ހދ. ހަނިމާދޫ އިންޓަނޭޝަލް އެއާޕޯޓް ހިމެނޭ ސަރަހައްދުގައި ތިން ރިސޯޓް ހުޅުވުމަށް އިންވެސްޓަރުން ހޯދަމުން އަންނަކަމަށް ފަތުރުވެރިކަމާއި ބެހޭ ވަޒީރު އިބްރާހިމް ފައިސަލް ވިދާޅުވެއްޖެއެވެ.

އިންޑިއާގައި ކުރިއަށް ދިޔަ 'ވެލްކަމް އިންޑިއާ' ރޯޑްޝޯގެ ކާމިޔާބީގެ މައުލޫމާތު މީޑިއާއަށް ދިނުމަށް މިއަދު އެމްއެމްޕީއާރުސީގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ވަޒީރު ފައިސަލް ވިދާޅުވީ، އެއާޕޯޓެއް އެންމެ ރަނގަޅު ގޮތުގައި ހިންގަން އެ ސަރަހައްދުގައި 4،000 އަދި 6،000 އެނދު ހުންނަން ޖެހޭނެކަމަށެވެ.

ހަނިމާދޫ އެއާޕޯޓް ހިމެނޭ ސަރަހައްދުގައި ތިން ރިސޯޓެއް ގާއިމުކުރުމާ ގުޅޭގޮތުން އިންވެސްޓަރުން ލިބޭތޯ މަސައްކަތް ކުރަމުން އަންނަކަން ފާހަގަކުރައްވަމުން ވަޒީރު ފައިސަލް ވިދާޅުވީ، ހަނިމާދޫ އެއާޕޯޓް ހުޅުވެންވާއިރަށް އެތަނުގައި 2-3 ރިސޯޓް ޕްރޮޖެކްޓެއް ފެށޭވަރަށް އިންވެސްޓަރުންތަކެއް ހޯދުމަކީ އަމާޒެއް ކަމަށެވެ.

Advertisement

ފައިސަލް ވިދާޅުވީ، ފަތުރުވެރިކަމުގެ ދާއިރާގައި  ހަރަކާތްތެރިވާ މަޓީ، މަޓާޓޯޯ އަދި ގެސްޓްހައުސް އެސޯސިއޭޝަންއާ އެކު ވަރަށް ގާތުން ގުޅިގެން މަސައްކަތް ކުރެވޭ ކަމަށާއި، ރައީސް ޑރ.މުޢިއްޒުގެ ސަރުކާރުގައި ދިވެހިރާއްޖޭގެ ފަތުރުވެރިކަން އެހެން ހަރުފަތަކަށް ގެންދާނީ މި އިންޑަސްޓްރީ ކުރިއެރުވުމަށް މަސައްކަތްކުރާ ހުރިހާ ފަރާތްތަކުގެ ހިޔާލާއި މަޝްވަރާ އަދި އެއްބާރުލުމާ އެކު ކަމަށެވެ.