މިޔަންމާގެ ހުޅަނގުގައި އޮންނަ ރާޚައިން ސްޓޭޓްގެ މައުންގްޑާއު ޓައުންގައި ދިރިއުޅެމުންދާ ރޮހިންޔާ މުސްލިމުންނާއި ދެކޮޅަށް އެގައުމުގެ ހަތިޔާރު އެޅި ޖަމާއަތެއް ކަމަށްވާ އަރަކާން ސިފައިން ހަމަލާދީ، އެ ސަރަހައްދުގައި ދިރިއުޅޭ އާއްމުން މަރަން ފަށައިފިއެވެ.

ރޮހިންޔާ އެކްޓިވިސްޓުންނާއި ލޯކަލް މީޑިއާތަކުން ބުނާ ގޮތުގައި ފާއިތުވި ދުވަސްތަކުގައި އަރަކާން ސިފައިން ވަނީ ބަންގްލަދޭޝްއާ މިޔަންމާ ބޯޑަރުގެ ކައިރީގައި އޮންނަ ރަށެއްގެ ކޮންޓްރޯލް ނެގުމާއިއެކު، އެ ސަރަހައްދަށް ޑްރޯން ހަމަލާތަކެއްދީ، އެތަނުގައި ދިރިއުޅޭ އާއްމުން މަރަން ފަށާފައެވެ.

އަރަކާން ސިފައިންގެ މި ލާއިންސާނީ އަމަލުތަކުގައި ކުޑަކުދިން ވެސް ދޫނުކުރާއިރު، މިކަމާއި ގުޅިގެން އެގައުމުގެ ޔޫސީ ބަރކްލީ ސްކޫލް އޮފް ލޯގެ ހިއުމަން ރައިޓްސް ސެންޓަރުގައި މަސައްކަތްކުރާ މަޝްހޫރު ރޮހިންޔާ އެކްޓިވިސްޓެއް ކަމަށްވާ ވައި ވައި ނޫ އިއްޔެ އެކްސްގައި ކުރި ޕޯސްޓެއްގައި ވިދާޅުވީ، އެ ސަރަހައްދުގެ ހާލަތު މިހާރު ކުރިއަށް ވުރެ ވެސް ގޯސްވެފައިވާކަމަށާއި، އެ އަނިޔާތަކުގެ ޝިކާރައަކަށް ރޮހިންޔާ މުސްލިމުން ވެފައިވާކަމަށެވެ.

އެ ސަރަހައްދުގެ އާއްމުންނާއި ހަވާލާދީ ވައި ވައި ނޫ އިތުރަށް ވިދާޅުވީ، ރޮހިންޔާ މީހުން މައުންގްޑޯގެ ބައެއް ސަރަހައްދުތަކުން ފޮނުވާލާފައިވާކަމަށާއި، އެމީހުން މިހާރު ތާށިވެފައިތިބީ ބަންގްލަދޭޝްއާއި އެ ސަރަހައްދާއި ކައިރީގައި އޮންނަ ނާފް ކޯރުގައި ކަމަށެވެ.

މީގެ އިތުރުންވެސް ރޮހިންޔާގެ ނޫސްވެރިޔަކު އެކްސްގައި ކުރި ޕޯސްޓެއްގައި ބުނީ، އަރަކާން ސިފައިން ހަމައެކަނި އިއްޔެވެސް 300 އަށް ވުރެ ގިނަ ރޮހިންޔާ މުސްލިމުން މަރާލާފައިވާކަމަށާއި، މިކަމާއި ގުޅިގެން އެތައް ހާސް ބަޔަކު ނާފް ކޯރާއި ދިމާލަށް ދިޔުމަށް ދަތުރުފަށާފައިވާ ކަމަށެވެ. މި ޕޯސްޓާއިއެކު އޭނާ ވަނީ އަރަކާން ސިފައިން އަނިޔާވެރިކަމާއި އެކު މަރާލާފައިވާ ހަށިތައް ފެންނަ ވީޑިއޯއެއް ވެސް އާއްމުކޮށްފައެވެ.

އަރަކާން ސިފައިން މަރާލާފައިވާ ކުދިންތަކެއް-- ފޮޓޯ: އައިއޭސީ

މި ހަމަލާތަކުގައި މިހާތަނަށް 500 އަށްވުރެ ގިނަ މީހުން ޒަހަމްވެފައިވާއިރު މި އަހަރުގެ ޖޫން މަހު އަރަކާން ސިފައިން ވަނީ އެ ސަރަހައްދު އެމީހުންގެ އަތްދަށަށް ގެންނާނެކަމުގެ އިންޒާރުދީ، އެ ސަރަހައްދުގައި ދިރިއުޅެމުންދިޔަ މީހުން އެތަނުން ނުކުތުމަށް އަމުރުކޮށްފައެވެ.

މި ސަރަހައްދުގައި ތާށިވެފައިތިބި ގިނަ މީހުންނަކީ 2017 ވަނަ އަހަރު މިޔަންމާ ސަރުކާރުން ރޮހިންޔާ މުސްލިމުންނާއި ދެކޮޅަށް ހިންގި ލާއިންސާނީ އޮޕަރޭޝަނެއް ކަމަށްވާ "ކްލިއަރެންސް އޮޕަރޭޝަން" އިން ސަލާމަތްވި މީހުންނެވެ.

މިކަމާއި ގުޅިގެން "ވޮއިސް" އަށް މައުލޫމާތުދެއްވަމުން އިންޓަނޭޝަނަލް އެއިޑް ކެމްޕެއިން (އައިއޭސީ) އިން ބުނީ، އެ ޖަމިއްޔާއިން އެ ސަރަހައްދުގައި ހަރަކާތްތެރިވަމުންދާ ކަމަށާއި، ކުރެވެން ހުރި ކަންކަން ބެލުމަށްފަހު އެހީތެރިކަން ފޯރުކޮށްދޭނެ ކަމަށެވެ.

ހަމައެއާއިއެކު، މި ހަމަލާތަކުގެ ސަބަބުން ބޯހިޔާވަހިކަމާއި ކާބޯތަކެއްޗަށް އެދި މިޔަންމާގެ ސިއްޓްވޭއަށް ގިނަ އަދަދެއްގެ މީހުން އަންނަމުންދާ ކަމަށާއި، އެމީހުންނަށް އެހީވެވެން އޮތް ހުރިހާ ގޮތަކަށް އެހީވާނެ ކަމަށް އައިއޭސީ އިން މައުލޫމާތުދެއެވެ.