްމާއި ދެކޮޅަށް ދެކުނު އެފްރިކާއިން އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އަށް ހުށަހަޅާފައިވާ މައްސަލައިގައި ތުރުކީން ބައިވެރިވުމަށް ހުށަހަޅައިފިއެވެ.

މި މައްސަލައިގައި ބައިވެރިވާނެކަން ތުރުކީން ހާމަކޮށްފައިވަނީ މިއަހަރުގެ މެއި މަހުގެ ތެރޭގައެވެ. އެގައުމުން އޭރު ވަނީ މި މައްސަލައިގައި ރަސްމީކޮށް ތަދައްޚުލުވުމުގެ މަސައްކަތް ފެށުމަށްޓަކައި ވާން ޖެހޭ ތައްޔާރީތައް ފަށާފައިވާކަމަށް ބުނެފައެވެ.

ތުރުކީގެ ފޮރިން މިނިސްޓަރު ހަކާން ވިދާޅުވީ ރަސްމީކޮށް އެކަމަށް އެދިފައިވަނީ އިއްޔެ ކަމަށެވެ. އަދި ޣައްޒާގައި ހިންގާ ނަސްލު ނައްތާލުން ހުއްޓުވުމަށާއި އިސްރާއީލާއި އެގައުމުގެ ސަޕޯޓަރުންނަށް އެކަން ހުއްޓުވުމަށް ޕްރެޝަރުކުރުމަށް ވެސް ހަކާން ގޮވާލެއްވިއެވެ.

Advertisement

ތުރުކީން މި މައްސަލައިގައި ބައިވެރިވުމާއިމެދު އަދި އައިސީޖޭއިން ގޮތެއް ނިންމާފައެއް ނުވެއެވެ.

އިސްރާއީލުން ހިންގަނީ ގަތުލު އާއްމުކަން ކަނޑައަޅައި އެކަން ހުއްޓުވުމަށް ދެކުނު އެފްރިކާއިން އައިސީޖޭއަށް މި މައްސަލަ ހުށަހަޅާފައިވަނީ މިދިޔަ އަހަރުގެ ޑިސެންބަރު މަހުގެ 29 ވަނަ ދުވަހުއެވެ.

އެއާއިއެކު، މިއަހަރުގެ ޖެނުއަރީ މަހު އައިސީޖޭން ވަނީ ޣައްޒާގެ މުސްލިމުންނާއި ދެކޮޅަށް ހިންގާ ހުރިހާ އަމަލެއް ހުއްޓާލައި، ޣައްޒާއަށް އެހީ ވެއްދޭނެ މަގު ފަހިކުރުމަށް އިސްރާއީލަށް އަމުރުކޮށްފައެވެ.

އެހެންނަމަވެސް ހައްދުފަހަނައަޅާފައިވާ ޔަހޫދީން މިކަމަށް ބީރު ކަންފަތެއް ދީފައިވާއިރު، އެމީހުން އަންނަނީ މިކަން ދޮގު ކުރަމުންނެވެ. އޭގެ ފަހުންވެސް ޣައްޒާގެ ގަތުލުއާއްމާއި ގުޅިގެން އައިސީޖޭއިން އިސްރާއީލުގެ މައްޗަށް މިއަހަރުގެ ތެރޭގައި އެކި ފަހަރު މަތިން އަމުރުތައް ނެރުނު ނަމަވެސް މިއިން އެއްވެސް ކަމަކަށް ޔަހޫދީން ބޯލަބާފައެއް ނުވެއެވެ.