ކުރީގެ ރައީސް އަބްދުالله ޔާމީން އަބްދުލްޤައްޔޫމް ގެ ވެރިކަމުގައި ނައިބު ރައީސްކަން ކުރެއްވި އަބްދުالله ޖިހާދުގެ މައްޗަށް ޕްރޮސެކިއުޓަރ ޖެނެރަލް (ޕީޖީ) އޮފީހުން އުފުލި ދައުވާ ކުރިއަށް ނުގެންދެވޭނެކަމަށް ކްރިމިނަލް ކޯޓުން ނިންމި މައްސަލަ އެ އޮފީހުން ހައި ކޯޓުގައި އިސްތިއުނާފްކޮށްފިއެވެ.

ޖިހާދުގެ މައްޗަށް ޕީޖީ އިން އުފުލާފައިވާ ދައުވާއަކީ، ނައިބު ރައީސްކަން ކުރެއްވުމުގެ ކުރިން، ކުރީގެ ރައީސް ޑރ.މުހައްމަދު ވަހީދު ހަސަން މަނިކުގެ ވެރިކަމުގައި ފިނޭންސް މިނިސްޓަުގެ މަގާމުގައި ހުންނަވައި، ދައުލަތަށް ފައިދާއެއް ލިބެންއޮތް ކަމެއްގައި އެނޫންގޮތަކަށް ޢަމަލުކޮށްފައިވާކަމުގެ ދައުވާއެވެ.

އެހެންނަމަވެސް، މި މައްސަލައިގެ ތަހުގީގުގައި އޮޅުވާލުން ތަކެއްހުރި ކަމަށް ބުނެ ކްރިމިނަލް ކޯޓުން މި މައްސަލަ ކުރިއަށް ނުގެންދެވޭނެކަމަށް މިދިޔަމަހުގެ ތެރޭގައި ވަނީ ނިންމާފައެވެ.

އެއާއިއެކު، އެ މައްސަލަ އިސްތިއުނާފް ކުރަން ޕީޖީ އޮފީހުން އިއްޔެ ހައި ކޯޓަށް ހުށަހަޅާފައިވާއިރު، އެ އޮފީހުން ބުނީ، މި މައްސަލައިގެ އިސްތިއުނާފު ބިނާކޮށްފައިވާނެ މައިގަނޑު އަސާސަކީ ކްރިމިނަލް ކޯޓުން މި ނިންމުން ނިންމުގައި ޤާނޫނީ އަސާސެއް ބަޔާންކޮށްފައި ނެތުމާއި, ނިންމުމަށް ވާޞިލުވި ސަބަބު އެކަށީގެންވާ މިންވަރަކަށް ބަޔާންކޮށްފައި ނެތުން ކަމަށެވެ.

މިގޮތުން،  މި މައްސަލައަކީ މަޢުޟޫޢީ ގޮތުން ބަލައި ގޮތެއް ކަނޑައަޅަންޖެހޭ މައްސަލައެއްކަމަށް ކަނޑައަޅައި މައްސަލަ ބެލުމަށް ކްރިމިނަލް ކޯޓަށް ތަޙުވީލުކޮށްދިނުމަށް އެދިފައިވާކަމަށް ޕީޖީ އޮފީހުން މައުލޫމާތުދެއެވެ.