މާލޭގެ އުތުރުފަރާތުން ބޭރުމަގު ފުޅާކުރުމުގެ މަސައްކަތް ސަރުކާރުން ބަޖެޓްކޮށްގެން ކުރިއަށްގެންދާނެކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.
ރައީސް ޑރ.މުޢިއްޒު މިފަދައިން ވިދާޅުވީ، މާލެ ސިޓީ ކައުންސިލާއިއެކު ބޭއްވި ބައްދަލުވުމެއްގައި ވާހަކަފުޅު ދައްކަވަމުންނެވެ.
ރައީސް ޑރ.މުޢިއްޒު ވިދާޅުވީ، ބޯހިޔާވަހިކަމުގެ އިތުރުން މާލެއަށް ދިމާވެފައިވާ ދެން އެންމެ ބޮޑު މައްސަލަ އަކީ މަގުތަކުގެ މައްސަލަ ކަމަށެވެ.
ޗައިނާ ސަރުކާރުން ދިން ހިލޭ އެހީ ދެކަމަކަށް ހޭދަކުރަން ހަމަޖެހިފައިވާކަން ފާހަގަކުރައްވަމުން ރައީސް ޑރ.މުޢިއްޒު ވިދާޅުވީ، އޭގެތެރެއިން އެއްކަމަކީ މާލެއާއި ވިލިމާލޭގެ ހުރިހާ މަގެއް ހެދުން ކަމަށެވެ. އަދި އަނެއްކަމަކީ ވިލިމާލޭގައި ޓާޝަރީ ހޮސްޕިޓަލެއް އެޅުންކަން އެމަނިކުފާނު ފާހަގަކުރެއްވިއެވެ.
"މާލޭގެ ހުރިހާ މަގެއް މިހެދެނީ ބިމުގެ އަޑީގައި މިހިރަ ފެނާއި ނަރުދަމާ އާއި، ކަރަންޓާއި އެކިކަހަލަ ސާވިސް ކޭބަލްތައް، ޑޭޓާ ކޭބަލް ތައް ވިޔަސް ބިމު އަޑީގައި މިހިރަ ނެޓްވޯކްވެސް އާކުރެވި ނޫނިއްޔާ ތަރުތީބު ކުރެވިގެންދާ ގޮތަކަށް ދެން މަގުތައް ހަދާ ނިމިގެން އަލުން އެކިކަހަލަ ބޭނުންތަކަށް ރޫޅާލަން ޖެހޭ ވަރު މަދު ގޮތަކަށް ޕްރޮވިޝަންސް ތައް ލިބިގެން އިރާދަކުރެއްވިއްޔާ،"
ރައީސް ޑރ.މުޢިއްޒު ވިދާޅުވިއެވެ.
ރައީސް ޑރ.މުޢިއްޒު ވިދާޅުވީ، މި މަޝްރޫއުގައި ނުހިމެނި އޮންނާނީ މާލޭގެ އުތުރުފަރާތުން ބޭރުމަގު ފުޅާ ކުރުމުގެ ބައި އެކަނި ކަމަށެވެ. އެކަން ހައުސިން މިނިސްޓްރީން ބަޖެޓް ކޮށްގެން ވަކި މަޝްރޫއުއެއްގެ ގޮތުގައި، އެ މަގު ފުޅާ ކުރަން ޖެހޭ ވަރަށް ފުޅާކޮށް ތޮށިލުމުގެ މަސައްކަތް ކުރިއަށްގެންދާނެ ކަމަށް ރައީސް ޑރ.މުޢިއްޒު ވިދާޅުވިއެވެ.
ގެދޮރުގެ މައްސަލައިގައި ވެސް ކައުންސިލްގެ ބައިވެރިވުން އޮންނަ ފަދައިން މި މަޝްރޫއުގައި ވެސް ކައުންސިލްގެ ބައިވެރިވުން އޮންނާނެކަން ރައީސް ޑރ.މުޢިއްޒު ވަނީ މާލެސިޓީ ކައުންސިލާއެކު ބޭއްވި ބައްދަލުވުމުގައި ފާހަގަކުރައްވާފައެވެ.
Advertisement
This content is created and paid for by advertisers and does not involve Voice Journalists
