ޖަޕާނަށް 7.1 މެގްނިޓިއުޑްގެ ބާރުގަދަ ބިންހެލުމެއް އައުމާއި ގުޅިގެން އެގައުމުން ސުނާމީގެ އިންޒާރު ނެރެފިއެވެ.

ޖަޕާނުގެ ދެކުނުގެ އައްސޭރިފަށަށް އައި މި ބިންހެލުމާއި ގުޅޭގޮތުން ޖަޕާން މީޓިއޮރޮލޮޖިކަލް އޭޖެންސީން ފުރަތަމަ ބުނެފައިވަނީ ބިންހެލުން އައީ އެ ގައުމުގެ ދެކުނުގައި އޮންނަ ކިޔޫޝޫ ކައިރިއަށް، 30 ކިލޯމީޓަރު އަޑިއަށް ކަމަށެވެ. ނަމަވެސް ފަހުން އެމެރިކާގެ ޖިއޮލޮޖިކަލް ސާވޭއިންވަނީ ބިންހެލުމުގެ ބާރުމިން 7.1 އަށް އަރައި ކަމަށް ބުނެފައެވެ.

އެ ސަރަހައްދުގެ އައްސޭރިފަށާއި ދުރުގައި ތިބުމަށް އާއްމުނަށް އިލްތިމާސްކޮށްފައިވާއިރު، މިހާތަނަށް މި ބިންހެލުމުގެ ސަބަބުން އެއްވެސް ގެއްލުމެއް ލިބިފައިވާކަމަށް ރިޕޯޓް ކުރެވިފައިއެއް ނުވެއެވެ.

އެހެންނަމަވެސް، ޖަޕާނުގެ އެންއެޗްކޭ ޕަބްލިކް ޓީވީން ބުނީ ބިންހެލުން އައި ސަރަހައްދާއި ކައިރީގައި އޮންނަ މިޔާޒާކީ އެއާޕޯޓުގެ ކުޑަދޮރުތައް ފަޅައިގެން ގޮސްފައިވާ ކަމަށެވެ.

މި ބިންހެލުމުގެ ސަބަބުން އެންމެ ބާރަށް ލޮޅުން އަރާފައިވަނީ ނިޗިނާން ސިޓީއާއި ކައިރީގައިވާ ކިއުޝޫ ޖަޒީރާގެ މިޔާޒާކީ ޕްރިފެކްޗަރގެ ސަރަހައްދުތަކަށެވެ.

ޖަޕާން މީޓިއޮރޮލޮޖިކަލް އޭޖެންސީން ބުނީ، ބިންހެލުން އައިތާ ގާތްގަނޑަކަށް ބައިގަޑިއިރު ފަހުން ކިޔުޝޫގެ ދެކުނު އައްސޭރިފަށާއި ކައިރީގައި އޮންނަ ޝިކޯކޫ ޖަޒީރާގެ ބައެއް ހިސާބުތަކުން 1.6 ފޫޓުގެ ރާޅުތަކެއް ފެނިފައިވާކަމަށެވެ.

ޖަޕާނަކީ ޕެސިފިކް ކަނޑުގެ ވަށައިގެންވާ ސެއިސްމިކް ފޯލްޓްތަކުގެ ރޮނގު ކަމަށްވާ ޕެސިފިކް "ރިންގް އޮފް ފަޔަރ" ގައި އޮންނަ ގައުމަކަށްވާއިރު، މިއީ ދުނިޔޭގައި އެންމެ ގިނަ ބިންހެލުން އަންނަ އެއް ގައުމެވެ.