ހުޅުމާލޭ ދެވަނަ ފިޔަވަހީގައި އިމާރާތްކުރާ 4،000 ފުލެޓު ލިބޭ މީހުންގެ ލިސްޓު ރިވިއުކުރުމުގައި ހައުސިން މިނިސްޓްރީއާ އެކު މަސައްކަތްކުރަން މާލެ ސިޓީގެ ކައުންސިލަރުން ހިމެނޭ ކޮމިޓީއެއް އެކުލަވައިލަން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ނިންމަވައިފިއެވެ.
ރައީސް ޑރ.މުޢިއްޒު މިފަދައިން ނިންމަވާފައިވާކަން އިއުލާނުކޮށްފައިވަނީ މިއަދު މާލެ ސިޓި ކައުންސިލާއިއެކު ބޭއްވި ބައްދަލުވުމުގެ ތެރެއިންނެވެ.
މިގޮތުން މި ބައްދަލުވުމުގެ ތެރެއިން ގަލޮޅު އުތުރު ދާއިރާގެ ކައުންސިލަރު ސައިފް ފާތިހު ވަނީ ފުލެޓު ލިސްޓު ރިވިއުކުރުމަށް ފަހު، ހައްގު ނޫން އެއްވެސް މީހަކަށް ލިބިގެން ނުވާނެ ކަމަށާއި، އެ ލިސްޓު ރިވިއުކުރުމުގައި ސިޓި ކައުންސިލްގެ އޮބްޒާވިން މެންބަރެއް ބައިވެރިވާން ޖެހޭނެކަމަށް ވިދާޅުވެފައެވެ.
ސައިފްގެ ވާހަކައަށް ރައްދު ދެއްވަމުން ރައީސް ޑރ.މުޢިއްޒު ވިދާޅުވީ، މާލެ ސިޓީގެ ގެދޮރުވެރިކަމުގެ މައްސަލަ ހައްލުކުރެވޭނީ ރައްޔިތުން ފަރާތުން ހޮވާފައި އޮތް ކައުންސިލްގެ ދައުރު އޮވެގެންކަމަށެވެ. އެކަމަށްޓަކައި،ކުރީގެ ފުލެޓު ލިބޭނެ ކަމަށް އިއުލާނުކޮށްފައި އޮތް ލިސްޓު އިވެލުއޭޓްކުރުމުގެ މަރުހަލާގައި ކައުންސިލަރުން ހިމެނޭހެން ކުރިއަށް ގެންދިޔުމަށް އަންގަވާފައިވާނެ ކަމަށެވެ.
"މިހާރު ހިނގަމުންދާ ކުރީގެ ފުލެޓު ލިބޭނެ ކަމަށް އިއުލާނުކޮށްފައި އޮތް ލިސްޓު އިވެލުއޭޓްކުރުމުގެ މަރުހަލާގައި ދެންމެ ސައިފް ތި ވިދާޅުވި ގޮތަށް ގެންދަން އޮންނާނީ ސަރުކާރުން ކައުންސިލަށް ދަންނަވާފައި. އަޅުގަނޑު އެދުނިން ކައުންސިލްގެ ފަރާތުން ކައުންސިލާސް ކޮމިޓީއެއް ނަންގަވާފައި ތި ވިދާޅުވި ޕްރޮސެސްގައި ބައިވެރިކޮށްގެނޭ ދާންވާނީ،"
ރައީސް ޑރ.މުޢިއްޒު ވިދާޅުވިއެވެ.
ރައީސް ޑރ.މުޢިއްޒު ވިދާޅުވީ، ފުލެޓުތައް ލިބެންވާނީ ޕޮއިންޓު ދޭ ނިޒާމުގެ ތެރެއިން އެންމެ ގިނަ ޕޮއިންޓު ލިބޭ މީހުންނަށް ކަމަށާއި މާލޭގެ ރައްޔިތުންގެ ފަރާތުން ހޮވާފައި ތިއްބެވި ކައުންސިލަރުންނަށް އެކަން ހިނގާ ގޮތް އެނގެން ޖެހޭނެ ކަމަށެވެ.
Advertisement
This content is created and paid for by advertisers and does not involve Voice Journalists
