މިދޫގައި މިހާރު ކުރިއަށްދާ "މައިލޯ އިތާ އިންޓަރ ރިސޯޓް ވޮލީބޯޅަ ޗެންޕިއަންޝިޕް 2024" ގައި ހުކުރު ދުވަހުގެ ރޭ ކުޅެވުނު ދެވަނަ މެޗުގައި ގުރޫޕް ބީގެ ހެރިޓެންސް އާރަށާއި ފާރުފުށި ރިސޯޓް އެންޑް ސްޕާ ވާދަކުރި މެޗު ސީދާ ތިން ސެޓުން ކާމިޔާބުކޮށް އާރަށުން ސެމީ ފައިނަލުގެ އުންމީދު އައުކޮށްފިއެވެ.

މުބާރާތުގައި އާރަށުން ކުޅުނު ފުރަތަމަ މެޗުގައި ޖޯލި މޯލްޑިވްސް އަތުން ސިދާ ތިން ސެޓު އެޓީމު ބަލިވެފައިވާއިރު، ފާރުފުށީގެ ފުރަތަމަ މެޗުގައި ވާދަވެރި ކުޅުމަކަށްފަހު ރީތިފަރު އަތުން އެޓީމު ބަލިވީ ތިން ސެޓް ދެ ސެޓުންނެވެ. 

މެޗުގެ ފުރަތަމަ ސެޓުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ، މިސެޓުގެ ފަހު ހަތަރު ޕޮއިންޓާއި ހަމައަށް ލީޑު ކުރަމުން ދިޔައީ ފާރުފުށިންނެވެ. ނަމަވެސް ފަހުވަގުތު ލިޑު ހޯދައި އާރަށުން ސެޓް ކާމިޔާބުކުރީ ތިނަ ޕޮއިންޓްގެ ފަރަގަކާއެކު 22-25 ގެ ނަތީޖާއަކުންނެވެ.

މެޗުގެ ދެވަނަ ސެޓުގައި ވެސް ވަރުގަދަކޮށް ފެށީ ފާރުފުށިންނެވެ. އަދި ސެޓުގެ ވަކިހިސާބަކުން އެޓީމުން ވަނީ ތިން ޕޮއިންޓްގެ ލީޑެއްވެސް ނަގާފައެވެ. ނަމަވެސް ފުރަތަމަ ސެޓެކޭ އެއްގޮތަށް ފަހަތުންއަރައި ލީޑު ހޯދައި އާރަށުން މި ސެޓުވެސް ކާމިޔާބުކުރީ ތިން ޕޮއިންޓްގެ ލީޑަކާއެކު 22-25 ގެ ނަތީޖާއަކުންނެވެ.

މެޗުގެ ފުރަތަމަ ދެސެޓެކޭ އެއްގޮތަށް ތިންވަނަ ސެޓުގައި ވެސް ރަނގަޅަށް ފެށީ ފާރުފުށިންނެވެ. އަދި 12-09 ގެ ނަތީޖާއަކުން އެޓީމު ލީޑު ވެސް ހޯދިއެވެ. ނަމަވެސް އާރަށުން ވަނީ ފަހަތުން އަރައި ފަސް ޕޮއިންޓްގެ ފަރަގަކާއި 20-25 ގެ ނަތީޖާއަކުން ސެޓް ކާމިޔާބުކޮށް މުބާރާތުގެ ފުރަތަމަ މޮޅު ހޯދާފައެވެ. އަދި މެޗުގެ މޮޅު ކުޅުންތެރުއަކަށް ހޮވުނީ ހެރިޓެންސް އާރަށުގެ ޗަމީރާ ޕްރަސާދު އެވެ.

މި މުބާރާތަކީ މީދޫގެ ކުލަބު ޖަމުއިއްޔާއެއް ކަމަށްވާ އެކުވެރި ކްލަބުން އިންތިޒާމުކޮށް، މި އަތޮޅުގައި ހިމެނޭ ރިސޯޓްތަކަށް ހުޅުވާލައިގެން 2023 ވަނަ އަހަރުން ފެށިގެން ބާއްވަމުން އަންނަ މުބާރާތެކެވެ. އަދި މިއަހަރުގެ މުބާރާތުގައި ޖުމްލަ އަށް ޓީމަކުން ބައިވެރިވެފައިވާއިރު، މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި އަށް ޓީމު ދެ ގުރޫޕަކަށް ބަހާލައިގެންނެވެ. އަދި ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު ސެމީ ފައިނަލަށް ހޮވޭ ގޮތަށެވެ.

އެގޮތުން ގުރޫޕް އޭގައި އެންމެފަހުގެ ޗެންޕިއަން ޖޯލި ބީންގ އާއި ރަނަރަޕް ކުޑަފުށީގެ އިތުރުން ދެން ހިމެނެނީ މީދުއްޕަރު އަދި މާމުނަގައު އެވެ. އަދި ގުރޫޕް ބީގައި ހިމެނެނީ ރީތިފަރު، ފާރުފުށި، ޖޯލި މޯލްޑިވްސް އަދި ހެރިޓެންސް އާރަށެވެ.

މީގެ އިތުރުން މިމުބާރާތުގެ ޓައިޓަލް ސްޕޮންސަރ އަކަށް މައިލޯ ހަމަޖައްސާފައިވާއިރު، މުބާރާތުގެ މީޑިއާ ޕާޓްނަރަކީ ވޮއިސް ސްޕޯޓްސް އެވެ.