ރައްޔިތުންގެ މަޖިލީހުގެ މިއަދުގެ ޖަލްސާގައި މަޖިލީހުގެ ތަޅުމުގައި އަޑު ގަދަކޮށް، ނިޒާމު ގެއްލުވާލަން މަސައްކަތް ކުރެއްވި، އެމްޑީޕީގެ ހަތަރު މެންބަރެއްގެ ނަން އިއްވައި މަޖިލީހުން ބޭރުކޮށްފިއެވެ.
މަޖިލިހުގެ ޖަލްސާއަށް ހާޒިރުވެވަޑައިގެން އިންނެވި ގެދޮރުވެރިކަމާއި ބެހޭ ވަޒީރު ޑރ. އަލީ ހައިދަރު އަޙްމަދު މެންބަރުންގެ ސުވާލަށް ޖަވާބު ދެއްވާ ގޮތުން ނުރުހުން ފާޅު ކުރައްވައި އެމްޑީޕީ މެންބަރުން ވަނީ އިދާރީ މޭޒާއި މަޖިލިހުގެ ރައީސް އަބްދުއްރަހީމް އަބްދުالله އިންނަވާ މޭޒުކޮޅު ކައިރިއަށް ވަޑައިގެން އަޑުގަދަ ކުރައްވައިފައެވެ.
އެގޮތުން މަޖިލީހުން ފުރަތަމަ ނަން އިއްވައި ބޭރުކުރެއްވީ، ވައިކަރަދޫ ދާއިރާގެ މެންބަރު ހުސައިން ޒިޔާދެވެ. އެއާއެކު ދެން ތިއްބެވި އެމްޑީޕީ މެންބަރުންވެސް އަޑު ގަދަ ކުރައްވަން ފެއްޓެވުމުން، ހިތަދޫ ދެކުނު ދާއިރާގެ މެންބަރު އިބްރާޙީމް ނާޒިލާއި، ކެންދޫ ދާއިރާގެ މެންބަރު މައުރޫފް ޒާކިރުގެ އިތުރުން ކެޔޮދޫ ދާއިރާގެ މެމްބަރު މުހައްމަދު ނިއުޝާދުގެ ނަން އިއްވަވާފައެވެ.
އަދި،އެއަށްފަހު އަބްދުއްރަހީމް ވަނީ މަޖިލިސް މެދުކަނޑާލައްވައި މަޖިލިސް ދެން ފެށޭނީ މިއަދު 11:00 ގައި ކަން އިއުލާން ކުރައްވާފައެވެ
Advertisement
This content is created and paid for by advertisers and does not involve Voice Journalists
