ރާއްޖޭގައި ގަވައިދާ ހިލާފަށް އުޅެމުން އަންނަ ބިދޭސީން ހޯދައި އެމީހުން ޑީޕޯޓް ކުރުމަށް ސަރުކާރުން ކުރަމުން އަންނަ މަސައްކަތަކީ ވަރަށް ވަރުގަދަ މަސައްކަތެއް ކަމަށް ކުރީގެ ރައީސް އަބްދުالله ޔާމީން ރޭ ތައުރީފް ކުރައްވައިފިއެވެ.

ގާނޫނާއި ގަވާއިދާ ހިލާފަށް ރާއްޖޭގައި މަސައްކަތްކުރާ ބިދޭސީންނާ ދެކޮޅަށް ފުލުހުންނާ އިމިގްރޭޝަނުން ކުރިއަށް ގެންދާ އޮޕަރޭޝަން ތަކުގައި ލޯކަލް މާރުކޭޓުތަކާއި ކޮފީ/ޓޭކްއަވޭ ތަންތަނާއި ބޯކޮށުމުގެ ހިދުމަތްދޭ ތަންތަނާއި ފިހާރަތަކަށް ކާބޯތަކެތި ޑެލިވާ ކުރުމުގެ ހިދުމަތްދޭ ތަންތަން ފާސްކޮށް، ގިނަ އަދަދެއްގެ ބިދޭސީން ތަކެއް ހައްޔަރުކޮށް އެފަދަ ގިނަ ވިޔަފާރިތަކެއް އަންނަނީ ބަންދު ކުރަމުންނެވެ.

އަދި އެ އޮޕަރޭޝަންގެ ތެރެއިން މިހާތަނަށް 2،000 އަށް ވުރެ ގިނަ ބިދޭސީން ވަނީ ޑީޕޯޓުކޮށްފައެވެ.

Advertisement

އެކަމަށް އަލިއަޅުވާލައި ވާހަކަ ދައްކަވަމުން، ޕީއެންއެފުން ރޭ ބޭއްވި ޖަލްސާގައި ޔާމީން ވިދާޅުވީ ގަވައިދާ ހިލާފަށް އުޅޭ ބިދޭސީންގެ މައްސަލަ ހައްލު ކުރަން ކުރާ މަސައްކަތުގައި ހޯމްލޭންޑު ސެކިއުރިޓީ މިނިސްޓަރު އަލީ އިހުސާނާއި އިމިގްރޭޝަން ކޮންޓްރޯލާ މުހައްމަދު ޝައްމާން ވަހީދަށް ކްރެޓް ދެއްވަން ބޭނުންފުޅުވާ ކަމަށެވެ.

ޔާމީން ވިދާޅުވި ގޮތުގައި ރާއްޖޭގައި ގަވައިދާ ހިލާފަށް އުޅޭ ބިދޭސީންނަކީ އެއް އަހަރު ދުވަހުގެ ތެރޭގައި ރާއްޖެ އެތެރެވެފައި ތިބި ބައެއް ނޫން ކަމަށާ އެހެނެއް ކަމަކު އެއީ އެތައް އަހަރެއްގެ މަތީން ރާއްޖެ އެތެރެވެފައިވާ ބައެކެވެ.

މިއާއެކު ގާނޫނާ ޚިލާފު އެއްވެސް ކަމަކަށް ތާއީދު ނުކުރައްވާކަން ފާހަގަކުރައްވައި ޔާމީން ވިދާޅުވީ ބިދޭސީންގެ މައްސަލަ އަކީ އަޅާނުލެވި އޮތް މައްސަލައަކަށް ވާއިރު އެކަން ހައްލު ކުރަން މަސައްކަތް ކުރާއިރު، އެކަން ކުރާނީ “ކެންސަރަށް ފަރުވާ ކުރާ ގޮތަށްތޯ ނޫނީ ހަށިގަނޑަށް އެއަށްވުރެ ލުއިކޮށްތޯ” ބަލަންވާ ކަމަށެވެ. 

ޔާމީން ވިދާޅުވީ ގަވާއިދާ ޚިލާފް ބިދޭސީން ޑީޕޯޓް ކުރާ ކުރުމަށް ތާއީދު ކުރައްވާ ކަމަށާ، އެހެން ނަމަވެސް ބަންގްލަދޭޝްގެ ރައްޔިތުންތަކެއް ޑީޕޯޓް ކުރާއިރު ވަރަށް ވިސްނަން ޖެހޭ ކަމަށެވެ. އެގޮތުން، ޔާމީންގެ ވެރިކަމުގައި މާލެއަށް ދިމާވި ފެނުގެ ކާރިސާއާ ގުޅިގެން ވެސް ބަންގްލަދޭޝް އިން އެހީތެރިކަން ފޯރުކޮށްދިން ކަން ޔާމީން ފާހަގަ ކުރެއްވިއެވެ.

މީގެ އިތުރުން، ޔާމީން ވިދާޅުވީ ބަންގްލަދޭޝް މީހުން ރާއްޖެ އަންނަނީ އެ ބަންގްލަދޭޝް އަދި ރާއްޖޭގައި ހުންނަ އެޖެންޓަކަށް ގިނަ އަދަދެއްގެ ފައިސާ ދީފަ ކަމަށާ، އެމީހުން އައުމުން، ތަންތަނުގައި ރަޖިސްޓްރީ ކުރުމުގެ ބަދަލުގައި ފްރީ ވިސާއެއްގައި އުޅެވޭނެއޭ ކިޔައި އޮޅުވާލައި، ގާނޫނާ ހިލާފު ކަންތައްތަކެއް ކުރަނީ ދިވެހިން ކަމަށެވެ. އެ މީހުންނާ މެދުގައި ފިޔަވަޅު ނޭޅޭތީ ޔާމީން ވަނީ ކަންބޮޑުވުން ފާޅު ކުރައްވައިފައެވެ.

"މި އަންނަ މީހުން އަންނަނީ އެމީހުންގެ މުޅި ދިރިއުޅުން ރަހުނުކޮށްފައި ލާރި ނަގައިގެން އަދި ނުވިތާކަށް އެމީހުން ލޯން ނަގައިގެން 13،000/14،000 ޑޮލަރު ދީފައި އެކޮޅުން އެޖެންޓަކަށް، މިކޮޅުން އެޖެންޓަކަށް ދީފައި،" ޔާމީން ވިދާޅުވިއެވެ.

އެހެންކަމުން ބިދޭސީންގެ މައްސަލަ ހައްލު ކުރާއިރު މުއްދަތަކަށް ބަހާލައިގެން އެކަން ކުރުމުން އެންމެނަށްވެސް ފަސޭހަ ވާނެ ކަމަށް ޔާމީން ވުދާޅުވުއެވެ.