ރާއްޖޭގައި ފުރަތަމަ ފަހަރަށް އަންހެނެއް ލިޔުއްވި ޚުތުބާ، މިއަދުގެ ހުކުރު ނަމާދުގައި ރާއްޖޭގެ އެކި ކަންކޮޅުތަކުގައި އިއްވައިފިއެވެ. 

“އާއިލީ ގުޅުން ދެމެހެއްޓުމުގެ މުހިންމުކަން” މައުޟޫއަށް މިއަދު އިއްވި ޚުތުބާ ލިޔުއްވާފައިވަނީ އިސްލާމީ ކަންތައްތަކާބެހޭ ވުޒާރާގެ ޑެޕިޔުޓީ މިނިސްޓަރު، އުސްތާޒާ ހައްވާ ލަތީފެވެ. 

މިކަން ފާހަގަކުރައްވައި އިސްލާމީ ކަންތައްތަކާބެހޭ ވުޒާރާގެ ވަޒީރު ޑރ. މުހައްމަދު ޝަހީމް ޢަލީ ސަޢީދު މީސްމީޑިއާގައި ކުރެއްވި ޕޯސްޓެއްގައި ވިދާޅުވީ، ފުރަތަމަ ފަހަރަށް އަންހެން އިލްމުވެރިޔަކު ލިޔުއްވި މި ޚުޠުބާ މިއަދު ގެނެސްދެވިފައިވަނީ އަލަށް ލައިވް ޓްރާންސްލޭޝަން ސަބްޓައިޓަލް އާއިވެސް އެކުގައި ކަމަށެވެ.

އެގޮތުން އިސްލާމީ މަރުކަޒު ޓީވީތަކަށާ މިނިސްޓްރީގެ ޕޭޖަށް ޚުތުބާގެ ތަރުޖަމާ ލައިވް ކޮށް މިއަދު ދައްކާފައިވާއިރު، އަންނަ ހަފްތާގައި ހުރިހާ ޓީވީ ތަކަށް ވެސް ތަރުޖަމާގެ ފީޑް ދެވޭނެ ކަމަށް ވަޒީރު ވިދާޅުވިއެވެ. 

މިއަދުގެ ޚުތުބާ ލިޔުއްވި ހައްވާ ލަޠީފަކީ މީގެ ކުރިން އިސްލާމިކް ޔުނިވަސިޓީގެ ޑެޕިއުޓީ ވައިސް ޗާންސެލަރަކަށް ހުންނެވި ބޭފުޅެކެވެ.

އެކަމަނާ ދީނީ ތަޢުލީމް ހާސިލް ކުރެއްވީ މިސްރުގެ އަލް އަޒުހަރު ޔުނިވަސިޓީންނެވެ. 

ހައްވާ ލަޠީފް ލިޔުއްވި ޚުތުބާގައި ވަނީ، ޢާއިލާގެ ފަރާތުން ރައްކާތެރިކަމާއި، އަޅައިލުމާއި، ލޯބި ނުލިބުމުގެ ސަބަބުން ޢާއިލީވެށްޓެއްގައި ދިރިއުޅުމުގެ ނަސީބުން މަޙުރޫމްވެފައިވާ އެތައް އެތައް ކުޑަކުދީންނާއި، ދޮށީޢުމުރުގެ މީހުން މި ދިވެހި ފަސްގަނޑުގައިވެސް ދިރިއުޅެމުންދާ ކަން ފާހަގަކޮށްފައެވެ.

އަދި އެއީ ދީނީގޮތުންނާއި އިޖްތިމާޢީގޮތުން ބަލާއިރު، ކަންބޮޑުވާން ޖެހޭ ކަމެއް ކަމަށާ، ޢާއިލީ ވެށްޓެއްގައި އުފާވެރިކަމާ އެކު ދިރިއުޅުމަކީކޮންމެ ފަރުދަކަށް ވެސް ލިބިގެންވާ ޙައްޤެއް ކަމަށް ކަމަށްވެސް ބުނެފައިވެއެވެ

މީގެ އިތުރުން ޢާއިލީ ގުޅުން ދެމެހެއްޓުމުގެ މުހިންމު ކަމަށާ، އަދި އެގުޅުން ކަނޑާލުމުގެ ބިރުވެރިކަމަށް ވަނީ އަލިއަޅުވާލާފައެވެ.

މިއާއެކު ޚުތުބާގައި ވަނީ ޢާއިލީ ގުޅުން ދެމެހެއްޓުމަށް ކަމާބެހޭ އެންމެހާ ފަރާތްތައް ގުޅިގެން، ޤައުމީފެންވަރުގައި ގިނަގުނަ މަސައްކަތްތަކެއް ކުރުމަކީ މިއަދު ކުރާން ޖެހިފައިވާ ދީނީ، އިޖުތިމާޢީ ބޮޑު މަސައްކަތެއް ކަމަށް ބުނެފައެވެ.